Pag-ampo

1 Kay Ano?

PAG-AMPO. Usa ini han pipira la nga topiko ha Biblia nga nakakadani gud hin interes. Tagda an pito nga pakiana nga agsob igbangon may kalabotan ha pag-ampo, katapos uusisahon naton an mga baton han Biblia. Ini nga mga artikulo mabulig ha imo nga hibaroan kon ano an angay tagdon kon nag-aampo basi pamatian ito han Dios.

HA BUG-OS nga kalibotan, nag-aampo an mga tawo anoman an ira kultura ngan relihiyon. Nag-aampo hira nga nag-uusahan o sugad nga grupo. Nag-aampo hira ha singbahan, templo, sinagoga, moske, ngan ha atubangan hin altar. An iba nagamit hin prayer rug, rosaryohan, prayer wheel, imahen, libreta, o mga surubdan hin pag-ampo nga nakasurat ha gudtiay nga tabla.

Tungod han pag-ampo, naiiba an tawo ha hayop. Oo, damu an aton kaparihoan ha ira. Pariho ha ira, nagkikinahanglan kita hin pagkaon, hangin, ngan tubig. Ngan pariho ha ira, igin-aanak kita, nabubuhi, ngan namamatay. (Eklesiastes 3:19) Kondi tawo la an nag-aampo. Kay ano?

Bangin an pinakasimple nga baton, tungod kay kinahanglan naton mag-ampo. Aw, an pag-ampo kasagaran nga gintatagad nga paagi ha pakigkomunikar ha usa nga baraan, sagrado, ngan naeksister ha waray kataposan. An Biblia nasiring nga ginlarang kita nga may sugad nga hingyap. (Eklesiastes 3:11) Makausa, hi Jesu-Kristo nagsiring nga malipayon an mahunahunaon han ira espirituwal nga panginahanglan.—Mateo 5:3.

Espirituwal nga panginahanglan—may-ada ba iba nga hinungdan kon kay ano nga an mga tawo naghihimo hin mga imahen ngan mga singbahan, ngan nag-aampo hin hilaba? Oo, may mga tawo nga nasarig ha ira kalugaringon o ha iba basi matagbaw an ira espirituwal nga panginahanglan. Kondi, diri mo ba naaabat nga limitado la an nahihimo han tawo? Kita maluya, namamatay, ngan diri maaram han tidaraon. An usa nga mas maaramon, mas gamhanan, ngan naeksister ha waray kataposan an makakatagbaw la han aton panginahanglan. Pero, ano ini nga panginahanglan nga nag-aaghat ha aton nga mag-ampo?

Tagda ini: May panahon na ba nga nanginahanglan ka hin giya, kinaadman, o baton ha mga pakiana nga baga hin diri matugkad han tawo? Inabat mo na ba nga kinahanglan mo hin pagliaw han mamatayan ka, hin giya han nakurian ka pagdesisyon, o hin kapasayloan han nakaeksperyensya ka hin duro nga pagkasalaan?

Sumala ha Biblia, ito ngatanan makatadunganon nga hinungdan ha pag-ampo. An Biblia an pinakamasasarigan nga libro may kalabotan ha pag-ampo, ngan nakarekord dida hito an pag-ampo han damu nga magtinumanon nga tawo. Nag-ampo hira para hin pagliaw, giya, kapasayloan, ngan baton ha magkuri nga pakiana.—Salmo 23:3; 71:21; Daniel 9:4, 5, 19; Habakuk 1:3.

Bisan kon magkaiba-iba ito nga mga pag-ampo, may-ada ito ginkakaparihoan. An kada tagsa han nag-ampo maaram han sekreto ha pag-ampo nga ginpapamatian—an butang nga agsob igbalewaray han mga tawo yana. Maaram hira kon kan kanay sadang mag-ampo.