DAMU nga relihiyon an nakasentro ha pisikal nga aspekto han pag-ampo, sugad han posisyon, mga pulong, ngan rituwal. Pero, ginbubuligan kita han Biblia nga diri magpokus dida hito, lugod ha mas importante nga bahin han pakiana, “Paonan-o kita sadang mag-ampo?”

Iginpapakita han Biblia nga an magtinumanon nga surugoon han Dios nag-ampo ha iba-iba nga kahimtang ngan posisyon. Nag-ampo hira ha hilom o ha daku nga tingog, depende ha sitwasyon. An iba nahangad, an iba naduko. Imbes gumamit hin imahen, rosaryohan, o libreta, kinasingkasing nga nag-ampo hira ha ira kalugaringon nga mga pulong. Kay ano nga ginpamatian an ira pag-ampo?

Sugad han ginhisgotan ha nauna nga artikulo, nag-ampo hira ha uusa la nga Dios—hi Jehova. Kondi, may usa pa nga importante nga hinungdan. An 1 Juan 5:14 nasiring: “Ini amo an aton pagsarig ha iya, nga, kon mangaro kita hin bisan ano nga bagay sumala ha iya kaburut-on, mamamati hiya ha aton.” An aton pag-ampo kinahanglan uyon ha kaburut-on han Dios. Ano an karuyag sidngon hito?

Basi magin uyon ha kaburut-on han Dios an aton pag-ampo, sadang hibaroan naton an iya kaburut-on. Salit importante an pag-aram han Biblia. Nagpapasabot ba ito nga diri mamamati an Dios kon diri damu an aton hinbabaroan ha Biblia? Diri, kondi naglalaom hiya nga mangangalimbasog kita nga hibaroan an iya kaburut-on, hisabtan ito, ngan gumios uyon hito. (Mateo 7:21-23) Kinahanglan mag-ampo kita uyon ha aton hinbabaroan.

Samtang nahibabaro kita mahitungod kan Jehova ngan han iya kaburut-on, naghihilarom an aton pagtoo—usa pa nga importante nga bahin ha pag-ampo. Hi Jesus nagsiring: “Ngatanan nga bagay nga iyo pangangaroon ha pag-ampo, kon kamo may pagtoo, iyo makakarawat.” (Mateo 21:22) Diri ini nagpapasabot nga tungod la kay may pagtoo ka, basta ka na la natoo nga waray basihan. Lugod, nagpapasabot ini hin pagtoo ha usa nga butang nga bisan kon diri nakikita, may marig-on nga ebidensya. (Hebreo 11:1) An Biblia puno hin ebidensya nga hi Jehova—bisan kon diri nakikita—tinuod, masasarigan, ngan andam ha pagbaton han pag-ampo han may pagtoo ha iya. Dugang pa, makakahangyo kita kan Jehova nga dugangan an aton pagtoo, ngan nalilipay hiya ha paghatag han aton ginkikinahanglan.—Lukas 17:5; Jakobo 1:17.

Iini an usa pa nga importante nga bahin kon paonan-o mag-aampo. Hi Jesus nagsiring: “Waray  bisan hin-o nga maabot ha Amay, kon diri maagi ha akon.” (Juan 14:6) Salit hiya an dalan basi makadaop kita ha Amay, hi Jehova. Tungod hito, ginsidngan ni Jesus an iya mga sumurunod nga mag-ampo ha iya ngaran. (Juan 14:13; 15:16) Diri ito nagpapasabot nga sadang kita mag-ampo kan Jesus. Lugod, sadang kita mag-ampo ha ngaran ni Jesus, nga nahihinumdom nga hiya an rason nga nakakadaop kita ha aton hingpit ngan baraan nga Amay.

Makausa, naghangyo an duok nga mga sumurunod ni Jesus: “Ginoo, tutdui kami pangamuyo.” (Lukas 11:1) Matin-aw diri hira nagpapatutdo han mga butang nga aton pa la ginhisgotan. Lugod, baga hin karuyag la nira hibaroan kon, ‘Ano an sadang ig-ampo?’