Makataronganon Gayod nga Motuo sa Usa ka Paraisong Yuta

SA TIBUOK nga kasaysayan, milyonmilyong tawo nagtuo nga sila sa kadugayan mobiya sa yuta ug moadto sa langit. Nagtuo ang pipila nga dili gayod katuyoan sa atong Maglalalang nga ang yuta mahimong atong permanenteng puy-anan. Nagpasobra pa ang naghikaw-sa-kaugalingon nga mga tawo. Alang sa kadaghanan kanila, ang yuta ug tanang materyal nga mga butang maoy daotan—usa ka babag sa tinuod nga espirituwal nga katagbawan ug sa pagpakigsuod sa Diyos.

Ang mga nakaugmad sa nahisgotang mga ideya mahimong walay alamag kon unsay gisulti sa Diyos bahin sa usa ka paraisong yuta o tinuyong wala manumbaling niana. Sa pagkamatuod, daghan karon ang walay interes sa pagsusi kon unsay gidasig sa Diyos nga isulat sa mga tawo bahin niining ulohana diha sa iyang Pulong, ang Bibliya. (2 Timoteo 3:16, 17) Apan dili ba maalamon nga kita mosalig sa Pulong sa Diyos inay mosagop sa mga teoriya sa mga tawo? (Roma 3:4) Sa pagkamatuod hinungdanon kaayo nga mosalig kita, sanglit ang Bibliya nagpasidaan kanato nga ang usa ka gamhanan apan dili-makita, daotang linalang nagbuta sa mga tawo sa espirituwal nga paagi ug karon “nagpahisalaag sa tibuok gipuy-ang yuta.”—Pinadayag 12:9; 2 Corinto 4:4.

Nganong May Kalibog?

Ang nagkasumpaking mga ideya bahin sa kalag maoy hinungdan nga ang mga tawo nalibog mahitungod sa katuyoan sa Diyos alang sa yuta. Daghan ang nagtuo nga kita adunay dili-mamatay nga kalag—butang nga bulag gikan sa tawhanong lawas ug magpadayong buhi panahon sa kamatayon. Ang uban nagtuo nga ang kalag naglungtad na sa wala pa malalang ang tawhanong lawas. Sumala sa usa ka reperensiya, ang Gregong pilosopo nga si Plato nagtuo nga ang kalag “nabilanggo diha sa lawas ingong silot tungod sa mga sala nga nahimo niini sa dihang kini didto pa sa langit.” Sa susama, ang teologo sa ikatulong siglo nga si Origen miingon nga “ang mga kalag nakasala [sa langit] sa wala pa sila mahiusa sa lawas” ug “nabilanggo [sa maong lawas sa yuta] isip silot tungod sa ilang mga sala.” Ug ang milyonmilyon nagtuo nga ang yuta mao lamay usa ka sulayanan nga dapit sa pagpaingon sa tawo sa langit.

Nagkadaiya usab ang mga ideya kon unsay mahitabo sa kalag inigkamatay sa usa ka tawo. Sumala sa librong History of Western Philosophy, naugmad sa mga Ehiptohanon ang pagtuo nga “ang mga kalag sa mga patay manaog ngadto sa kahiladmang kalibotan.” Ang mga pilosopo nangatarongan sa ulahi nga ang mga kalag sa mga patay dili manaog ngadto sa mangitngit nga kahiladmang kalibotan kondili mosaka sa aktuwal ngadto sa mas hataas nga dominyo sa mga espiritu. Ang Gregong pilosopo nga si Socrates nagtuo nga sa pagkamatay, ang kalag “mopaingon sa usa ka dili-makita nga rehiyon . . . ug gugolon ang nahibiling kinabuhi niini kauban sa mga diyos.”

Unsay Giingon sa Bibliya?

Ang dinasig nga Pulong sa Diyos, ang Bibliya, sa bisan diin wala mag-ingon nga ang mga tawo adunay dili-mamatay nga kalag. Basaha ang asoy sa Genesis 2:7. Nag-ingon kini: “Giumol ni Jehova nga Diyos ang tawo gikan sa abog sa yuta ug gihuypan ang mga buho sa iyang ilong sa gininhawa sa kinabuhi, ug ang tawo nahimong buhing kalag.” Kana tin-aw ug masabtan kaayo. Sa gilalang sa Diyos ang unang tawo, si Adan, Siya wala magbutang ug butang nga dili mahikap sa sulod niya. Wala, kay ang Bibliya nag-ingon nga “ang tawo nahimong buhing kalag.” Ang tawo wala masudli ug kalag. Siya maoy usa ka kalag.

Sa paglalang sa yuta ug sa tawhanong pamilya, dili gayod katuyoan ni Jehova nga ang tawo mamatay. Ang katuyoan sa Diyos mao nga ang mga tawo magpuyo sa yuta sa walay kataposan taliwala sa Paraisonhong mga kahimtang. Si Adan  namatay tungod lang kay siya wala magsunod sa balaod sa Diyos. (Genesis 2:8, 15-17; 3:1-6; Isaias 45:18) Sa dihang namatay ang unang tawo, siya ba miadto sa usa ka dominyo sa mga espiritu? Wala! Siya—ang tawong si Adan—nahibalik ngadto sa way-kinabuhi nga abog nga gikan niana siya nalalang.—Genesis 3:17-19.

Kitang tanan nakapanunod sa sala ug kamatayon gikan sa atong katigulangan nga si Adan. (Roma 5:12) Kining napanunod nga kamatayon maoy paghunong sa pagkinabuhi, sama ra sa nahitabo kang Adan. (Salmo 146:3, 4) Sa pagkamatuod, sa tanang 66 ka basahon niini, ang Bibliya wala gayod magpasabot nga adunay butang nga dili mamatay sa sulod sa tawo nga magpadayong buhi panahon sa kamatayon. Sa kasukwahi niana, ang Kasulatan tin-awng nag-ingon nga ang kinabuhi sa usa ka tawo bug-os matapos inigkamatay niya.—Ecclesiastes 9:5, 10; Ezequiel 18:4.

Ang Materyal nga mga Butang sa Kaugalingon Daotan Ba?

Unsa na man ang ideya nga ang materyal nga mga butang, lakip ang yuta, maoy daotan? Kana ang pagtuo sa mga sumusunod sa Manichaeism, usa ka relihiyosong organisasyon sa Persia sa ikatulong siglo K.P. nga gitukod sa usa ka tawo nga ginganlag Mani. Matod sa The New Encyclopædia Britannica: “Ang Manichaeism mitungha gumikan sa tumang kagul-anan nga kinaiyanhon diha sa kahimtang sa tawo.” Nagtuo si Mani nga ang pagkatawhanon maoy “dili kinaiyanhon, dili maantos, ug bug-os nga daotan.” Nagtuo usab siya nga ang bugtong paagi nga makalingkawas sa maong “tumang kagul-anan” mao nga ang kalag mogawas sa lawas, mobiya sa yuta, ug mahidangat sa espirituwal nga kalungtaran diha sa kalibotan sa mga espiritu.

Sa kasukwahi, ang Bibliya nagtug-an kanato nga sa panghunahuna sa Diyos “ang tanan nga iyang gibuhat” sa dihang gilalang ang yuta ug tawo maoy “maayo kaayo.” (Genesis 1:31) Niadtong panahona, walay babag tali sa mga tawo ug sa Diyos. Si Adan ug Eva nagpahimulos ug suod nga relasyon kang Jehova, ingon nga ang hingpit nga tawong si Jesu-Kristo nagpahimulos ug suod nga relasyon uban sa iyang langitnong Amahan.—Mateo 3:17.

Kon ang atong unang mga ginikanan, si Adan ug Eva, wala magpakasala, sila unta may suod nga relasyon uban kang Jehova nga Diyos sa walay kataposan diha sa paraisong yuta. Nagsugod ang ilang kinabuhi diha sa Paraiso, kay ang Kasulatan nagtug-an kanato: “Si Jehova nga Diyos nagtanom ug usa ka tanaman sa Eden, sa dapit sa sidlakan, ug didto iyang gibutang ang tawo nga  iyang giumol.” (Genesis 2:8) Didto sa maong paraisonhong tanaman nga si Eva gilalang. Kon si Adan ug Eva wala pa makasala, sila ug ang ilang hingpit nga mga anak magkauban unta sa pagbuhat nga malipayon hangtod ang tibuok yuta mahimong paraiso. (Genesis 2:21; 3:23, 24) Ang yutan-ong Paraiso mao unta ang puy-anan sa tawo hangtod sa hangtod.

Nganong ang Pipila Moadto sa Langit?

‘Apan,’ tingali moingon ka, ‘dili ba ang Bibliya naghisgot bahin sa mga tawo nga moadto sa langit?’ Oo. Human makasala si Adan, gituyo ni Jehova nga tukoron ang usa ka langitnong Gingharian diin ang pipila sa mga liwat ni Adan “magamando ingong mga hari ibabaw sa yuta” kauban ni Jesu-Kristo. (Pinadayag 5:10; Roma 8:17) Sila pagabanhawon ngadto sa dili-mamatay nga kinabuhi sa langit. Ang ilang bug-os nga gidaghanon maoy 144,000, ug una kanila mao ang matinumanong mga tinun-an ni Jesus sa unang siglo.—Lucas 12:32; 1 Corinto 15:42-44; Pinadayag 14:1-5.

Bisan pa niana, dili orihinal nga katuyoan sa Diyos nga ang matul-id nga mga tawo mobiya sa yuta ug moadto sa langit. Sa pagkamatuod, sa dihang si Jesus dinhi pa sa yuta, siya miingon: “Walay tawo nga nakasaka sa langit gawas kaniya nga nanaog gikan sa langit, ang Anak sa tawo.” (Juan 3:13) Pinaagi sa “Anak sa tawo,” si Jesu-Kristo, gitagana sa Diyos ang usa ka lukat nga magpaposible sa kinabuhing walay kataposan alang niadtong magpasundayag ug pagtuo sa halad ni Jesus. (Roma 5:8) Apan diin mopuyo hangtod sa hangtod ang milyonmilyon nianang mga tawhana?

Matuman ang Orihinal nga Katuyoan sa Diyos

Bisan pag maoy katuyoan sa Diyos nga mokuhag pipila ka tawo aron magsilbing kaubang mga magmamando ni Jesu-Kristo sa langitnong Gingharian, kana wala magpasabot nga ang tanang maayong tawo moadto sa langit. Gilalang ni Jehova ang yuta aron mahimong Paraisong puy-anan sa tawhanong pamilya. Sa dili na gayod madugay, ipatuman na sa Diyos ang maong orihinal nga katuyoan.—Mateo 6:9, 10.

Ilalom sa pagmando ni Jesu-Kristo ug sa iyang langitnong kaubang mga magmamando, ang kalinaw ug kalipay molungtad sa tibuok yuta. (Salmo 37:9-11) Kadtong anaa sa panumdoman sa Diyos pagabanhawon ug magtagamtam ug hingpit nga panglawas. (Buhat 24:15) Pinaagi sa ilang pagkamatinumanon sa Diyos, ang masinundanong mga tawo hatagan kon unsay giwala sa atong orihinal nga mga ginikanan—ang kinabuhing walay kataposan diha sa tawhanong kahingpitan sa usa ka paraisong yuta.—Pinadayag 21:3, 4.

Dili gayod mapakyas si Jehova nga Diyos sa pagbuhat kon unsay iyang katuyoan. Pinaagi sa iyang manalagnang si Isaias, siya nagpahayag: “Ingon nga ang ulan mobunok, ug ang niyebe, gikan sa mga langit ug dili mobalik sa maong dapit, gawas kon ang yuta matumog gayod niini ug magpabunga niini ug magpasalingsing, ug ang binhi igahatag gayod ngadto sa magpupugas ug ang tinapay ngadto sa kumakaon, maingon niana ang akong pulong nga mogula gikan sa akong baba. Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.”—Isaias 55:10, 11.

Diha sa basahong Isaias sa Bibliya, kita abante nga makakita kon unsa unya ang kinabuhi diha sa Paraisong yuta. Walay molupyo sa Paraiso ang moingon, “Ako masakiton.” (Isaias 33:24) Ang mga hayop dili na peligroso sa tawo. (Isaias 11:6-9) Ang mga tawo magtukod ug maanindot nga mga balay ug magpuyo niana ug magatanom ug magakaon hangtod sa katagbawan. (Isaias 65:21-25) Dugang pa, “lamyon gayod [sa Diyos] ang kamatayon hangtod sa kahangtoran, ug ang Soberanong Ginoong Jehova tinong magpahid sa mga luha gikan sa tanang nawong.”—Isaias 25:8.

Sa dili na madugay, ang masinundanong katawhan magpuyo ilalom nianang labing maayong mga kahimtang. Sila “ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.” (Roma 8:21) Pagkakahibulongan unya ang pagkinabuhi sa walay kataposan diha sa gisaad nga yutan-ong Paraiso! (Lucas 23:43) Makapuyo ka didto kon molihok ka karon sumala sa tukmang kahibalo sa Kasulatan ug magpasundayag ug pagtuo diha kang Jehova nga Diyos ug kang Jesu-Kristo. Ug makasalig ka nga makataronganon gayod nga motuo sa usa ka paraisong yuta.

[Hulagway sa panid 5]

Gilalang si Adan ug Eva aron magpuyo sa walay kataposan sa usa ka paraisong yuta

 [Mga hulagway sa panid 7]

Sa yutan-ong Paraiso . . .

sila magtukod ug mga balay

sila magtanom ug kaparasan

sila panalanginan ni Jehova

[Picture Credit Line sa panid 4]

U.S. Fish & Wildlife Service, Washington, D.C./NASA