Ebijiro by’Entumwa 11:1-30
11 Entumwa na bene-berhu baliri e Yudeya bayunva oku abantu b’amashanja nabo bayemerere echinwa cha Mungu.
2 Petro abere ahika e Yerusalemu, balala balishigikire okukatwa barhondera kumukwaranga,
3 bamubwira: “Walijire omu nju y’abantu barhakatirwe wanasangira nabo.”
4 Petro ava abafasiriya gurhe ebintu byoshi byaliri, aderha:
5 “Naliri e Yopa eyi ndi nasalira, naba nk’oli walorha nabona omu bibonekezi echintu chili nka chitambara chizibuzibu chikolerwe n’ebinusi chili chayandagala kurhenga embingu eyi chifarhiirwe oku mapembe macho mane, chili chayinja emunda indi.
6 Nabere nalola bwinja ebilimo, nabona enyama zijira magulu mane z’oku gulu, ebinyalubala, enyama zinabululuka, n’enyunyi z’omu chanya.
7 Nayunva n’omulenge gwambwira: ‘Petro, yimanga, obage olye!’
8 Aliko nashubiza: ‘Kweri nanga Waliha, bulala echintu chazingisizwe changwa echirhachere chirhasaga kuja omu bunu bwani haba n’eliguma.’
9 Nayunva ogola mulenge gurhengere embingu obwa kabiri, gwambwira ntya: ‘Leka okuhamagala ebintu Mungu acheseze oku bizingire.’
10 Byaba ntyo obwakasharhu, na buzinda byoshi byashuba kukululirwa omu mbingu.
11 Agola mango gan’ago, balume basharhu baliyimangire embere w’enju rhwalirimo; eyi barhumirwe emunda indi kurhenga e Kayizariya.
12 Naho eroho lya Mungu lyambwira ingende nabo buzira ngangane chiro. Abala bene-berhu ndarhu nabo bagenda nani rhwaja omu nju y’oyola mulume.
13 “Arhubalira gurhe abonaga malayika ayimanga omu mwage amubwira: ‘Orhume abantu e Yopa baje kuhamagala Simoni onayirikwa Petro,
14 akubwira ebintu byarhuma mwachunguka, woyo n’abantu b’omu mwawe.’
15 Aliko oku namanarhondera kuderha, eroho lichesibwa lyabayinjako nk’oku nerhu lyanarhuyinjagako burhanzi.
16 Nayibuka ebila binwa Waliha agendaga azigana kuderha: ‘Yowane aliri abatiza n’amenji, aliko mwabo nji mwabatizwa n’eroho lichesibwa.’
17 Bobola, akaba Mungu aherebo oluhembo lwa busha, lulala lonalulala nerhu arhuhere rhwabo rhwayemerere Waliha Yesu Kristu, nyono indi nde y’ingala kubuza Mungu kukola eby’alonzeze?”
18 Bayunvirhe ntyo, baleka obuhaka, bakuuza Mungu baderha: “Gasi Mungu ahere abantu b’amashanja nabo obubabale buyerekeze oku kalamo.”
19 Abanafunzi bashandalaga eyi n’eyi eju y’obipinzani bwabaga enyuma w’olufu lwa Stefano, baja hale kuhika e Foyinike, e Kipro ne Antiyokiya, aliko baliri bahubiri Abayahudi bonyine.
20 Chiro akaba ntyo, baguma omu balume barhengereraga e Kipro ne Kirene bayinja e Antiyokiya, bowe barhondera kuganira n’abantu banaderha Echigiriki, babatangaziza emyazi minja ya Waliha Yesu.
21 Olekere nantyo, efune ya Yehova yaliri haguma nabo, na banene baba bemezi baja oku lunda lwa Waliha.
22 Emyazi oku bibalolere yahikira echibaga che Yerusalemu, nantyo barhuma Barnaba e Antiyokiya.
23 Ahikireyo abona gurhe Mungu ahere abanafunzi b’eyola munda olukogo rhurhakwanene, asima anabahira omurhima boshi bagenderere kuchishwekera ku Waliha n’omurhima goshi.
24 Barnaba aliri muntu mwinja analiyunjwire eroho lichesibwa n’obwemere. Nantyo bantu banene bayemera Waliha.
25 Ava aja e Tarso kulonza Sauli.
26 Abere amubona, amulerha e Antiyokiya. Bamala omwaka goshi eyi bali babuganana n’abantu b’omu chibaga n’okuyigiriza bantu banene. E Antiyokiya y’abanafunzi bayirikirwaga Bakristu ob’oburhanzi kugerera obwerekezi bwa Mungu.
27 Mw’ezola siku, abalebi barhenga e Yerusalemu bayinja e Antiyokiya.
28 Muguma mubo oyirikwa Agabo ayimanga, aleba kugerera eroho oku enzara ekalihire eli hofi kurhengerera omu gulu lyoshi abantu balamireko. Kweri eyola nzara yanarhengerera omu siku za Kulode.
29 Abanafunzi bahigirira okurhumira bene-babo balamire omu Yudeya oburhabale, omu kukulikiza ebi buli muguma akagala kuhaana;
30 nantyo ku banalijirire, babirhumira abashamuka kugerera Barnaba na Sauli.
