Lesin Gud Long Profet Tok Blong God
Lesin Gud Long Profet Tok Blong God
“Ol samting ya oli mekem mifala i save moa we tok blong ol profet i tru. I gud yufala i lesin gud long hem.”—2 PITA 1:19.
1, 2. ?Yu save tokbaot eksampel blong sam giaman mesaea?
BLONG plante handred yia, ol giaman mesaea oli traem blong talemaot fiuja. Long ol yia fo handred K.T., wan man we i talem se nem blong hem Moses, i pulum ol man Jiu long aelan blong Krit, blong bilif se hem i mesaea. Hem i talem se bambae hem i tekemaot olgeta long ol trabol. Long dei we hem i talem se bambae oli fri, hem i pulum olgeta man blong hem oli go antap long wan hae ples we i lukluk i godaon long solwota blong Mediterenian Si. Hem i talem long olgeta evriwan se oli mas jiam i go long solwota nao solwota bambae i seraot long tu haf. Bighaf blong olgeta we oli jiam i go long solwota ya oli draon, mo giaman mesaea i ronwe i go haed.
2 Long ol yia 11 handred, wan “mesaea” i girap long kantri blong Yemen. Rula blong kantri ya i askem mesaea blong mekem wan saen blong pruvum se hem i rili mesaea. “Mesaea” ya i talem long rula ya blong oli katemaot hed blong hem. Nao, hem i talem se bambae oli luk we, wantaem nomo, bambae hem i laef bakegen, hemia nao saen we bambae hem i givim long olgeta. Rula ya i agri wetem plan ya, be sore tumas, “mesaea” ya i no moa girap bakegen.
3. ?Hu ya trufala Mesaea, mo minista wok blong hem i pruvum wanem?
3 Ol giaman mesaea mo ol profet tok we oli talem, oli go rong oltaem. Be, ol man we oli lesingud long profet tok blong God, neva oli save go rong mo harem nogud. Trufala Mesaea, Jisas Kraes, i mekem plante profet tok blong Baebol oli kamtru long laef blong hem. Matiu, wan long ol man blong raetem Gospel, i yusum profet tok blong Aesea taem hem i raetem se: “‘Graon blong laen blong Sebulun mo graon blong laen blong Naftali i stap long narasaed Jodan Reva i godaon long solwota. Hemia distrik ya Galili we i ples blong ol man we oli no laen blong Isrel. Ol man blong ples ya oli stap long tudak be oli luk wan bigfala laet. Olgeta oli stap oltaem long tudak we i blong ded nomo, be bigfala laet i saenaot i kasem olgeta.’ Nao i stat long taem ya, Jisas i stap prij, i talem se, ‘Yufala i mas tanem tingting blong yufala from ol sin blong yufala, from we taem blong God i kam King blong olgeta man long wol, i kam klosap finis.’” (Matiu 4:15-17; Aesea 9:1, 2) Jisas hem i “bigfala laet” ya, mo minista wok blong hem i pruvum se hem i Profet ya we Moses i bin tokbaot. Ol man we oli no wantem lesin long Jisas bambae oli mas lus.—Dutronome 18:18, 19; Ol Wok 3:22, 23.
4. ?Olsem wanem Jisas i mekem Aesea 53:12 i kamtru?
4 Mo tu, Jisas i mekem profet tok blong Aesea 53:12 i kamtru se: “Hem i glad nomo blong letem laef blong hem gogo i ded. Hem i kasem panis ya we i blong ol man nogud. Oli kaontem hem wetem ol man nogud, mo hem i karem ol sin blong olgeta, mo i prea long mi, blong mi mi fogivim olgeta, mi tekemaot ol sin ya blong olgeta.” Jisas i luksave se i no longtaem bambae hem i mas givim laef blong hem olsem wan ransom, taswe hem i mekem bilif blong ol disaepol blong hem i strong. (Mak 10:45) Blong mekem olsem, hem i yusum wan rod we i nambawan, hemia tru long wan vison we bodi blong hem i jenis.
Bilif i Kam Strong Moa From Vison Ya We Bodi Blong Jisas i Jenis
5. Long prapa tok blong yu, tokbaot taem ya we bodi blong Jisas i jenis.
5 Taem ya we bodi blong Jisas i jenis, hem i olsem wan profet tok. Jisas i talem se: “Bambae mi, mi Pikinini blong Man, mi kam wetem ol enjel blong mi, long bigfala paoa blong Papa blong mi . . . Tru mi talem long yufala, i gat sam man oli stap stanap long ples ya, we bambae oli no save ded, gogo oli luk mi, mi Pikinini blong Man, mi kamtru, we mi mi King.” (Matiu 16:27, 28) ?I gat sam aposol we oli rili luk Jisas we i kamtru long Kingdom blong hem? Matiu 17:1-7 i talem se: “Biaen long sikis dei, Jisas i tekem Pita mo Jemes wetem brata blong hem Jon, trifala i biaen long hem, mo oli go antap long wan bigfala hil, we olgeta nomo oli stap long ples ya. Nao stret long fes blong trifala, bodi blong Jisas i jenis, i kam narafala.” !Hemia i wan samting we i rili narakaen! “Trifala i luk we fes blong hem i saen olsem san, mo klos blong hem oli kam waet olsem laet blong san. Nao wantaem nomo, trifala i luk we Moses mo Profet Elaeja, tufala i stap stori wetem hem.” Mo tu, “wan klaod we i saen we i saen i kam kavremap olgeta,” mo oli harem prapa voes blong God we i talem se: “‘Hemia Pikinini blong mi, we mi lavem hem. Mi mi glad tumas long hem. Yufala i mas lesin gud long hem.’ Taem ol man blong Jisas oli harem tok ya, oli foldaon, we fes blong olgeta i godaon long graon, from we oli seksek tumas. Be Jisas i kam, i putum han blong hem long trifala, nao i talem se, ‘Yufala i girap, yufala i no fraet.’”
6. (a) ?From wanem Jisas i tokbaot taem ya we bodi blong hem i jenis se hemia wan vison? (b) ?Taem ya we bodi blong Jisas i jenis, hem i givim save long saed blong wanem samting?
6 Samting ya blong sapraes, i hapen long wan haeples long Bigfala Hil ya Hemon. Jisas mo ol trifala aposol blong hem oli stap fulnaet long ples ya. I sua se ples i tudak finis taem bodi blong Jisas i jenis, taswe laet we i saenaot long hem i saen strong. Jisas i talem se samting we i hapen long taem ya i olsem wan vison. Wan risen we Jisas i talem olsem hemia se, Moses mo Elaeja, we tufala i ded longtaem finis, tufala i no rili stap long taem ya, Kraes nomo i rili stap. (Matiu 17:8, 9) Vison ya we laet blong hem i saen we i saen, i givim save long Pita, Jemes, mo Jon, long saed blong nambawan taem ya long fiuja, we Jisas bambae i kasem glori mo paoa long Kingdom. Moses mo Elaeja tufala i pija blong ol man we bambae oli joen wetem Jisas blong rul olsem king. Mo vison ya i olsem wan strongfala pruf blong sapotem olgeta tok we Jisas i bin talem long saed blong Kingdom mo rul blong hem olsem king long fiuja.
7. ?Olsem wanem yumi save se vison ya blong bodi blong Jisas we i jenis, i stap klia nomo long tingting blong Pita?
7 Taem ya we bodi blong Jisas i jenis, i mekem bilif blong trifala aposol ya i kam strong moa. Trifala ya nao, bambae oli gat impoten wok ya blong lidim Kristin kongregesen. Fes blong Kraes we i saen, ol klos blong hem we oli saenaot, mo voes blong God hem wan we i talem se Jisas i Pikinini blong Hem we hem i lavem tumas, mo we olgeta man oli mas lesin long hem—olgeta samting ya oli rili gat paoa. Be ol aposol oli no mas tokbaot vison ya long eni man gogo kasem taem we Jisas i laef bakegen long ded. Samwe long 32 yia biaen, vison ya i klia yet long tingting blong Pita. Hem i tokbaot vison ya mo mining blong hem taem hem i raetem se: “Taem mifala i talemaot long yufala, se Jisas Kraes Masta blong yumi i gat paoa, mo bambae hem i kambak bakegen, be mifala i no kasem ol samting ya long ol storian olbaot, nogat. Mifala tri, we long ae blong mitrifala, mifala i luk laet ya we i saenaot long Kraes, we i saen we i saen. Taem God Papa blong yumi i leftemap nem blong hem, nao i mekem laet ya i saenaot long hem, mitrifala i stap. Nao mitrifala i harem tok i kamaot long bigfala laet blong heven, i talem se, ‘Hemia Pikinini blong mi ya, we mi lavem hem. Mi mi glad tumas long hem.’ Taem mitrifala i stap wetem hem long bigfala hil ya we i tabu, mitrifala i harem tok ya we i aot long heven i kam.”—2 Pita 1:16-18.
8. (a) ?Toktok we God i talem long saed blong Pikinini blong hem i pulum tingting blong yumi i go long wanem? (b) ?Klaod ya we i kamaot long taem we bodi blong Jisas i jenis, hem i minim wanem?
8 Samting we i impoten tumas hemia tok we God i talemaot se: “Hemia Pikinini blong mi, we mi lavem hem. Mi mi glad tumas long hem. Yufala i mas lesin gud long hem.” Tok ya i pulum tingting blong yumi i go long Jisas olsem King ya we God i stanemap, mo olgeta laef samting oli mas obei long hem. Klaod we i kam kavremap olgeta, i minim se taem we vison ya i kamtru, ol man bambae oli no save luk wetem prapa ae blong olgeta. Ol man we oli luksave “saen” we i soemaot se Jisas i stap finis mo i kasem paoa blong rul long Kingdom, ol man ya nomo oli naf blong luksave se vison ya i kamtru from we oli lukluk wetem ae blong save. (Matiu 24:3) Yes, oda we Jisas i givim se, oli no mas talemaot vison ya long eniman gogo kasem taem we hem i laef bakegen long ded, i soemaot se bigfala paoa mo glori ya we bambae hem i kasem, i hapen nomo afta we hem i laef bakegen long ded.
9. ?From wanem taem ya we bodi blong Jisas i jenis, i save mekem bilif blong yumi i kam strong moa?
9 Afta we Pita i tokbaot taem ya we bodi blong Jisas i jenis, Pita i talem se: “Ol samting ya oli mekem mifala i save moa we tok blong ol profet i tru. I gud yufala i lesin gud long hem from we tok blong ol profet i olsem wan laet we i stap saen long ples we i tudak. Laet ya bambae i stap saen [“long hat blong yufala,” NW] gogo i brok delaet, nao bigfala Dei ya i kamtru, mo [“wan moningsta i girap, long hat blong yufala,” NW]. Be wan bigfala samting we yufala i mas tingbaot i olsem. Wok blong talemaot mining blong tok blong ol profet we i stap long Baebol, hem i no wan wok we man i save mekem, hem wan, from we i no gat tok blong profet we i kamaot long tingting blong man nomo. Taem tok blong profet i kamaot, ol profet oli talem, be [tabu spirit] i stap givim tok long olgeta, nao oli talemaot tok we i kamaot long God.” (2 Pita 1:19-21) Taem ya we bodi blong Jisas i jenis, hem i makem klia se yumi save trastem ol profet tok blong God fulwan. Yumi mas lesingud long tok ya mo i no long “ol storian olbaot” we oli no kamaot long God nating. Fasin ya we bodi blong Jisas i jenis, i mas mekem bilif we yumi gat long profet tok i kam strong moa from we vison ya, we i soemaot glori mo paoa we Jisas i kasem long Kingdom blong hem, hem i kamtru finis. Yes, yumi gat klia pruf se Kraes i stap finis tede olsem wan King we i gat bigfala paoa long heven.
Olsem Wanem Moningsta i Girap
10. ?Hu no wanem ya “moningsta” we Pita i tokbaot, mo from wanem yu yu ansa olsem?
10 Pita i raetem se: “I gud yufala i lesin gud long hem from we tok blong ol profet i olsem wan laet we i stap saen long ples we i tudak. Laet ya bambae i stap saen gogo i brok delaet, nao bigfala Dei ya i kamtru, mo [“wan moningsta i girap,” NW].” ?Hu, no wanem ya, “moningsta”? Wod ya “moningsta” i kamaot wan taem nomo long Baebol. Revelesen 22:16 i kolem Jisas Kraes se “moningsta ya we i stap saen gud.” I gat sam taem blong yia we ol sta ya oli laswan blong kam antap long is saed blong skae. Oli kam antap jes bifo we san i kamaot, mo i olsem se oli stap talemaot se wan niufala dei i klosap. Pita i yusum wod ya “moningsta” blong tokbaot Jisas afta we Hem i kasem paoa blong rul long Kingdom. !Long taem ya, Jisas i girap olsem wan moningsta long heven mo long wol blong yumi tu! Olsem Moningsta, Mesaea ya i talemaot se wan niufala dei, no laef, blong olgeta man long wol we oli gat fasin obei, i klosap.
11. (a) ?From wanem 2 Pita 1:19 i no minim wan “moningsta” we i girap long hat we i stap long bodi blong man? (b) ?Bambae yu yu save eksplenem 2 Pita 1:19 olsem wanem?
11 Plante kopi blong Baebol oli tanem toktok blong Pita we i stap long 2 Pita 1:19 blong givim tingting ya se hem i stap tokbaot trufala hat ya we i stap insaed long man. Hat blong wan bigman i hevi olsem 250 kasem 300 gram. ?Yu ting se Jisas Kraes—we naoia i stap long heven olsem wan haefala spirit man we i no save ded samtaem—hem i save girap insaed long ol smol hat ya blong man? (1 Timoti 6:16) I klia se hemia i laenap nomo wetem hat long saed blong spirit, from we yumi stap yusum hat ya long saed blong spirit taem yumi stap lesin gud long profet tok blong God. Be nao, lukluk gud long 2 Pita 1:19, mo bambae yu makem se New World Translation i yusum ol koma blong seraotem haf we i se “gogo i brok delaet mo wan moningsta i girap” long ol faswan tok blong vas ya mo long tok ya “long hat blong yufala.” Taswe, wan narafala rod we maet yumi save tanem vas ya i olsem: ‘Ol samting ya oli mekem mifala i save moa we tok blong ol profet i tru; i gud yufala i lesin gud long hem from we tok blong ol profet i olsem wan laet we i stap saen long ples we i tudak, we i minim hat blong yufala, gogo i brok delaet, nao wan moningsta i girap.’
12. ?Hat blong ol man i olsem wanem, be olsem wanem long saed blong ol trufala Kristin?
12 ?Olgeta sinman blong wol ya oli gat wan hat long saed blong spirit we i olsem wanem? !Tru tumas, hat blong olgeta i stap long tudak long saed blong spirit! Be sipos yumi wan trufala Kristin, i olsem we yumi gat wan laet i stap saen long hat blong yumi. Tru ya, sipos i no gat laet ya, hat blong yumi tu, bambae i stap long tudak. Olsem ol tok blong Pita oli soemaot, ol trufala Kristin oli save stap wekapgud mo oli naf blong luksave se wan niufala dei i kam klosap, sipos oli lesingud long profet tok blong God we i olsem laet. Bambae oli luksave trutok ya se Moningsta i girap, i no insaed long prapa hat blong yumi ol man, be hem i girap long fes blong olgeta laef samting.
13. (a) ?From wanem yumi save sua se Moningsta ya i girap finis? (b) ?From wanem ol Kristin oli save stanap strong tru long ol hadtaem we Jisas i talemaot se bambae oli hapen long taem blong yumi?
13 !Moningsta i girap finis! Yumi save sua long samting ya taem yumi lesingud long bigfala profet tok we Jisas i givim blong soemaot se hem i stap finis. Tede, yumi luksave se profet tok ya i stap kamtru taem yumi luk se ol faet, kakae i sot, graon i seksek, mo wok blong talemaot gud nius we i kavremap wol, oli stap hapen long fasin we i neva hapen bifo. (Matiu 24:3-14) Ol trabol ya we Jisas i talem se bambae oli mas kam, oli stap kasem yumi tu, ol Kristin. Nating se i olsem, yumi naf blong stanap strong wetem pis mo glad long hat blong yumi. ?From wanem? From we yumi stap lesingud long profet tok blong God mo yumi bilivim wanem promes we tok ya i talem long saed blong fiuja. !Yumi save se yumi stap klosap nomo long wan taem we i gud tumas from we yumi stap finis long lashaf blong ‘taem blong en’! (Daniel 12:4) Wol i stap safa bigwan long ol hadtaem ya we Aesea 60:2 i talemaot se: “Ol man blong olgeta ples long wol, tudak i kavremap olgeta.” ?Olsem wanem wan man i save faenem stret rod taem hem i stap long tudak? Wanwan man i mas gat tingting daon blong lesingud long profet tok blong God naoia, bifo we i let tumas. Ol man we oli gat gudfala hat oli mas kam long Jeova, we i Stamba blong laef mo laet. (Ol Sam 36:9; Ol Wok 17:28) Long rod ya nomo, wan man i save kasem trufala save mo hop blong harem gud long wan gudfala fiuja we God i promes blong givim long olgeta man we oli gat fasin obei.—Revelesen 21:1-5.
“Delaet i Kam Long Wol Finis”
14. ?Yumi mas mekem wanem blong luk taem ya we olgeta nambawan profet tok blong Baebol oli kamtru?
14 Baebol i talem i klia se, naoia Jisas Kraes i stap rul olsem King finis. From we hem i kambak finis mo i kasem bigfala paoa long 1914, i gat plante nambawan profet tok yet we bambae oli mas kamtru. Blong luk taem ya we ol profet tok ya oli kamtru, yumi mas soem se yumi gat tingting daon blong soemaot bilif long Jisas Kraes, tanem tingting blong yumi from ol wok blong sin mo from ol sin we yumi bin mekem we yumi no bin save. Yes, olgeta we oli laekem tudak bambae oli no save kasem laef ya we i no save finis. Jisas i talem se: “God i save jajem man from poen ya, we delaet i kam long wol finis, be ol man oli no laekem delaet, oli laekem tudak, from we fasin blong olgeta i no stret. Man we i stap mekem ol fasin we i no stret, hem i no laekem delaet, i agens long hem, mo i no save kam long delaet, from we delaet ya bambae i soemaot ol fasin blong hem. Be man we i stap mekem ol stret fasin nomo, hem i save kam long delaet, blong delaet ya i soemaot we ol fasin ya we hem i stap mekem, be God i bin givhan long hem blong i mekem.”—Jon 3:19-21.
15. ?Wanem bambae i hapen sipos yumi no tekem gudfala rod ya we God i yusum blong sevem yumi tru long Pikinini blong hem?
15 Laet long saed blong spirit i kam long wol tru long Jisas, mo i impoten tumas blong lesin long hem. Pol i raetem se: “Bifo, long ol yia we i pas finis, plante taem, God i stap yusum ol profet blong toktok long ol olfala blong yumi long plante naranarafala fasin. Be naoia we i klosap taem we wol ya bambae i finis, hem i yusum Pikinini blong hem blong toktok long yumi . . . olgeta samting ya blong wol oli blong hem nomo.” (Hibrus 1:1, 2) ?Wanem bambae i hapen sipos yumi sakemaot rod ya we God i wokem blong sevem yumi tru long Pikinini blong hem? Pol i gohed blong talem se: “Yumi luk finis we tok ya we ol enjel oli givim long ol bubu blong yumi bifo, hem i tru. Mo ol man we oli brekem tok ya, no we oli no ona long hem, olgeta ya oli kasem stret panis blong olgeta from. ?Be sipos yumi no tekem gudfala rod ya we God i yusum blong sevem yumi, weswe bambae yumi save ronwe long panis? Masta blong yumi, hem i faswan blong talemaot rod ya long yumi, mo olgeta ya we oli harem hem, oli soemaot long yumi we rod ya i tru. Mo God tu i joen long olgeta blong talemgud we rod ya i tru. Hem i stap wokem ol saen mo ol merikel mo ol samting blong sapraes, mo i stap givim ol paoa ya we i kamtru long [tabu spirit], i kam long ol man, stret olsem we hem i wantem.” (Hibrus 2:2-4) Yes, Jisas i impoten man ya insaed long ol profet tok ya we yumi mas talemaot.—Revelesen 19:10.
16. ?From wanem yumi save bilif fulwan long olgeta profet tok blong Jeova God?
16 Olsem yumi makem finis, Pita i talem se: “From we i no gat tok blong profet we i kamaot long tingting blong man nomo.” Ol man nomo oli no naf blong talemaot ol trufala profet tok, be yumi save bilif fulwan long olgeta profet tok blong God. Ol profet tok ya oli kamaot long Jeova God hem wan. Tru long tabu spirit hem i givhan long ol man blong hem blong kasem save olsem wanem ol profet tok blong Baebol oli stap kamtru. Yes, yumi tangkiu long Jeova from we yumi luk plante profet tok oli kamtru finis stat long 1914 i kam kasem tede. Mo yumi sua fulwan se ol narafala profet tok long saed blong en blong rabis wol ya, bambae oli mas kamtru yet. Taem yumi stap letem laet blong yumi i saen, i impoten tu blong yumi lesingud long ol samting we God i talemaot se bambae oli kamtru. (Matiu 5:16) !Yumi tangkiu tumas long Jeova we naoia hem i stap ‘mekem tudak ya we i stap raonabaot long yumi, i kam delaet, olsem medel dei nomo!’—Aesea 58:10.
17. ?From wanem yumi nidim laet long saed blong spirit we i kamaot long God?
17 Laet i wan samting we i givhan long yumi blong lukluk samting. Mo tu, laet i mekem se ol samting long garen oli gru mo karem plante kaen kakae blong fidim yumi. Yumi no save gohed blong laef sipos yumi no gat laet. ?Olsem wanem long laet long saed blong spirit? Laet ya i lidim yumi mo i soemaot long yumi wanem fiuja we Tok blong God, Baebol, i tokbaot. (Ol Sam 119:105) Jeova God i soemaot lav taem hem i ‘sanem laet mo trutok blong hem i kam.’ (Ol Sam 43:3) Yumi mas soemaot wetem fulhat blong yumi se yumi tangkiu from ol samting ya we God i givim. Taswe, i gud yumi traem bes blong yumi blong karem laet ya blong ‘save blong God’ nao bambae hem i saen long hat blong yumi long saed blong spirit.—2 Korin 4:6; Efesas 1:18.
18. ?Moningsta blong Jeova i rere naoia blong mekem wanem?
18 Hemia wan blesing ya we yumi gat blong save se long 1914, Jisas Kraes, Moningsta ya, i kasem paoa antap long olgeta samting long heven mo wol, nao hem i stat blong mekem vison ya we bodi blong hem i jenis, i kamtru. Moningsta ya blong Jeova i stap finis, mo i rere blong mekem stamba tingting blong God we i laenap wetem vison ya, i kamtru moa—hemia ‘faet long bigfala Dei blong God ya we i gat Olgeta Paoa.’ (Revelesen 16:14, 16) Afta we olfala wol ya i lus, Jeova bambae i mekem promes blong hem blong putum wan ‘niufala heven mo wan niufala wol,’ i kamtru. Nao long taem ya bambae yumi save presem hem olwe, olsem Haefala Masta blong heven mo wol, mo God blong ol trufala profet tok. (2 Pita 3:13) Gogo kasem bigfala dei ya, i gud yumi gohed blong wokbaot long laet blong God taem yumi lesingud long ol profet tok we oli kamaot long God.
?Bambae Yu Yu Ansa Olsem Wanem?
• ?Yu save storebaot samting we i hapen long taem ya we bodi blong Jisas i jenis?
• ?Olsem wanem taem ya we bodi blong Jisas i jenis i save mekem bilif blong yumi i kam strong moa?
• ?Hu no wanem ya Moningsta blong Jeova, mo hem i girap wetaem?
• ?From wanem yumi mas lesingud long profet tok blong God?
[Kwestin]
[Tok blong pija long pej 13]
?Yu yu save eksplenem mining blong vison ya we bodi blong Jisas i jenis?
[Tok blong pija long pej 15]
Moningsta i girap finis. ?Yu save olsem wanem mo wetaem samting ya i hapen?