Fundeni Abana Benu

Inkama iyo Wingebako Abantu Bambi

BUSHE balikwebapo inkama?— * Kwaliba inkama iyo ningatemwa ukukwebako. Muli Baibolo, baita ati “inkama ya kwa Lesa iyafishilwe pa nshita ntali.” (Abena Roma 16:25) Pa kubalilapo, Lesa fye e waishibe iyi “nkama.” Leka tumone ifyo Lesa acitile pa kuti abantu abengi beshibe iyi nkama.

Ica kubalilapo, bushe walishiba umulandu itilwa ati “inkama ya kwa Lesa”?—Pantu yafuma kuli Lesa. Bushe ulemona ukuti ni bani balefwaya ukwishiba iyi nkama yaibela?—Ni bamalaika. Baibolo itila: “Muli ifi fine fintu bamalaika balakumbwa ukulengelamo.” Bamalaika balefwaya ukwishiba iyi nkama ya kwa Lesa.—1 Petro 1:12.

Ilyo Yesu aishile pano calo, alilandile pali iyi nkama ya kwa Lesa kabili alelondolwelako na bantu. Aebele abasambi bakwe ati: “Imwe balimupeela amano ya kumfwikisha inkama ya bufumu bwa kwa Lesa.” (Marko 4:11) Bushe uletontonkanya ukuti iyi nkama ilanda pali cinshi?—Ilanda pa Bufumu bwa kwa Lesa, ubo Yesu atusambilishe ukuti tulepepela!—Mateo 6:9, 10.

Nomba leka tumone umulandu Ubufumu bwa kwa Lesa bwabelele ni nkama “pa nshita ntali” mpaka lintu Yesu aishile pano calo no kutendeka ukubulandapo. Ilyo Adamu na Efa bapulile mwi funde lya kwa Lesa, babatamfya na mwi bala lya Edeni, ababomfi ba kwa Lesa baishileishiba ukuti Lesa ali no kulenga isonde lyonse ukuba paradaise na kabili. (Ukutendeka 1:26-28; 2:8, 9; Esaya 45:18) Balilembele pa nsansa abantu bakaipakisha pano isonde ilyo Ubufumu bwa kwa Lesa bukalateka.—Amalumbo 37:11, 29; Esaya 11:6-9; 25:8; 33:24; 65:21-24.

Nomba tontonkanya pa ukalateka mu Bufumu bwa kwa Lesa. Bushe walishiba uo Lesa asala ukuba Kateka?—Mwana wakwe, “Cilolo wa mutende,” Yesu Kristu. Baibolo itila: “bukateka bukaba pa kubeya kwakwe.” (Esaya 9:6, 7) Ine na iwe tufwile ‘ukwishiba bwino bwino inkama ya kwa Lesa, ne yo nkama ni Kristu.’ (Abena Kolose 2:2) Tufwile ukwishiba ukuti Lesa abuulile ubumi bwa kwa malaika (Umwana wakwe) uo abalilepo ukupanga no kububika mwi fumo lya kwa Maria. Uyu Mwana, uwali ni malaika wa maka, e o Lesa atumine ukwisa pano isonde ku kwisatuula ilambo pa kuti twingakwata umweo wa muyayaya.—Mateo 20:28; Yohane 3:16; 17:3.

Lelo kuli na fimbi ifyo tulingile ukwishiba pali iyi nkama, te kwishiba fye ukuti Lesa alisala Yesu ukuba Kateka wa Bufumu bwakwe. Cimbi icaba muli iyi nkama ca kuti abantu bambi, abaume na banakashi, bakaba mu muulu pamo  na Yesu uwabuushiwe ku bafwa. Bakalateka pamo nankwe mu muulu!—Abena Efese 1:8-12.

Leka tumone amashina ya bantu bamo abakalateka na Yesu mu muulu. Yesu aebele abatumwa bakwe aba cishinka ukuti aleya ku muulu ku kubapekanishisha apa kwikala. (Yohane 14:2, 3) Nga wabelenga amalembo yakonkapo, walaishiba amashina ya baume na banakashi bamo abakalateka na Yesu mu Bufumu bwa kwa Wishi.—Mateo 10:2-4; Marko 15:39-41; Yohane 19:25.

Pa myaka iingi, impendwa ya bakalateka na Yesu mu Bufumu bwa mu muulu tayaishibikwe. Nomba ino nshita yalishibikwa. Bushe wali-ishiba?—Baibolo itila ni 144,000. Iyi na yo ni nkama ya kwa Lesa.—Ukusokolola 14:1, 4.

Bushe ulesumina ukuti iyi “nkama ya bufumu bwa kwa Lesa” e nkama yawamisha iyo umuntu alingile ukwishiba?—Nga ulesumina, ninshi tufwile ukwesha na maka ukusambilila ifingi pali iyi nkama pa kuti tule-ebako abantu bambi.

[Futunoti]

AMEPUSHO:

▪ Bushe inkama twacilalandapo baita ati shani, kabili mulandu nshi baitila ifi?

▪ Bushe iyi nkama cinshi, kabili nani wabalilepo ukuisambilisha ku bantu?

▪ Finshi fimo ifyo wasambilila pali iyi nkama?

▪ Kuti walondolola shani iyi nkama kuli cibusa obe?

[Icikope pe bula 31]

Finshi uletontonkanya ukuti e fyo bamalaika balefwaya ukwishiba?