Ebijiro by’Entumwa 23:1-35
23 Paulo aseza amasu oku Sanendrini aderha: “Bene-berhu, nachigendeseze n’ezamiri echere bwenene embere za Mungu kugera zene.”
2 Eju y’echola, omudahwa mukulu waliyirikirwe Ananiya ava abwira abaliyumangire ahaburhambi bwa Paulo bamushurhe oku bunu.
3 Paulo ava amubwira: “Woyo chibambazi chishigirwe kw’erangi ly’omweru,* Mungu akushurha. Oyikere ahola y’onchira olubanja omu kukulikiza Amarhegeko, n’ahola han’aho wamamavuna omu kurhegeka banshurhe?”
4 Abaliyumangire ahaburhambi bamubaza: “Oli wadukanga omudahwa mukulu wa Mungu?”
5 Paulo ashubiza: “Bene-berhu, intalimenyere oku ali mudahwa mukulu. Bulala amandiko maderhere, ‘Orhakwanene kuderha kubi omukulu w’abantu bawe.’”
6 Bulala Paulo alimenyere oku omu Sanendrini baguma bali Basadukayo n’abandi bali Bafarisayo, ava aderha ntya n’omulenge gunene: “Bene-berhu, indi Mufarisayo na mugala w’Abafarisayo. Indi nachirwa olubanja eju y’obulangalire b’obufuke bw’abafire.”
7 Aderhere ntyo, obuhaka bwarhengerera ahagarhi k’Abafarisayo n’Abasadukayo, n’abantu boshi bachigabamo.
8 Bulala Abasadukayo banaderha oku nta bufuke bubaho, nta malayika na nta roho, aliko Abafarisayo bowe banayemera ebyola byoshi.
9 Hava harhengerera lwamo lunene, na baguma omu bandisi b’omu chama ch’Abafarisayo bayimanga barhondera kujira obuhaka eyi banakalihire, baderha: “Inta gosa n’eliguma rhwabwene m’oyula muntu, aliko akaba eroho changwa malayika aliganirire naye. . .”
10 Obuhaka bwabere bwaluga, omukulu w’abasoda ayubaha oku bakala kusheshanyula Paulo, arhegeka abasoda bayandagale bamukule ahagarhi k’abantu bamuheke omu nkambi y’abasoda.
11 Aliko obudufu bwakulikiragaho, Waliha ayimanga ahaburhambi bwage amubwira: “Orhayubahaga! Bulala nk’oku wahaanaga obuhamirizi bwinja-bwinja oku bindolere omu Yerusalemu, ku wanabuhaana n’omu Roma.”
12 Bwachere, Abayahudi bajira enama, bachishalisa* omu kujira echilapo, baderha oku barhalya barhananywa barhanaza kuyirha Paulo.
13 Abajiraga eyola nama balirhalukire bantu 40.
14 Abola bantu baja kulola abakulu b’abadahwa n’abashamuka bababwira: “Rhwachishalisize* omu kujira echilapo oku nta chintu n’echiguma rhwalya rhurhanaza kuyirha Paulo.
15 Bobola mwewe ne Sanendrini, mubwire omukulu w’abasoda abalerhereye, mube nka mulonzeze kugera omu lushinja lwage bwinja. Aliko embere ahike, rhwaba eyi rhuli tayari omu kuntu rhumuyirhe.”
16 Aliko, mwihwa* wa Paulo ayunva oku bilolere ogola mupango g’okumuyirha, aja omu nkambi y’abasoda amubalira eyola myazi.
17 Paulo ava ahamagala muguma omu bakulu b’abapolisi amubwira: “Heka oyula murhabana emw’omukulu w’abasoda bulala agwerhe omwazi amubwira.”
18 Ava amuheka emw’omukulu w’abasoda amubwira: “Olala mushwekwa Paulo alimpamagere amambwira oku nkulerhere oyula murhabana bulala mpu agwerhe eby’akubalira.”
19 Oyola mukulu w’abasoda afarha oyola murhabana okuboko amuheka eburhambi amubaza: “Bichi olonzeze kumbwira?”
20 Amushubiza: “Abayahudi bayunvikene oku bakuhema olerhe Paulo ewa Sanendrini omusezi, bibe nka bali balonza kupata eyindi myazi oku bilolere olushinja lwage.
21 Aliko orhayemeraga bakurhebeka, bulala hali balume barhalukire 40 mubo bali tayari kuchibisha yi bamurhera, banajirire echilapo oku barhalya n’okunywa barhanaza kumuyirha. Bakala bali tayari, yibalingiriza konyine ebi waderha.”
22 Omukulu w’abasoda aleka oyola murhabana agende, aliko amukomereza ntya: “Nta muntu n’omuguma obwirage oku wambwirire eyila myazi.”
23 Ahamagala bakulu babiri b’abapolisi ababwira: “Murheganye basoda 200, balume 70 banagenda oku farasi na bandi 200 banaheka amachumu, bagende boshi e Kayizariya s’esharhu z’ebudufu.
24 Munarheganyize Paulo efarasi agendako omu kuntu bamuheke emwa guvernere Feliksi buzira chibazo.”
25 Anayandika amala maruba maderhere ntya:
26 “Nyono Kulode Lusiya, namakuyandikira woyo Mukengwa Guvernere Feliksi. Mahyo!
27 Oyula mulume obwene, Abayahudi balimufarhire, banaliri hofi kumuyirha, aliko namayinja n’abasoda bani juba-juba, namanamuyokola, bulala nabaga nayunvirhe oku ali Muroma.
28 Na bulala nalilonzeze kumenya bulagurhe bamusidakire, namamuheka omu Sanendrini yabo.
29 Namabona oku gasi bamusidakire eju y’amarhegeko mabo, aliko nta chintu omu bibalimusidakire chakarhuma ayirhwa changwa mpu aje omu prizo.
30 Bulala bambwirire oku bilolere omuhigo gubihire barholere eju y’oyula mulume, nabwene oku nkurhumireye juba-juba, narhegekere n’abali bamusidaka bayinje bamusidakire embere zawe.”
31 Bobola abasoda barhola Paulo nk’oku banabaga babarhegekere bamuheka e Antipatri omu budufu.
32 Olusiku lwakulikiragaho, bamuleka agenderere n’olugenzi haguma na balala balume banagenda oku farasi, aliko abasoda bowe bagaluka omu nkambi.
33 Abalume banagenda oku farasi bahika e Kayizariya, baha guvernere amaruba balerha na Paulo embere zage.
34 Asoma amola maruba anabaza Paulo provense ehe arhengereremo, amubwira oku arhengerere e Kilikiya.
35 Guvernere amubwira: “Olushinja lwawe naluyunviriza bwinja-bwinja hanola abakusidakaga bahikaho.” Ahaana n’erhegeko oku bahebe Paulo omu nju y’echami ya Herode banamulange.
