Ebijiro by’Entumwa 20:1-38
20 Olwamo lwabere lwahwa, Paulo arhuma bahamagale abanafunzi, amalire kubaheba omurhima n’okubasezera, arhondera olugenzi lwage l’okuja e Makedoniya.
2 Abere amamala kugera omu materitware m’eyola munda eyi ali abwira abantu binwa binene by’okubahira omurhima, ahika e Bugiriki.
3 Amala yi myezi esharhu, aliko bulala Abayahudi babaga bamujirire enama amango aliri hofi kubalamira e Siriya, abona oku agaluke agerere e Makedoniya.
4 Agendaga na Sopatro mugala wa Piro we Beroya, Aristarko na Sekundo be Tesalonike, Gayo we Derbe, Timoteyo, na kurhenga omu Provense ye Aziya, Tikiko na Trofimo.
5 Abola balume barhurhanga embere baja kurhulingira e Trowa;
6 aliko enyuma w’Olusiku Lukulu lw’Emigati Erhali mu Levire,* rhwarhola echombo rhwarhenga e Filipi, n’enyuma wa siku erhano rhwababugana e Trowa, rhwamala yi siku mushanvu.
7 Olusiku lurhanzi lw’eboso, eyi rhwabuganene haguma omu kuntu rhulye, Paulo arhondera kuyigiriza abantu baliri ahola, bulala alikwanene kugenda olusiku lwakulikiraho; ava alehya ejambo lyage kugera midi y’obudufu.
8 Echumba ch’oku etaje rhwabaga rhwabuganenemo chaliri mu matara manene.
9 Murhabana muguma mpu ye Eutiko aliyikere oku dirisha, ava aj’ero linene eyi Paulo ali ayigiriza na bulala abaga ahondoberere, arhoga kurhenga oku etaje ya kasharhu. Babere balonza kumuzusa babugana afire.
10 Paulo ayandagala kurhenga oku etaje achikabula kuye amubagalira, aderha: “Muleke okulaka bulala azene.”
11 Naho agaluka oku etaje arhola ebilyo arhondera kulya. Ashuba kugenderera kuyigiriza mu kasanzi kanene kugera emiseke, na buzinda agenda.
12 Baherekeza oyola murhabana ey’ali mugumaguma, eyi banagwerhe busime bunene.
13 Naho rhwaja kurhola echombo rhwabalamira e Aso, emunda rhwalikwanene kurhola Paulo omu chombo, bulala abaga arhubwirire oku alonzeze ajeyo n’amagulu.
14 Abere arhubugana e Aso, aja omu chombo rhwalirimo rhwaja e Mitilene.
15 Olusiku lwakulikiragaho rhwarhenga eyola munda rhwahika hofi ne Kio, olusiku lwa kabiri rhwasika e Samo, n’olusiku lwa kasharhu rhwahika e Mileto.
16 Paulo abaga apangire oku agenderera n’olugenzi buzira kugera e Efeso, y’arhaheza ebisanzi omu provense ye Aziya, bulala aliri ajira juba-juba omu kuntu akaba byakagalikana ahike e Yerusalemu oku Lusiku Lukulu lwe Pentekose.
17 Aliko oku anali e Mileto arhuma abantu baje kuhamagala abashamuka b’echibaga che Efeso.
18 Bahikire ah’ali, ababwira ntya: “Muyinji bwinja-bwinja okuntu naliri nachigendesa amango naliri nenyu olusiku l’oburhanzi nalabarhaga omu provense ye Aziya,
19 okuntu nalikoleere Waliha n’obwirhohye boshi nka muja, omu miziga, n’amalibuko mampikiraga eju y’enama Abayahudi banjiiraga;
20 buzira kuleka kubabwira echintu choshi-choshi ch’akamaro n’okubayigiriza embere z’abantu na nju oku nju.
21 Nalihaanire bwinja-bwinja obuhamirizi oku Bayahudi n’oku Bagiriki, oku bilolere okuhungama emwa Mungu n’okuyemera Waliha werhu Yesu.
22 Mujage mwalola! Nkola kubalamira e Yerusalemu chiro akaba oku ntamenyere eby’ampikira eyola munda bulala ntyo kw’eroho lyantegekere.
23 Aliko echimenyere chonyine, mu buli vile eroho lichesibwa lyanyemezeze turu zinene oku eprizo n’amalibuko bindingire.
24 Chiro akaba ntyo, intabwene akalamo kani oku kali k’akamaro bwenene. Ech’akamaro emwani kuli kumala olugenzi lwani n’akasi Waliha Yesu ampere k’okuhaana bwinja-bwinja obuhamirizi eju y’emyazi minja y’olukogo lwa Mungu rhurhakwanene.
25 “Mujage mwalola! Imenyere oku ntaye n’omuguma mu mwabo nayigirize oku bilolere Obwami nji washuba kumbonako.
26 Bobola imbahamagere zene yi muhamiriza oku nta shagama y’omuntu n’omuguma eli oku rhwe lyani,
27 bulala ntafundaga kubabwira byoshi Mungu alonzeze.
28 Muchilange munalange echishumba eroho lichesibwa lyabashingize muyimangire, yi mulagira echibaga cha Mungu agulaga kugerera eshagama y’Omugala.
29 Imenyere oku hanola mala kugenda, embwa z’elubala zikalihire zaja ahagarhi kenyu zirhanakolera echishumba oku bwinja,
30 n’ahagarhi kenyu harhengerera abantu bayigiriza enyigirizo z’obubeshi omu kuntu abanafunzi babakulikire.
31 “Che chirhumire mugenderere kuyorha muzene, munayibuke oku mu myaka esharhu ezuba n’ebudufu, intalekaga kuhanula buli muguma wenyu eyi ndi nalaka.
32 Bobola namabahira omu fune za Mungu n’omu chinwa ch’olukogo lwage rhurhakwanene, echinwa chakabakomeza n’okubaha akashambala ahagarhi ka balala boshi bachesezwe.
33 Intachifijaga e arja, e oro changwa omwambaro g’omuntu yeshi-yeshi.
34 Mwenyine muyinji oku zinola fune zantabere, zarhabala n’abali haguma nani yi rhupata ebi rhukenere.
35 Nabayerekere omu bintu byoshi k’omu kukola bwenene omu njira eli nk’eyola, mukwanene murhabale balala bazambire munakwanene muyibuke ebinwa bya Waliha Yesu, amango yenyine aderhaga ntya: ‘Hali busime bunene omu kuhaana kulusha obuba omu kuhaabwa.’”
36 Amalire kuderha ebyola, yewe n’abantu boshi bafukama asalira.
37 Kweri, boshi balaka bwenene, bahobera Paulo n’okumuha amabize,
38 bulala balibabere bwenene okuyunva ababwira oku barhakachimubonako. Bava bamuherekeza kugere emunda arholera echombo.
Mahugulo m'efo
^ Ao “engezo.”
