AN MODELO nga pag-ampo ni Jesus, nga usahay tinatawag nga Pag-ampo han Ginoo o Amay Namon, an ginsisiring nga pinakapopular ngan pirme ginpapangadi han mga tawo. Tinuod man ito o diri, damu an may sayop nga opinyon mahitungod hito. Minilyon an pauroutro nga nag-aampo hito kada adlaw. Pero diri ito an karuyag ni Jesus. Kay ano nga nakasiring kita hito?

Antes igyakan ni Jesus ito nga pag-ampo, nagsiring hiya nga kon nag-aampo, diri sadang uroutruhon an amo la gihap nga mga pulong. (Mateo 6:7) Kukontrahon ba ni Jesus ito nga iya ginsiring pinaagi ha paghatag hin pag-ampo nga pagmiminimoryahon ngan pag-iinuroutruhon? Diri! Lugod, igintutdo niya kon ano an sadang ig-ampo ngan kon ano an aton prayoridad kon nag-aampo. Aton usisahon an modelo nga pag-ampo nga nakarekord ha Mateo 6:9-13.

“Amay namon, nga aada ka ha langit, gindadayaw an imo ngaran.”

Hito nga mga pulong ginpahinumdom ni Jesus an iya mga sumurunod nga ha kada pag-aampo, sadang ito ipahinungod ha iya Amay, hi Jehova. Kondi kay ano nga importante an ngaran han Dios? Kay ano nga kinahanglan ito baraanon?

Tikang pa ha tinikangan han kasaysayan han tawo, ginpakaraot na an baraan nga ngaran han Dios. Gintawag ni Satanas, an kaaway han Dios, hi Jehova nga buwaon ngan hakog nga Magmarando nga waray katungod ha pagmando ha Iya mga linarang. (Genesis 3:1-6) Damu an dinapig kan Satanas. Nagtututdo hira nga waray Dios, ngan kon may-ada man, hiya waray pagtagad, madarahog, ngan naninimalos. Ginpasiparahan pa ngani han iba an Iya ngaran nga Jehova pinaagi ha pagkuha hito ha mga hubad han Biblia ngan igindiri pa ngani an paggamit hito.

Iginpapakita han Biblia nga tatadungon han Dios ito ngatanan nga kawaray-hustisya. (Esekiel 39:7) Hito nga paagi, matatagbaw an ngatanan nga imo panginahanglan ngan masusulbad an imo mga problema. Paonan-o? Babatunon ito han sunod nga bahin han pag-ampo ni Jesus.

“Kumanhi an imo ginhadian.”

Diri maaram an damu nga relihiyon yana kon ano an Ginhadian han Dios. Kondi sugad han hinbabaroan han mga mamarati ni Jesus, maiha na nga igintagna han mga propeta han Dios nga an Mesias, an Manluluwas nga pinili han Dios, magmamando hin Ginhadian nga magbabag-o han kahimtang han kalibotan. (Isaias 9:6, 7; Daniel 2:44) Babaraanon hito an ngaran han  Dios pinaagi ha pagbuhayhag han mga buwa ni Satanas ngan ha pagwara ha iya ngan ha iya mga buhat. Wawad-on hito an girra, sakit, gutom—bisan an kamatayon. (Salmo 46:9; 72:12-16; Isaias 25:8; 33:24) Salit kon nag-aampo ka nga kumanhi an Ginhadian han Dios, ha pagkamatuod nag-aampo ka nga matuman ito nga mga saad.

“Matuman an imo pagburut-an, sugad ha langit, amo man ha tuna.”

Iginpapakita han mga pulong ni Jesus nga an kaburut-on han Dios matutuman gud dinhi ha tuna sugad ha langit, diin nag-uukoy an Dios. Didto, waray mapugngi an Iya kaburut-on; an Anak han Dios nakig-away kan Satanas ngan ha iya mga demonyo ngan ginlabog hira ha tuna. (Pahayag 12:9-12) Sugad han duha nga bahin han modelo nga pag-ampo nga gin-unabi na, ini nga ikatulo nga bahin nabulig ha aton nga padayon nga magpokus ha kon ano an pinakaimportante—an kaburut-on han Dios, diri an aton. Kaburut-on niya nga maghingaopay an ngatanan nga linarang. Salit, bisan an hingpit nga hi Jesus nagsiring ha iya Amay: “Diri pagbuhaton an akon kaburut-on, kondi an imo.”—Lukas 22:42.

“Tagan mo kami niyan hin kan-on namon.”

Iginpapakita hini nga mga pulong ni Jesus nga puydi kita mag-ampo para han aton personal ngan pan-adlaw-adlaw nga panginahanglan. Diri sayop nga ig-ampo ito. Ha pagkamatuod, an pagbuhat hito nagpapahinumdom ha aton nga hi Jehova an “nahatag han ngatanan hin kinabuhi ngan pagginhawa ngan han ngatanan nga mga butang.” (Buhat 17:25) Iginhahayag han Biblia nga hiya an aton mahigugmaon nga kag-anak nga nalilipay ha paghatag ha aton, nga iya mga anak, han aton panginahanglan. Pero, pariho hin maopay nga kag-anak, diri niya iginhahatag an diri makakaopay ha aton.

“Pagwad-on mo an amon mga utang.”

May utang ka gud ba ha Dios? Kinahanglan mo ba an iya pagpasaylo? Damu yana an diri maaram kon ano an sala ngan kon mationan-o ito kaseryoso. Kondi, igintututdo han Biblia nga an sala an rason han dagku nga problema tungod kay ito an nangunguna nga rason kon kay ano nga namamatay kita. Tungod kay natawo nga makasasala, kita ngatanan agsob makasala, ngan an aton la paglaom para hin waray kataposan nga tidaraon nadepende ha pagpasaylo han Dios. (Roma 3:23; 5:12; 6:23) Maopay na la kay an Biblia nasiring: “Ikaw, Ginoo, maopay ngan andam ha pagpasaylo.”—Salmo 86:5.

“Diri mo kami pagdad-on ngadto ha panulay.”

Nasasantop mo ba kon kay ano nga kinahanglan mo gud an panalipod han Dios? Damu an diri natoo nga hi Satanas, an “panulay,” naeksister. Kondi igintutdo ni Jesus nga tinuod hi Satanas, gintawag pa ngani hiya nga an “prinsipe hini nga kalibotan.” (Juan 12:31; 16:11) Gin-impluwensyahan ni Satanas ini nga kalibotan nga kontrolado niya, ngan determinado hiya nga impluwensyahan ka basi diri ka magin duok ha imo Amay nga hi Jehova. (1 Pedro 5:8) Kondi, mas gamhanan hi Jehova kay kan Satanas ngan nalilipay Hiya ha pagpanalipod han mga nahigugma ha Iya.

Diri la inin importante nga mga punto han modelo nga pag-ampo ni Jesus an puydi iampo. Hinumdumi an siring han 1 Juan 5:14 mahitungod ha Dios: “Kon mangaro kita hin bisan ano nga bagay sumala ha iya kaburut-on, mamamati hiya ha aton.” Salit ayaw hunahunaa nga an imo problema diri tatagdon han Dios tungod la kay para ha imo gutiay la ito.—1 Pedro 5:7.

Kondi kumusta man an oras ngan lugar han aton pag-ampo, importante ba ito ha Dios?