Go long ol haf insaed long hem

OL YANGFALA OLI ASKEM

?From Wanem Mi Mas Prea?

?From Wanem Mi Mas Prea?

 

Wan ripot i soem se, 80 pesen blong ol yangfala long Amerika oli stap prea, be haf nomo oli stap prea evridei. Sam long olgeta oli stap tingting se: ‘?Prea i jes wan rod blong mekem mi harem gud, o i save mekem sam moa samting?’

?Wanem ya prea?

Taem yu prea, yu toktok stret long God ya we i Wokem olgeta samting. !Yu traem tingbaot samting ya! Jehova i hae moa long olgeta man, be yet hem “i no stap longwe nating long yumi evriwan.” (Wok 17:27) Mo Baebol i tokbaot wan naesfala invetesen we i se: “Yufala i mas kam klosap long God, nao hem bambae i kam klosap long yufala.”​—Jemes 4:8.

?Olsem wanem yu save kam klosap long God?

  • Wan rod hemia taem yu prea​—hemia rod blong toktok wetem God.

  • Wan narafala rod hemia taem yu stadi long Baebol​—hemia rod blong God i “toktok” long yu.

Taem yu toktok wetem God mo hem i toktok wetem yu​—yu prea mo stadi long Baebol​—bambae yu frengud moa wetem God.

“Wan long ol bigfala blesing we wan man i save gat, hemia blong toktok wetem Jehova​—blong storian wetem God Ya We i Hae We i Hae.”​—Jeremi.

 “Taem mi prea mo mi talemaot ol dip filing blong mi long Jehova, mi harem se mi kam klosap moa long hem”​—Miranda.

?God i stap lesin?

Nating se yu bilif long God​—mo nating sipos yu stap prea long hem​—samtaem i had blong akseptem tingting ya se hem i stap lesin. Be Baebol i singaot Jehova se: ‘Man blong lesin long ol prea.’ (Sam 65:2) Mo hem i askem yu blong “lego ol wari blong yu long hem.” ?From wanem? ‘From we hem i stap tingbaot yu.’​1 Pita 5:7.

Samting blong tingbaot: ?Yu yu faenem taem blong storian wetem ol gudfala fren blong yu oltaem? Yu save mekem semak wetem God. I gud yu prea long hem oltaem, mo yu yusum nem blong hem, hemia Jehova. (Sam 86:​5-7; 88:9) Yes, Baebol i pulum yu blong “prea oltaem.”​—1 Tesalonaeka 5:​17.

“Prea i wan storian bitwin mi mo Papa blong mi long heven. Hem i wan man we mi save talemaot long hem, olgeta samting we i stap long hat blong mi.”​—Moises.

 “Taem mi toktok wetem Jehova, mi tokbaot ol samting we oli stap dip insaed long mi, semak olsem we mi toktok wetem mama blong mi o wetem wan gudfala fren.”​—Karen.

?Mi save prea from wanem samting?

Baebol i talem se: “Yufala i mas askem olgeta samting we yufala i wantem long God. Yufala i prea long hem, yufala i mas krae i go long hem blong hem i givhan long yufala, mo yufala i mas talem tangkiu long hem.”​—Filipae 4:6.

?Hemia i min se yu save prea from ol problem blong yu? !Yes! Baebol i talem se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala.”​—Sam 55:22.

Yes i tru, taem yu prea long God, yu save tokbaot ol problem blong yu, be yu mas tokbaot ol narafala samting tu. Wan yangfala nem blong hem Chantelle i talem se: “Bambae mi no frengud wetem Jehova, sipos oltaem mi stap askem nomo blong hem i halpem mi. Mi harem se mi mas talem tangkiu fastaem, mo mi mas gat wan longfala lis blong ol samting we mi wantem talem tangkiu from.”

Samting blong tingbaot: ?Wanem ol samting long laef blong yu we yu wantem talem tangkiu from? ?Yu yu tingbaot tri samting tede we yu wantem talem tangkiu long Jehova from?

“Nating se i wan smol samting nomo, olsem wan naesfala flaoa we yu laekem, be hemia i save pulum yu blong prea long Jehova mo talem tangkiu from.”​—Anita.

“Yu tingting dip long wan samting we Jehova i wokem o wan vas blong Baebol we i tajem hat blong yu, mo biaen yu talem tangkiu long Jehova.”​—Brian.