Ebijiro by’Entumwa 16:1-40
16 Naho, ahika e Derbe na buzinda aja e Listra. Eyola munda haliri mwanafunzi muguma onayirikwa Timoteo; nyina aliri Muyahudikazi waliri mwemezi aliko eshe aliri Mugiriki.
2 Na bene-berhu be Listra ne Ikoniyamu baliri bahaana obuhamirizi bwinja oku bimulolere.
3 Paulo alilonzeze agende na Timoteo, nantyo amurhola aja kumukata* eju y’Abayahudi baliri eyola munda, bulala boshi baliyinji oku eshe aba Mugiriki.
4 Oku bali babalama omu mavile, baliri babwira bene-berhu obwerekezi entumwa n’abashamuka baliri e Yerusalemu barholere n’okubabwira babukenge.
5 Echola charhuma ebibaga byagenderera kusera omu bwemere n’oluganjo lw’abemezi lwagenderera kuluga lusiku oku lwindi.
6 Echindi, bagerera e Frigiya ne Galatiya bulala eroho lichesibwa lyalibabwirire oku bamenye bahubiri omu provense ye Aziya.
7 Babere bahika e Misiya, balonza baje omu Bitiniya, aliko eroho lya Yesu lirhabayemereraga.
8 Bava bagera omu Misiya bayandagalira e Trowa.
9 Omu budufu, Paulo abona omu bibonekezi mulume muguma we Makedoniya ayimangire embere zage, amurhebereza ntya: “Oyambuke oyinje e Makedoniya orhurhabale!”
10 Oku anamala kubona ebyola bibonekezi ntya, rhwalonza gurhe rhwaja e Makedoniya bulala rhwabaga rhwabwene oku Mungu alonzeze rhujeyo kubatangaziza emyazi minja.
11 Rhwarhola echombo e Trowa rhwabalamira e Samotrake, aliko olusiku lwakulikiragaho rhwahika e Neyapoli.
12 Rhwarhengere eyola munda rhwaja e Filipi, yaliri yarhegekwa n’Abaroma, vile nzibuzibu ye Makedoniya. Rhwaberayo siku zigeke.
13 Olusiku lwe Sabato, rhwaja embuga w’omulyango guzibuzibu gw’evile aha burhambi b’olwinji, eyi rhuwazize oku y’efasi y’okusalirira. Rhwarhondera kuganira n’abakazi balibuganene ahola.
14 Mukazi muguma mubo onayirikwa Lidiya w’omu vile ye Tiyatira, onaguza emyambaro y’erangi ly’omushonga, wanaliri mukozi wa Mungu aliri ayunviriza. Yehova afungula omurhima gwage omu kuntu ayunve bwinja-bwinja ebi Paulo aliri aderha.
15 Amango yewe n’abantu b’omu mwage babatizwa, arhurhebereza ntya: “Akaba mubwene oku ndi mwimana ku Yehova, muyinje mubere omu mwani.” Arhuseza rhujeyo.
16 Mango maguma eyi rhuli rhwaja efasi y’okusalirira, rhwabuganana na mujakazi muguma waliri m’omuzimu w’obulaguzi. Banahamwabo bagendaga bapata furanga zinene kugerera obulaguzi bwage.
17 Oyola mujakazi agendaga azigana kurhukulikira rhwabo na Paulo, analiri aderha ebila binwa n’omulenge gunene: “Abala balume bali baja ba Mungu Oli Enyanya Bwenene banali babatangaziza enjira y’obuchunguke.”
18 Agenderera kujira ntyo mu siku zinene. Buzinda ebyola byagayisa Paulo, ahindamuka abwira oyola muzimu ntya: “Inkubwirire omu zino lya Yesu Kristu, omurhengemo.” Ahola han’aho amurhengamo.
19 Banahamwabo babere babona ok’obulangalire bwabo b’okupata obuchire bwamahwa, bafarha Paulo na Sila, bagenda bababulula kugera omu soko emunda abarhambo bali.
20 Babagezeze emw’abazuzi, baderha ntya: “Abala bantu bali balerha kavulindi kanene omu vile. Bali Bayahudi
21 banali batangaza emigenzo rhwabo Baroma rhurhakwanene kuyemera changwa mpu rhuyikulikire.”
22 Na bantu banene bachiheba haguma omu kubapinga. Abola bazuzi barhegeka bababerere kw’emyambaro, naho babashurhe enkoni.
23 Bamalire kubashurha bwenene, babakabula omu prizo, barhegeka n’omulanzi w’eprizo abalange bwinja.
24 Bulala balimuhere elyola rhegeko, abakabula omu chumba cha ndani ch’eprizo anafungira amagulu mabo ahagarhi ka mpaho ebiri.
25 Aliko ahagarhi k’obudufu, Paulo na Sila baliri basalira n’okusingiza Mungu kugerera enyimpo, n’abandi bashwekwa baliri babayunva.
26 Ahola han’aho omusisi gunene gwagera n’omusinji gw’eprizo gwashaganyika. Emilyango yoshi yachingukira chaligumira, n’obulegule bwa buli muguma bwachika.
27 Omulanzi azukire n’okubona oku emilyango y’eprizo yachingukire, ava achomola engorho yage omu kulonza achiyirhe, bulala aliwazize oku abashwekwa batorokere.
28 Aliko Paulo aderha ntya na mulenge gunene: “Orhachibabazaga, bulala rhweshi rhuli munola!”
29 Oyola mulanzi ahema bamuhe etara, alibirhira emunda Paulo na Sila bali ey’anali adirhimana, afukama embere zabo.
30 Abaheka embuga n’okubabaza ntya: “Ba waliha, bichi nkwanene kujira yi nchunguka?”
31 Bamushubiza: “Oyemere Waliha Yesu, wachunguka, woyo n’abantu b’omu mwawe.”
32 Buzinda bamubwira echinwa cha Yehova haguma n’abantu b’omu mwage boshi.
33 M’obola budufu, agenda nabo abashuka ebihulu. Enyuma w’aho, yewe n’abantu b’omu mwage boshi babatizwa buzira kulegama.
34 Abaheka emwage, abasheegera n’okuchisimisa bwenene haguma n’ab’omu mwage boshi, bulala balikala bayemerere Mungu.
35 Bwabere bwacha, abazuzi barhuma abakulu b’abapolisi baje kuderha: “Mushwekule balala balume.”
36 Omulanzi w’eprizo abalira Paulo eyola myazi, amubwira ntya: “Abazuzi barhumire abantu oku rhubashwekule mwembi. Bobola muhuluke, mugende n’omurhula.”
37 Aliko Paulo ababwira ntya: “Nji barhushurhaga enkoni embere z’abantu buzira kurhusambisa rhunali Baroma, na buzinda nji barhukabula omu prizo. Bajire balonza barhushwekule omu bwibisho si? Nanga, birhakashobokana! Muleke bowe bonyine bayinje barhukule munola.”
38 Abola bakulu b’abapolisi baja kubwira abazuzi ebyola binwa. Babere bayunva oku Paulo na Sila bali Baroma, bayubaha bwenene.
39 Abola bazuzi bayinja babarhebereza, naho babakula omu prizo, babahema barhenge mw’eyola vile.
40 Aliko barhengere omu prizo baja emwa Lidiya; babwene bene-berhu babaheba omurhima, naho bagenda.
Mahugulo m'efo
^ Ao “kumukembula.”
