?From wanem yu jusum hemia?: Yu wantem se ol fren blong yu oli glad long yu mo oli luk se yu independen. Yu harem se yu save moa i bitim papa mo mama blong yu, o yu ting se tufala i no mekem ol gudfala desisen.—Ol Proveb 14:18.

 Samting we i save kamaot from: Maet ol fren blong yu oli glad long yu, be bambae oli kasem save long wan fasin blong yu tu, hemia se yu save haedem samting. Sipos yu haedem samting long papa mo mama blong yu, maet yu haedem samting long ol fren tu o giaman long olgeta. Sipos papa mo mama blong yu i faenemaot samting we yu mekem, bambae tufala i kros mo harem nogud, mo maet tufala i panisim yu.—Ol Proveb 12:15.

 ?From wanem yu jusum hemia?: Yu tingbaot pati ya mo yu luk se i no laenap wetem ol gudfala rul we yu folem, o samfala we bambae oli go oli no gat gudfala fasin. (1 Korin 15:33; Filipae 4:8) Sipos no, maet yu wantem go be yu fraet blong askem long papa mo mama blong yu.

 Samting we i save kamaot from: Sipos yu no go from we yu ting se i no wan gudfala tingting blong go, bambae yu sua moa taem yu ansa long ol fren blong yu. Be sipos yu no go from we yu fraet blong askem long papa mo mama blong yu, maet yu harem nogud blong stap long haos, mo yu harem se yu nomo yu no save gat gudtaem.

 ?From wanem yu jusum hemia?: Yu save se yu stap aninit long han blong papa mo mama blong yu, mo yu respektem ol desisen we tufala i mekem. (Kolosi 3:20) Yu no wantem haedem samting long tufala from we yu lavem tufala mo yu no wantem mekem tufala i harem nogud. (Ol Proveb 10:1) Maet tufala i glad blong lesin long yu taem yu eksplenem samting we yu wantem mekem.

 Samting we i save kamaot from: Bambae tufala i harem se yu lavem mo respektem tufala. Mo sipos tufala i ting se i oraet, maet bambae tufala i talem ‘yes.’

 Maet pijatok ya i givhan long yu blong kasem save long risen blong tufala: Ating bambae yu jusum blong swim long wan ples we ol laef gad oli lukaot long sanbij, sipos i gat ol laef gad long ples blong yu. ?From wanem? From we taem yu stap pleplei long solwota, yu no tingbaot ol denja. Be ol laef gad oli stap long taoa blong olgeta mo i isi moa blong oli luksave ol denja. Long sem fasin, papa mo mama blong yu i gat moa save mo ekspiriens i bitim yu, mo maet oli luk sam denja we yu yu no save luk. Olsem ol laef gad, papa mo mama blong yu i no wantem blokem yu o spolem gudtaem blong yu, be tufala i wantem halpem yu blong luksave ol denja we oli save spolem gudtaem blong yu.

 Wan narafala risen, hemia: Tufala i wantem tumas blong protektem yu. From we tufala i lavem yu, bambae tufala i talem ‘yes’ taem tufala i luk se i stret blong letem yu, be tufala i talem ‘no’ taem tufala i luk sam denja. Long taem we tufala i mekem desisen olsem, tufala i tingbaot sipos tufala i save talem ‘yes’ mo akseptem ol samting we i save kamaot from. Bambae tufala i talem ‘yes’ nomo sipos tufala i save se bambae wan samting i no hapen we i spolem yu.

Samting we yu save mekem

 No giaman: Tingbaot: ‘?From wanem mi rili wantem go long pati ya? ?Hem i samting we mi laekem, o mi jes wantem mekem ol fren blong mi oli glad? ?I gat wan gel o boe long pati ya we mi laekem blong fren wetem hem?’ Yu mas talem samting we i tru long papa mo mama blong yu. Tufala i bin pastru long yangtaem tu, mo tufala i save gud yu. Taswe ating tufala bambae i luksave trufala risen from wanem yu wantem go. Bambae tufala i glad se yu tok tru, mo yu bambae yu kam waes moa sipos yu lesin long tufala. (Ol Proveb 7:1, 2) Be sipos yu giaman, bambae tufala i no moa trastem yu mo maet tufala i talem ‘no.’

 Askem long stret taem: I nogud yu askem tumas samting long papa mo mama blong yu taem oli jes kambak long wok o oli stap tingting gud long wan narafala samting. Askem long tufala taem tufala i stap spel mo harem gud. Be i nogud tu blong wet kasem las minit, nao yu traem fosem tufala blong givim wan kwik ansa. Bambae tufala i no glad sipos tufala i mas mekem wan desisen we tufala i no save tingting gud long hem. Askem samtaem bifo, blong givim taem long tufala blong tingting.

 Samting we yu askem: Yu mas tok klia. Eksplenem gud samting we yu wantem mekem. Ol perens oli no harem gud taem yu ansa nomo se “Mi no save,” speseli taem oli askem se “?Hu bae i stap?” “?Bae i gat wan bigman wetem yufala?” o “?Bae yu kamhom long wanem taem?”

 Fasin we yu soemaot: Yu no mas tingbaot papa mo mama blong yu olsem enemi blong yu. Tingbaot tufala olsem we tufala i stap long sem tim wetem yu, from we hemia nao samting we i tru. Sipos yu tingbaot se tufala i stap long saed blong yu, bambae yu no tok olsem se yu agensem tufala, mo maet tufala i glad blong agri long samting we yu wantem.

 Soemaot long tufala se yu stap gruap long tingting blong yu, taswe yu naf blong akseptem mo obei long desisen blong tufala. Sipos yu mekem olsem, bambae tufala i respektem yu. Mo nekis taem, maet tufala i lukaotem ol risen blong talem ‘yes.’