Ebijiro by’Entumwa 19:1-41
19 Buzinda, amango Apolo aliri e Korinto, Paulo abalama omu mabarabara mali hale n’enyanja ayandagalira e Efeso. Abugana yi banafunzi baguma,
2 ababaza ntya: “Mwalipatire eroho lichesibwa amango muba bemezi si?” Bamushubiza: “Rhurhasaga kuyunva chiro n’akaba eroho lichesibwa libaho.”
3 Ashuba kubabaza: “Bubatizo buhe mwapataga?” Bamushubiza: “Bubatizo bwa Yowane.”
4 Paulo aderha: “Yowane aliri abatiza obubatizo bwaliyerekene oku abantu bakwanene bahungame, aliri abwira abantu bagwarhe obwemere m’olala wakayinjire enyuma zage, k’okuderha Yesu.”
5 Bayunvirhe ntyo, babatizwa omu zino lya Waliha Yesu.
6 Paulo abere abaheba kw’efune, eroho lichesibwa lyabayandagalirako, barhondera kuderha omu zindi-zindi ndimi n’okuleba.
7 Boshi baliri balume 12 ntya.
8 Mu myezi esharhu, aliri aderha buzira buba omu sinagogi; aliri ageza amajambo, analiri arhabala abantu bawaze bwinja n’okubayemeza oku bilolere Obwami bwa Mungu.
9 Aliko amango baguma mubo bagwarha amarhwiri mazibu balahira kuyemera, eyi bali baderha kubi Enjira y’Okuli embere z’abantu kamama, Paulo abaleka agenda n’abanafunzi. Na buli lusiku aliri agezeza amajambo mu somo liguma ly’amasomo me Tirano.
10 Ebyola byagenderera ntyo mu myaka ebiri, omu kuntu abantu boshi balilamire omu provense ye Aziya k’okuderha Abayahudi n’Abagiriki, bayunva echinwa cha Waliha.
11 Nantyo, Mungu agenderera kukola ebisomerene kugerera Paulo,
12 omu kuntu abantu baliri barhola emyambaro n’amatabliye byakozeze oku mubiri gwage banabiheka emunda abalwala bali, banabaheba kubyo banafuma n’abazimu banabarhengamo.
13 Aliko baguma omu Bayahudi baliri baja eyi n’eyi kufukuza abazimu, nabo balonza oku bakolese ezino lya Waliha Yesu oku bantu bali mw’abazimu. Bayinja baderha ntya: “Omu zino lya Yesu Paulo ali ahubiri, nkubwirire orhenge m’oyula muntu.”
14 Omu baliri bajira ntyo, haliri bagala mushanvu ba Muyahudi muguma waliri mudahwa mukulu mpu ye Sikewa.
15 Aliko muzimu muguma abashubiza ntya: “Nyinji Yesu, nyinji na Paulo; sasa si mwabo muli bande?”
16 Ahola han’aho omuntu walifarhirwe n’omuzimu achikabula kubo, abalwisa anabahima boshi. Bahuluka mw’eyola nju balibirha butambara eyi banayunjwire ebihulu.
17 Eyola myazi yamenyikana oku bantu boshi, oku Bayahudi n’oku Bagiriki balilamire omu Efeso; boshi bayubaha n’ezino lya Waliha Yesu lyagenderera kukuuzwa.
18 Na banene omu babaga bemezi baliri bayinja kuhungama ebyaha byabo n’okuderha ebijiro byabo bibi embere z’abantu.
19 Kweri, bantu banene omu baliri bajira eby’obushake bagusha ebitabu byabo haguma babidwika embere z’abantu boshi. Baganja akachiro kabyo babugana byakafa bicheri 50 000 bye arja.
20 Nantyo, kugerera obuhashe bwa Yehova echinwa chage chagenderera kuyenera hoshi n’okugwarha emisi.
21 Ebyola byabere byahwa, Paulo abona oku agerere e Makedoniya ne Akaya, n’enyuma w’aho anaja e Yerusalemu. Aderha ntya: “Hanola mpika eyola munda, byampema nje ne Roma.”
22 Bobola arhuma babiri mu balala baliri bamurhabala, Timoteyo na Erasto, aliko yewe abera omu provense ye Aziya siku zigeke.
23 Mw’amola mango, harhengerera okurhayunvikana oku bilolere Enjira y’Okuli.
24 Haliri muchuzi muguma onayirikwa Demetriyo waliri wachula e arja omu kukola esanamu za Artemi, analiri arhuma bafundi bapata nyungu nene.
25 Agusha ababo anakola nabo haguma n’abandi bafundi, ababwira: “Bera bani, mumenyere bwinja ok’obula buchuruzi b’obunarhuha efuranga.
26 Lero muli mwachibonera n’okuchiyunvira okuntu oyola Paulo ashumikire bantu banene n’okurhuma bagwarha amandi-mandi mawazo, arhali omu Efeso monyine si hofi n’omu provense yoshi ye Aziya. Ali aderha oku bamungu bakolerwe n’efune barhali bamungu b’okuli.
27 Echindi, arhali akasi kerhu konyine kakali omu buhanya, si n’ehekalu lya mungu werhu mukulu w’omukazi Artemi lyabonekana oku lili lya busha, n’ey’abantu b’omu provense yoshi ye Aziya n’oku gulu lyoshi banaharamya akala kuheza obukuuze bwage.”
28 Abantu bayunvirhe ntyo, bayunva burhe bunene, barhondera kuyama ntya: “Artemi w’Abaefeso ali mukulu.”
29 Akavulindi kayunjula omu vile na boshi haguma balibirhira omu boma ly’amasharha, babululira mu Gayo na Aristarko baburhwa be Makedoniya baliri babalama haguma na Paulo.
30 Paulo naye alilonzeze aje mw’echola chibuga aliko abanafunzi barhamuyemereraga.
31 Chiro na baguma omu banayimangira esiku zikulu n’amasharha baliri bera bage bamurhumira oburhumwa, bamurhebereza amenye achiheba omu buhanya omu kuja mw’elyola boma ly’amasharha.
32 Kweri, boshi baliri bajira olwamo, baguma baderha echi n’abandi banaderha echindi; bulala abantu boshi babaga eyi barhachiyunvikene, na banene mubo barhalimenyere empanvu yabalerhaga ahola.
33 Bakula Alegzandre ahagarhi k’abantu, Abayahudi baliri bamushunika agere embere. Alegzandre abasimira n’efune ey’ali alonza achifasiriye embere z’abantu.
34 Abantu babere barhegera oku ali Muyahudi, boshi bava bajira hofi sa ebiri eyi bali bayama ntya: “Artemi w’Abaefeso ali mukulu!”
35 Omukulu w’evile abere amagala kurhuleza abantu, ababwira ntya: “Ego bantu be Efeso, okuderha okuli, inde omu bantu orhenji oku evile ye Efeso ye mulanzi w’ehekalu ly’omukulu Artemi n’esanamu yarhogaga kurhenga embingu?
36 Ntaye wakapinga ebyola, murhulere na ntacho mukolage juba-juba.
37 Bulala abala bantu mwalerhere hanola ntacho bayibire omu hekalu barhanadukangire mungu werhu w’omukazi.
38 Bobola, akaba Demetriyo na bafundi bali naye bagwerhe echi bakasidaka omuntu yeshi-yeshi, hali esiku z’okucha emanja oku tribinale na baguvernere baliho, mubaleke basidakane.
39 Aliko akaba hali echindi muli mwalonza chilushire echola, chikwanene kuhwera omu mbuganano eyemererwe n’amarhegeko.
40 Kweri, rhuli omu buhanya b’okusidakwa zene oku rhwarhumire abantu bachijira bigamba, bulala nta mpanvu yoshi-yoshi rhugwerhe rhwakahaana yi rhufasiriya bulagurhe hali echila chigusho chili chalerha akavulindi.”
41 Amalire kuderha eyola myazi, abwira abantu bagende.
