Ebijiro by’Entumwa 18:1-28
18 Enyuma w’ahola arhenga e Atene aja e Korinto.
2 Abugana yi Muyahudi muguma oyirikwa Akila muburhwa we Ponto. Arhaliza kulegama ahikire eyola munda ey’arhengerera e Itali haguma na mukage Prisila, bulala Kulode abaga arhegekere oku Abayahudi boshi barhenge e Roma. Paulo ava aja emwabo,
3 na bulala boshi baliri bakola kasi kaguma, abera omu mwabo n’okukola haguma nabo. Akasi kabo kwaliri kukola amahema.
4 Buli lusiku lwe sabato, aliri ageza ejambo omu sinagogi n’okuyemeza Abayahudi n’Abagiriki.
5 Sila na Timoteyo babere bayandagala barhenga e Makedoniya, Paulo arhondera kugeza ebisanzi byage byoshi omu kuhubiri echinwa cha Mungu n’okuyemeza Abayahudi oku Yesu ye Kristu.
6 Aliko bulala abantu baligenderere kumupinga n’okumuderha kubi, akungurha emyambaro yage ababwira: “Eshagama yenyu ebagendeko. Nyono indi mwerukweru. Kurhangira zene namaja emw’abantu bamashanja.”
7 Arhenga ahola aja omu nju ya mulume muguma oyirikwa Titiyo Yusto mukozi wa Mungu, eye nju yage yalifarhene ne sinagogi.
8 Aliko mwimangizi muguma we sinagogi oyirikwa Krispo, agwarha obwemere mu Waliha haguma n’abantu boshi b’omu mwage. Na Bakorinto banene bayunvaga emyazi minja bagwarha obwemere banabatizwa.
9 Echindi, ebudufu Waliha abwira Paulo ntya omu bibonekezi: “Orhayubahaga s’ahubwe ogenderere kuderha, orhanasiraga,
10 bulala indi haguma nawe na nta muntu wakurhera mpu y’akujira kubi; bulala ngwerhe bantu banene mw’eyila vile.”
11 Ava amala omwaka na myezi ndarhu eyola munda eyi ali abayigiriza echinwa cha Mungu.
12 Amango Galiyo aliri guvernere we Akaya, Abayahudi bachiheba haguma barhera Paulo, bamuheka oku tribinale,
13 baderha: “Oyula muntu ali ashumika abantu baharamye Mungu omu njira erhayemererwe n’amarhegeko.”
14 Aliko Paulo abere alonza kuderha, Galiyo abwira Abayahudi ntya: “Ego Bayahudi, nka chaliri chintu chibi changwa kuvuna amarhegeko, nakachihanganire imbayunvirize.
15 Aliko bulala buli buhaka bw’ebinwa, amazino, n’amarhegeko menyu, mukwanene mubimale mwenyine. Nyono ntalonzeze kuba muzuzi w’ebyola bintu.”
16 Ava abafukuza oku tribinale.
17 Boshi bafarha Sostene waliri mwimangizi w’esinagogi, barhondera kumushurhira embere we tribinale. Aliko Galiyo arhachihebaga haba n’akatyu omu byabo.
18 Enyuma w’okugeza siku zinene eyola munda, Paulo asezera bene-berhu, arhola echombo aja e Siriya haguma na Prisila na Akila. Amango aliri e Kenkreya agembesa enviri zage, bulala abaga ayeneze echilagane ahaga Mungu.
19 Bahikire e Efeso abaleka, aja omu sinagogi arhondera kurhabala Abayahudi kuyunva Amandiko.
20 Chiro akaba oku baliri bamubwira ashube abere nabo eyola munda siku zinene, arhayemeraga
21 s’ahubwe abasezera, ababwira: “Yehova akalonza, nji nashuba kugaluka enola mwenyu.” Arhola echombo arhenga e Efeso
22 ayandagalira e Kayizariya. Azamuka aja kulegereza echibaga, na buzinda ayandagalira e Antiyokiya.
23 Abere amala yi kasanzi kageke, agenderera n’olugenzi. Aliri aja omu materitware malengene m’omu chihugo che Galatiya ne Frigiya eyi ali akomeza abanafunzi boshi.
24 Muyahudi muguma mpu ye Apolo, muburhwa we Alegzandriya ahika e Efeso; aliri mulume onaderha n’oburhwali, analimenyere Amandiko bwenene.
25 Oyola mulume abaga ayigirizwe oku bilolere Yehova, aliyunjulirene eroho lichesibwa, analiri aderha n’okuyigiriza bwinja eju ya Yesu, aliko aliyinji obubatizo bwa Yowane bonyine.
26 Arhondera kuderha buzira buba omu sinagogi. Prisila na Akila bamuyunvirhe, bamurhola bamuheka emwabo bamufasiriya bwinja-bwinja enyigirizo za Mungu.*
27 Echindi, bulala Apolo alilonzeze ayambukire e Akaya, bene-berhu bayandikira abanafunzi oku bamukaribise bwinja. Ahikireyo, arhabala bwenene balala babaga bemezi kugerera olukogo lwa Mungu rhurhakwanene,
28 bulala aliri ayerekana bwinja-bwinja embere z’abantu obubeshi bw’Abayahudi, eyi ali akolesa Amandiko omu kubayereka oku Yesu ye Kristu.
Mahugulo m'efo
^ Ao “enjira ya Mungu.”
