Ebijiro by’Entumwa 2:1-47
2 Boshi balichigushire haguma oku lusiku Lukulu lwe Pentekoste.
2 Ahola han’aho olwamo lwarhengerera embingu luli nka chiyaga chinene chili chagera. Olola lwamo lwayunjula omu nju baliyikiremo.
3 Harhengerera n’ebili nka birimi by’omuliro, byachigabamo buli chiguma chaja ku ngasi muguma wabo,
4 boshi bayunjula eroho lichesibwa barhondera kuderha omu ndimi zirhali kuguma, nk’oku eroho lyanabahere obuhashe b’okuderha.
5 Mw’agola mango Abayahudi bayubahire Mungu barhengereraga omu mashanja moshi m’oku gulu baliri e Yerusalemu.
6 Bobola amango olola lwamo lurhengerera, abantu kamama babuganana ahola. Basomerwa bwenene bulala buli muguma aliri ayunva ebili byaderhwa omu lulimi lwage.
7 Kweri, balisomerwe loshi-loshi bayinja baderha: “Mulole berhu, abala bantu boshi bali baderha barhali Banyagalilaya si?
8 Nka gurhe buli muguma werhu yaja ayunva olulimi lwage lw’akaburhano?
9 Rhube rhuli Baparti, Bamedi, Baelamu, rhube rhurhengerere omu Mezopotamiya, e Yudeya ne Kapadokiya, e Ponto n’omu provense ye Aziya,
10 e Frijiya ne Pamfiliya, e Misri n’omu materitware me Libiya hofi ne Kirene, abarhengerere e Roma bali hanola, babe Bayahudi n’abayemerere edini ly’Abayahudi,
11 Abakrete n’Abaharabu; rhweshi rhuli rhwabayunva baderha ebintu binja bisomeze bya Mungu omu ndimi zerhu.”
12 Boshi basomerwa bwenene n’okurhangaala, barhondera kubazana: “K’okuderha gurhe okula si berhu?”
13 Aliko abandi baliri babashinyagulira n’okuderha: “Abala balalukire edivayi elokere.”
14 Aliko Petro ayimanga haguma na balala 11 aderha ntya n’omulenge gunene: “Bantu be Yudeya, nenyu mweshi mulamire e Yerusalemu, muleke imbabwire munayunvirize bwinja ebinaderha.
15 Omu bukweri, abala bantu barhalalukire nk’oku muli mwawaza, bulala zichili sa esharhu z’esezi zinola.
16 Ahubwe, ebila bye bilala byaderhwaga kugerera omulebi Yoweli:
17 ‘Mungu aderhere ntya: “Omu siku zizinda, nji nasheshera echigabi ch’eroho lyani ku buli buko b’omubiri, nantyo bagala benyu n’abanyere benyu nji baleba, emisole yenyu nji yabonekerwa, n’abashaja benyu nji balorha ebilorho,
18 na mw’ezola siku, nji nasheshera echigabi ch’eroho lyani chiro n’oku baja bani b’abalume, n’abajakazi bani, omu kuntu banaleba.
19 Nji nanajira ebisomerene enyanya omu mbingu n’ebimenyeso eshishi oku gulu; nji haba eshagama n’omuliro n’ebichu by’emyusi.
20 Ezuba nji lyahinduka mwizimya, n’omwezi nji gwahinduka shagama embere olusiku lwa Yehova lukulu l’obukuze luyinje.
21 Na buli yeshi wahamagala Yehova omu zino nj’achunguka.”’
22 “Ego bantu be Izraeli, muyunve ebi nababwira: Yesu we Nazareti ali muntu Mungu alibayerekere oku mugaragaro kugerera ebijiro by’emisi, ebisomerene n’ebimenyeso. Mungu akolaga ebyola byoshi aha kagarhi kenyu kugerera Yesu, nk’oku munamenyere mwenyine.
23 Oyula muntu ahirwaga omu maboko menyu omu kukulikiza obulonza bwa Mungu n’obuhashe bwage b’okumenya ebirhaza kuba, mwamumanika oku murhi omu kukolesa abantu banavuna amarhegeko, na buzinda mwamuyirha.
24 Aliko Mungu amufulire omu kumushwekula omu malumwa m’olufu, bulala birhakashobokene olufu lugenderere kumushweka.
25 Daudi aliderhere ntya oku bilolere oyola muntu: ‘Nahebere Yehova embere zani esiku zoshi, bulala ali oku lunda lwani lw’ekulyo y’intashaganywa haba n’akatyu.
26 Echola che chirhumire omurhima gwani gwashagaluka n’olulimi lwani lwagwarha obusime bunene. Nagenderera kuyorha omu bulangalire;
27 bulala nj’orhandeka omu shinda, orhakanayemera omwimana wawe abola.
28 Wanyerekere enjira z’akalamo; nji wanyunjuza m’obusime bunene embere zawe.’
29 “Bene-berhu, muleke imbabwire bwinja-bwinja oku bilolere erhwe ly’omulala Daudi: Afire, bamuhamba, n’eshinda yage echiba enola mwerhu kugera zene.
30 Bulala aliri mulebi analimenyere oku Mungu alimulaganyize anahakana* oku nj’ajira muguma omu luburho lwage ayikale oku chirhi chage ch’obwami.
31 Daudi alibere abona embere w’echihe obufuke bwa Kristu anabuderhako, oku arhalekwaga omu shinda n’omubiri gwage gurhabolaga.
32 Mungu afulire oyula Yesu, rhweshi rhwanachibwenerebyo.
33 Nantyo, bulala azamwirwe aja oku kuboko kw’ekulyo kwa Mungu n’okuhaabwa eroho lichesibwa Darha alaganyaga, arhusheshere kulyo nk’oku muli mwabona n’okuyunva.
34 Bulala Daudi arhazamukaga akaja embingu, aliko yewe yenyine aliderhere ntya: ‘Yehova abwirire waliha: “Yikala ewa kuboko kwani kw’ekulyo
35 kugera amango najira abashombanyi bawe chichumbi ch’okuheba kw’amagulu mawe.”’
36 Che chirhumire abantu boshi be Izraeli bamenye oku kweri oyula Yesu mwamanikaga oku murhi, Mungu amujirire Waliha na Kristu.”
37 Babere bayunva ntyo byabaluma oku murhima, babaza Petro n’ezindi ntumwa: “Bene-berhu, bichi rhukwanene kujira?”
38 Petro ababwira: “Muhungame, na buli muguma wenyu abatizwe omu zino lya Yesu Kristu yi mubabalirwa ebyaha byenyu, nantyo mwahaabwa oluhembo lwa busha lw’eroho lichesibwa.
39 Bulala echilagane chili chenyu n’abana benyu, na balala boshi bali hale, balala boshi Yehova Mungu werhu akahamagala bayinje emunda ali.”
40 Petro akolesa na bindi binwa binene omu kubaha obuhamirizi buyenere n’okugenderera kubahira omurhima, ababwira: “Muchikule omu bantu babi b’echila chihe yi murhaharabiswa.”
41 Abayemeraga ebinwa byage n’obusime babatizwa, n’olola lusiku bandi bantu hofi 3 000 bachiyongera omu banafunzi ba Yesu.
42 Bagenderera kukulikira bwinja enyigirizo z’entumwa, okubuganana, okusangira ebilyo, n’okusalira.
43 Kweri, entumwa zakola ebisomerene n’ebimenyeso binene na buli muntu wabibonaga arhondera kuyubaha Mungu.
44 Boshi babaga bemezi baliri haguma banaliri bashangiira ebintu byoshi,
45 baliri baguza ebintu n’ebirugu byabo, banagabana efuranga boshi, omu kukulikira obulagirire bwa buli muguma.
46 Buli lusiku, omu bunvikane baliri babuganana omu hekalu, banasangira ebilyo omu mwa buli muguma, n’okugabana ebilyo omu busime bunene n’omurhima gwinja.
47 Baliri bakuuza Mungu n’abantu boshi baliri babasima. Mw’agola mango gan’agola, Yehova aliri agenderera kuyongera abantu bachungukire lusiku oku lwindi.
Mahugulo m'efo
^ Ao “analapa.”
