Jeova i Lukaotgud Long Ol Man Olbaot

?YU TING se yumi mas spesel no yumi mas mekem wan bigbigfala samting blong mekem se God i intres long yumi? Abraham Lincoln, namba 16 presiden blong Amerika i bin talem se: “Masta i laekem moa ol man olbaot. Taswe hem i wokem plante man olsem.” Plante man oli harem se oli man olbaot nomo, oli no save mekem wan spesel samting. Tok ya “olbaot” i save karem mining ya se “pua, daon moa long narafala.” Long sem fasin, tok ya “olsem ol narawan” i save minim man “we i no gat ol spesel janis no hae nem,” no “we i daon moa long ol narafala man.” Be traem tingbaot: ?Yu yu laekem moa blong stap wetem wanem kaen man? ?Yu laekem ol man we oli wantem win oltaem, we oli praod? ?No yu laekem moa ol man we oli gat fasin blong frengud, oli gat tingting daon, oli no flas mo oli rili kea long narafala?

Long wol blong tede, plante man oli stap daonem no jikim ol narawan. Taswe sam man oli faenem i had blong bilif se God i rili intres long olgeta wanwan. Wan man we i ridim magasin ya i raetem i se: “Long famle blong mi, oli no soemaot lav. Oli daonem mi, oli jikim mi, mo oli laf long mi oltaem. Taswe, stat long taem we mi smol nomo mi harem se mi mi nating nomo. Tede yet taem mi fesem wan bigfala traem, sam nogud filing we oli stap longtaem finis long mi oli kam antap mo oli mekem tingting blong mi i foldaon.” Nating se i olsem, i gat plante samting we oli pruvum se God i rili intres long ol man olbaot.

God i Intres Long Ol Man Olbaot

King Deved i raetem se: “Hae God, hem i hae we i hae, mo i stret blong ol man oli stap leftemap nem blong hem i go antap. Hem i hae we i hae, man i no naf blong save paoa blong hem.” (Ol Sam 145:3) Nating se Jeova i hae olsem wanem, be samting ya i no blokem Hem blong soem kaen fasin mo lav long yumi. (1 Pita 5:7) Man blong raetem Sam i talem se: “Hem i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta.”—Ol Sam 34:18.

Olting we oli pulum ae blong man long wol ya, olsem wan naesfala bodi, haenem, no plante rij samting, olgeta samting ya oli no impoten nating long ae blong God. Loa we God i givim long Isrel i soem we Hem i rili gat sore mo i intres long ol puaman, ol pikinini we oli no gat papa mama, ol wido, mo ol strenja. Ol man Isrel oli bin harem nogud long han blong ol man Ijip we oli no gat sore nating, taswe oli lesingud long tok ya blong Jeova se: “Sipos wan strenja i stap wetem yufala, bambae yufala i no mas spolem hem, mo yufala i no mas mekem i strong long hem . . . bambae yufala i no mas spolem ol widowoman mo ol pikinini we papa blong olgeta i ded . . . sipos yufala i mekem i strong long olgeta, nao oli krae i kam long mi blong mi givhan long olgeta, bambae mi mi save harem olgeta.” (Eksodas 22:21-24) Antap long samting ya, profet Aesea i talemaot bilif blong hem se God i kea long ol man we oli no gat nem i se: “Oltaem ol puaman wetem ol man we oli no gat paoa oli stap ronwe blong kam haed long yu, mo sipos oli trabol, bambae oli save stap gud long yu. Mo sipos i gat badtaem, be yu yu save blokemgud olgeta, mo sipos i gat bigsan, be yu yu save givim sed long olgeta. Ol enemi blong mifala oli no gat sore, mo oli stap kam mekem faet long mifala, olsem win mo ren long koltaem.”—Aesea 25:4.

Jisas Kraes “i stret pija blong God,” mo long wok blong prij, hem i givim wan gudfala eksampol long ol disaepol blong hem long fasin blong soem intres long ol man olbaot. (Hibrus 1:3) Taem Jisas i luk ol man we “oli trabol tumas, oli no moa gat paoa, oli olsem ol sipsip we i no gat man blong lukaot long olgeta,” hem i “sore tumas long olgeta.”—Matiu 9:36.

 Mo tu, makemgud wanem kaen man we Jisas i jusum blong oli kam aposol blong hem—Baebol i tokbaot olgeta se ‘oli no gat nem mo oli no skul gud tu.’ (Ol Wok 4:13) Afta we Jisas i ded, ol man blong hem oli stat singaot ol defren kaen man blong oli kam lesin long Tok Blong God. Aposol Pol i raetem se “wan man olbaot no wan man we i no bilif long God” i save kasem bilif mo joen long kampani blong ol Kristin. (1 Korin 14:24, 25) God i no jusum nomo ol man we oli gat haenem long ae blong wol blong mekem wok blong hem, be hem i jusum plante man olbaot. Aposol Pol i talem se: “Ol brata mo sista. Yufala i traem tingbaot. ?Taem we God i singaot yufala, yufala i wanem man? I no gat plante long yufala, we long fes blong ol man, yufala i waes man, no yufala i gat paoa, no yufala i haeman. Be God i jusumaot ol samting we ol man blong wol oli stap talem se oli krangke, blong mekem ol man we oli gat waes oli sem. Mo hem i jusumaot ol samting we ol man blong wol oli stap talem se oli no gat paoa, blong mekem ol man we oli gat paoa oli sem. Hem i jusumaot ol samting we ol man blong wol oli stap luk olgeta olsem we oli no gat nem, oli rabis nomo. Hem i jusumaot ol samting we oli no kamtru yet, blong tekemaot ol samting we ol man blong wol oli luk se oli stap finis, nao bambae ol samting ya oli no moa stap. Nao from fasin ya, i no gat wan man nating we bambae i save tok flas long fes blong God from ol samting we hem i gat.”—1 Korin 1:26-29.

Tede i sem mak nomo: God i rili intres long yumi. God i wantem “sevem olgeta man, mo i wantem we olgeta man bambae oli save trutok blong hem.” (1 Timoti 2:4) God i sanem Pikinini blong hem i kam long wol blong i ded from yumi, from we hem i laekem yumi tumas. Taswe yumi mo mas harem se i no gat man we i lavem yumi, mo se yumi nating nomo. (Jon 3:16) Jisas i talem long ol man blong hem se oli mas soem kaen fasin long olgeta Kristin brata blong olgeta gogo laswan brata ya we i no impoten nating. Oli mas mekem olsem se oli stap soem fasin ya long Jisas hem wan. Hem i talem se: “Taem we yufala i mekem olsem long wan brata blong mi, we i daon moa long ol narafala brata blong mi, be hemia i olsem we yufala i mekem long mi nomo.” (Matiu 25:40) Nomata wanem tingting we ol man blong wol oli gat long yumi, be sipos yumi lavem trutok, yumi spesel long ae blong God.

Francisco * i wan yangfala boe Brasil we i no gat papa blong hem. Hem i lanem blong frengud wetem God, mo i harem se God i lavem hem. Francisco i eksplenem se: “Save we mi gat long Jeova mo long ogenaesesen blong hem i halpem mi blong no letem ol nogud filing oli winim mi, olsem taem mi harem se mi no naf mo mi sem tumas. Mi luksave we Jeova i rili intres long yumi wanwan.” Jeova i kam olsem wan trufala Papa long Francisco.

God i Kea Long Ol Yangfala

Jeova i intres long ol yangfala olsem wan grup, mo tu, hem i intres long evri yangfala wanwan. Nating se yumi yangfala no yumi olfala, yumi no mas tinghae tumas long yumi wan. Be ating yumi evriwan i gat gudhan long sam wok no yumi gat sam gudfala fasin we bambae God i save yusum. Jeova i savegud ol trening we yumi nidim blong kam gud moa long fasin blong yumi, mo i save olsem wanem blong yusum fulwan ol save mo gudfala fasin blong yumi. Plis, ridim stori we i stap long 1 Samuel japta 16. Profet Samuel i ting se i gat sam narafala man we maet oli save kam king blong Isrel. Taswe Jeova i eksplenem long Samuel from wanem Hem i jusum Deved, laswan  pikinini boe blong Jese, blong i kam king blong Isrel. God i se: “Yu no tingbaot we man i longfala man mo i naes. Mi mi no wantem man ya, from we fasin blong mi blong lukluk man i no olsem fasin blong man. Man i stap lukluk long bodi blong man nomo, be mi mi stap lukluk long tingting blong hem.”—1 Samuel 16:7.

?Olsem wanem long ol yangfala tede? ?Oli save sua we Jeova i rili intres long olgeta? Tingbaot Ana, wan yangfala woman Brasil. Olsem plante yangfala, hem i harem nogud from ol kruked fasin mo fasin we i no stret. Biaen, papa blong hem i tekem hem wetem sista blong hem tufala i go long ol Kristin miting. Ale, Ana i haremgud from ol samting we hem i stap lanem long Tok blong God. Hem i stat ridim Baebol wetem ol buk we oli tokbaot Baebol, mo i stat prea long Jeova God. Sloslo, hem i frengud wetem God. Hem i eksplenem se: “Mi laekem ron long baskel i go antap long wan hil klosap long haos blong mi, blong lukluk ol naesfala kala blong skae taem san i stap godaon. Blong traem soem bigfala lav we mi gat long Jeova, mi prea blong talem tangkiu long hem from we hem i kaen tumas mo i stap givim evri samting long gladhat blong hem. Taem mi lanem blong save Jeova God mo ol stamba tingting blong hem, mi harem se mi gat pis long tingting blong mi mo mi harem sef.” ?Olsem wanem long yu? ?Yu yu traem faenem taem blong tingbaot ol fasin blong Jeova we oli soemaot lav blong hem?

I tru, ol samting we oli hapen long laef blong yumi bifo oli save blokem glad we i kamaot from fasin blong frengud wetem Jeova. Tingbaot eksampol blong Lidia. Taem hem i nidim blong tokbaot sam prapa trabol blong hem, papa blong hem i no wantem toktok wetem hem, i talem nomo se: “Hemia i no impoten.” Lidia i save we papa blong hem i wantem we hem i no moa tingbaot ol problem blong hem, be hem i talem se: “Taem mi stadi long Baebol, mi faenem evri samting we mi nidim, mo mi faenem plante moa samting tu. Ol nambawan fasin blong Jeova oli pulum mi, mekem se Hem i kam besfren blong mi. Naoia, mi mi gat wan Papa we i lavem mi mo i kasem save long ol filing blong mi, mo mi save we enitaem nomo mi save storebaot olgeta filing mo fraet we i stap long hat blong mi. Mi save toktok blong plante aoa wetem Man ya we i impoten moa long ol narafala man long heven mo wol, mo mi sua we bambae hem i lesin long mi oltaem.” Sam vas blong Baebol olsem Filipae 4:6, 7 oli givhan long Lidia blong hem i haremsave lav blong Jeova we i kaengud. Vas ya i talem se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.”

Help Blong Lukaotgud Long Yu

Jeova i soem we hem i keagud long ol man blong hem wanwan, mo long kampani blong ol man blong hem long fulwol. Yumi save soem lav blong yumi long Papa blong yumi long heven, taem yumi tekem taem blong toktok wetem hem. I nogud yumi ting nating long fasin fren blong yumi wetem God. Oltaem Deved i tinghae long fasin fren blong hem wetem Jeova. Hem i se: “Hae God. Plis yu tijim mi long ol fasin blong yu, yu mekem mi mi savegud ol rod blong yu. Yu tijim mi, blong mi save folem trutok blong yu long olgeta laef blong mi, from we yu nomo yu God blong mi we yu stap sevem mi. Oltaem mi mi trastem yu.”—Ol Sam 25:4, 5.

Maet tede i fastaem we yu harem toktok ya se yu yu save frengud wetem God. Nomata wanem kaen problem yu yu gat, be yu save trastem Hemia We i Hae Olgeta se bambae hem i save halpem yu, folem stamba tingting blong hem. (1 Jon 5:14, 15) Taswe, i gud we yu lanem blong mekem ol klia prea, folem ol nid blong yu mo ol samting we oli hapen long laef blong yu.

King Solomon i mekem wan prea taem oli dediketem tempol, mo long prea ya hem i talem klia we yumi mas luksave ol nid blong yumi, i se: “Hae God,  sipos i gat hadtaem blong kasem kakae long ples ya, no i gat strong sik i spolem mifala, no hariken i spolem ol kakae long garen, no ol lokis oli kam plante, oli spolem ol garen, no ol enemi oli kam mekem faet long mifala, no i gat ol defren kaen sik i kam long mifala, plis yu harem prea blong mifala . . . mo sipos i gat sam long mifala we oli harem nogud long tingting blong olgeta, . . . plis yu fogivim olgeta, yu tekemaot ol sin blong olgeta, mo yu givhan long olgeta, from we yu yu save tingting blong olgeta. Yu yu save skelem ol fasin blong mifala wanwan, mo mi mi wantem we fasin we yu bambae yu mekem long mifala, bambae i stret gud long fasin blong mifala.” (2 Kronikel 6:28-30) Tru ya, yu nomo yu save ol prapa trabol blong yu mo ol traem we oli kasem yu. Taswe i impoten tumas blong luksave ol prapa nid blong yu mo wanem samting we yu yu wantem. Sipos yu mekem olsem, “bambae [Jeova] i givim long yu ol samting we yu yu wantem tumas.”—Ol Sam 37:4.

Fren Moa Wetem Jeova

Jeova i glad blong letem ol man olbaot oli frengud wetem hem. Tok Blong God i talem se: “Mi bambae mi Papa blong yufala, mo yufala bambae i pikinini blong mi, yufala ol boe mo gel blong mi. Mi mi Hae God, mi gat olgeta paoa, mo hemia tok blong mi.” (2 Korin 6:18) Yes, Jeova mo Pikinini blong hem, tufala i wantem we yumi kasem laef we i no save finis. !Yumi harem gud tumas blong save we Jeova bambae i halpem yumi blong mekem wok blong yumi insaed long famle, long ples blong wok, mo long Kristin kongregesen!

Nating se i olsem, yumi evriwan i fesem hadtaem. Maet wan sik, ol problem long famle, trabol long saed blong mane, no wan narafala samting bakegen i save mekem yumi harem nogud. Maet yumi no save olsem wanem blong winim wan traem. Devel Setan, man ya we i stap agensem yumi oltaem, hem nao i stamba blong olgeta problem we oli stap kam antap bigwan. Hem i save faet agensem yumi stret, no long wan fasin we i no klia no i haed lelebet. Nating se i olsem, i gat wan man we i kasem save ol trabol blong yumi mo i givhan long yumi blong yumi blong gohed oltaem blong frengud wetem Jeova. Man ya, hemia Jisas Kraes long haefala posisen blong hem long heven. Baebol i tokbaot hem i se: “Hae Pris ya blong yumi, hem i savegud we yumi no gat paoa, nao hem i gat sore long yumi, from we olgeta samting blong traem yumi oli traem hem finis. Be wan samting nomo, hem i no mekem sin. Nao from samting ya, i gud yumi mekem tingting blong yumi i strong, nao yumi kam long fes blong God we hem i stap givhan long yumi long gladhat blong hem. Nao hem bambae i sore long yumi, mo long gladhat blong hem, hem bambae i givhan long yumi, stret long taem we yumi trabol.”—Hibrus 4:15, 16.

!Yumi haremgud tumas blong save we yumi no nid blong gat wan haenem no plante sas samting, blong mekem se Jeova i laekem yumi! Nating se yumi kasem ol bigbigfala trabol, be yumi mas gat semfala tingting olsem man ya blong raetem Sam we i prea se: “Mi mi pua, mi no gat paoa, be yu yu no fogetem mi nating, oltaem yu stap tingbaot mi. Oltaem yu yu stap sevem mi.” (Ol Sam 31:9-14; 40:17) Yumi save sua we Jeova i laekem ol man we oli gat tingting daon, ol man olbaot. Yes, ‘yumi save putum ol trabol blong yumi long han blong hem, from we oltaem hem i stap tingbaot yumi.’—1 Pita 5:7.

[Futnot]

[Tok blong pija long pej 29]

Plante long ol man we oli folem Jisas oli no skulgud mo oli man olbaot

[Tok blong pija long pej 30]

Ol Kristin oli traehad blong holem wan strongfala bilif

[Tok blong pija long pej 31]

Yumi no nid blong gat wan haefala posisen blong frengud wetem God