Ebijiro by’Entumwa 10:1-48
10 Omu Kaizariya haliri mulume muguma mpu ye Korneliyo; aliri mukulu w’abasoda omu chigusho chinayirikwa chigusho ch’abasoda be Itali.
2 Yewe n’abantu boshi b’omu mwage balikengere Mungu n’okumuyubaha. Agendaga arhabala abakene bwenene n’okusalira amasala m’okulakirira Mungu buli mango.
3 Hofi samwenda z’ezuba, abona omu bibonekezi malayika wa Mungu ayinja omu mwage, amuhamagala: “Korneliyo!”
4 Korneliyo amulola ey’ayubahire, amubaza: “Waliha, gurhe byabere?” Malayika amushubiza ntya: “Amasala mawe mahikire emwa Mungu, abwene okuntu onarhabala abakene, anagenderere kubiyibuka.
5 Bobola orhume abantu e Yopa baje kuhamagala Simoni oyirikwa Petro.
6 Oyola mulume apangire omu mwa Simoni onakwiza empu, ojira enju ahaburhambi bw’enyanja.”
7 Malayika waganiraga naye abere agenda, ahola han’aho, Korneliyo ahamagala bakozi bage babiri, na musoda muguma onakenga Mungu omu basoda bage baliri bamukolera,
8 abalirabo ebintu byoshi byabere, naho abarhuma e Yopa.
9 Olusiku lwakulikiragaho, oku banali bagenderera n’olugenzi lwabo, eyi bali hofi kugera omu vile, Petro azamukira oku dale y’enju y’aja kusalira ey’ekala hofi midi.
10 Aliko ayunva enzara bwenene, anachifija ebilyo. Oku banali barheganya ebilyo, aba nk’oli walorha
11 abona embingu yachingukire, n’echintu chili nka chitambara chizibuzibu chikolerwe n’ebinusi chifarhiirwe oku mapembe macho mane, chili chayandagazwa oku gulu.
12 Mw’echola chintu chili nka chitambara mwaliri buli buko bw’enyama zijira magulu mane, enyama zinabululuka z’oku gulu, n’enyunyi z’omu chanya.
13 Ayunva omulenge gwamubwira: “Petro, yimanga, obage olye!”
14 Petro amushubiza: “Nanga Waliha bulala intasaga kulya echintu choshi-choshi chazingisizwe n’echirhachere.”
15 Ogola mulenge gwamubwira ntya obwakabiri: “Leka okuhamagala ebintu Mungu acheseze oku bizingire.”
16 Byashuba kuba ntyo obwa kasharhu, n’echola chitambara chazamulwa omu mbingu ahola han’aho.
17 Oku Petro anachili asomerwa n’okuchibaza bichi ebibonekezi abonaga byakaba biderhere, abantu Korneliyo arhumaga babaza ngahe aha mwa Simoni, bayumanga oku mulyango.
18 Bahamagala n’omulenge babaza akaba Simoni onayirikwa Petro apangire ahola.
19 Oku Petro anachili awaza bwenene kw’ebyola bibonekezi, eroho lya Mungu lyamubwira: “Tala! Balume basharhu bali bakulonza.
20 Bobola yimanga, oyandagale, ogende nabo, orhaganganaga chiro haba n’akatyu bulala nye nabarhumaga.”
21 Naho, Petro ayandagala ashimba abola balume n’okubabwira: “Nyono nyi muli mwalonza. Bichi mushimbire?”
22 Bamushubiza: “Omukulu w’abasoda onayirikwa Korneliyo, muntu onayubaha Mungu onali munyakunali, onaderhwa bwinja omu Bayahudi boshi; Mungu nj’alimuhere obwerekezi kugerera malayika muchesibwa, oku arhume abantu emunda oli bakuhamagale oje emwage omu kuntu ayunve ebi waderha.”
23 Ava abakaribisa omu nju abaha aha balala.
Bwachere esezi Petro azuka agenda nabo, na bene-berhu baguma be Yopa bagenda naye.
24 Olusiku lwakulikiragaho ahika omu Kaizariya. Kweri Korneliyo aliri abalindira anabaga ahamagere emwage abantu b’omulala na bera bage b’oku murhima.
25 Petro abere ahika, Korneliyo aja kubuganana naye, achikabula oku magulu mage n’okumuyunamira.
26 Aliko Petro amuyimanza n’okumubwira: “Yimanga; nani indi muntu kuguma nawe.”
27 Oku anali aganira naye, aja omu nju abugana muli bantu banene.
28 Ababwira: “Muyinji bwinja oku amarhegeko marhayemerere Omuyahudi akomerane n’omuntu w’elindi shanja changwa amuyegere, aliko Mungu anyerekere oku ntakwanene kuhamagala omuntu yeshi-yeshi oku azingire changwa oku arhachere.
29 Che charhumaga nayinja buzira kugangana amango mwarhumaga abantu bampamagale. Bobola mujage mwambwira bichi mumpamagalire.”
30 Korneliyo aderha: “Hamagera siku ene, nka kw’eno sa kandi, naliri nasalira omu mwani eyi zikala hofi samwenda; omulume oyambere omwambaro guli gwabaraganya ayimanga embere zani
31 ambwira: ‘Korneliyo, Mungu ayunvirhe amasala mawe anamayemerere, anayibukire okuntu onarhabala abakene.
32 Che chirhumire orhume abantu e Yopa, baje kuhamagala Simoni onayirikwa Petro. Oyola mulume apangire omu mwa Simoni onakwiza empu, ojira enju ahaburhambi bw’enyanja.’
33 Ahola han’aho, nava narhuma abantu baje kukuhamagala, nawe wajirire bwinja okuyinja. Lero rhweshi rhuli hanola embere za Mungu yi rhuyunva byoshi Yehova akurhumire orhubwire.”
34 Petro aderha: “Lero namaja nayunva bwinja-bwinja oku Mungu arhajira kabolo,
35 aliko anayemera buli muntu omuyubahire onali wajira ebinja chiro aba wa mu shanja lihe.
36 Alirhumire oburhumwa bw’emyazi minja y’omurhula oku Baizraeli kugerera Yesu Kristu; oli Waliha wa boshi.
37 Muyinji omwazi gwaliri gwaderhwako kurhangirira e Galilaya kugera buli hoshi omu Yudeya, enyuma y’obubatizo Yowane aliri ahubiri;
38 oku bilolere Yesu we Nazareti, okuntu Mungu amushigaga amavurha kugerera eroho lichesibwa n’emisi, n’okuntu ageraga omu chihugo choshi ey’ali akola amenja n’okufumya boshi Ibilisi aliri alibuza, bulala Mungu aliri haguma naye.
39 Rhunali bahamirizi b’ebintu byoshi ajiraga omu chihugo ch’Abayahudi n’omu Yerusalemu; aliko bamuyirha omu kumumanika oku murhi.
40 Mungu amufula olusiku lwa kasharhu anamuyemerera abonekane,
41 arhali oku bantu boshi, s’oku bahamirizi Mungu abaga achishogere, ku rhwabo, rhwe rhwalyaga rhwananywa haguma naye enyuma y’obufuke bwage.
42 Kandi arhurhegekere rhuhubiri abantu n’okuhaana obuhamirizi oku yewe yi Mungu ahebereho abe muzuzi w’abazene n’abafire.
43 Abalebi boshi banahaana obuhamirizi oku bimulolere, oku buli muntu yeshi wagwarha obwemere muye ababalirwa ebyaha kugerera ezino lyage.”
44 Oku Petro anachili aderha oku bilolere ebyola bintu, eroho lichesibwa lyayinja ku boshi baliri bayunva ogola mwazi.
45 Abemezi balikatirwe* bayinjaga na Petro, basomerwa bwenene okubona abantu b’amashanja nabo bali bahaabwa oluhembo lwa busha lw’eroho lichesibwa.
46 Bulala baliyunvirhe abola bantu bali baderha omu zindi-zindi ndimi n’okusingiza Mungu. Petro ava aderha:
47 “Obola abala bantu bapatire eroho lichesibwa kuguma nerhu, inde wakaja abalahirira oku barhabatizwaga n’amenji?”
48 Nantyo, arhegeka oku babatizwe omu zino lya Yesu Kristu. Enyuma waho bamuhema ayorhe nabo siku zigeke.
Mahugulo m'efo
^ Ao “balikembwirwe.”
