Pag-ampo

2 Kan Kanay?

UUSA la ba an gindadangatan han ngatanan nga pag-ampo bisan kon iba-iba an gin-aampoan han mga tawo? Ini an gintotoohan han kadam-an yana. Ngan nauyon hini an mga natoo nga kinakarawat han Dios an ngatanan nga relihiyon bisan pa han pagkaiba-iba hito. Kondi, husto ba hira?

An Biblia nasiring nga damu han pag-ampo an diri para ha tinuod nga Dios. Bisan ha panahon han ginsurat an Biblia, komon an pag-ampo ha mga imahen. Pero pauroutro nga nagpahamangno an Dios kontra hito. Pananglitan mahitungod ha mga imahen, an Salmo 115:4-6 nasiring: “May-ada hira mga talinga, kondi diri nabati.” Kon sugad, kay ano nga mag-aampo ka man ha dios nga diri nakakabati ha imo?

Usa nga asoy ha Biblia an nagpapatin-aw hini. Gin-ayat han tinuod nga propeta nga hi Elias an mga propeta ni Baal nga mag-ampo ha ira dios, kondi hiya, ha iya Dios. Nagsiring hiya nga an mabaton amo an tinuod nga Dios ngan an diri, amo an buwa. Inuyon an mga propeta ni Baal, salit nag-inampo hira hin maiha ngan nagsininggit pa ngani—pero waray may bumaton ha ira! An asoy nasiring: ‘Waray bisan ano nga binaton, o waray [bisan] ano nga nagtagad.’ (1 Hadi 18:29) Pero, kumusta man an pag-ampo ni Elias?

Katapos niya mag-ampo, binaton dayon an iya Dios pinaagi ha pagpadara hin kalayo tikang ha langit basi lamuyon an iya halad. Kay ano nga ginbaton an iya pag-ampo? Makikita an baton ha iya mismo pag-ampo nga nakarekord ha 1 Hadi 18:36, 37. Halipot adto nga pag-ampo—mga 30 la nga pulong ha orihinal nga Hebreo. Kondi, bisan kon halipot la, tulo ka beses nga gintawag ni Elias an Dios ha Iya personal nga ngaran nga Jehova.

Hi Baal, nga an ngaran nangangahulogan hin “tag-iya” o “agaron,” an dios han mga Kanaanhon; ngan may mga dios ha iba nga mga lugar nga tinatawag gihap nga Baal. Kondi, an ngaran nga Jehova naiiba tungod kay ha bug-os nga uniberso uusa la an nagtatag-iya hito. Ini nga Dios nasiring ha iya katawohan: “Ako hi Jehova, amo ito an akon ngaran; ngan an akon himaya diri ko ihahatag ha iba.”—Isaias 42:8.

Uusa la ba an gindangatan han pag-ampo ni Elias ngan han pag-ampo han mga propeta ni Baal? An pagsingba kan Baal nagwawara han dignidad han mga tawo tungod kay may-ada ito rituwal nga prostitusyon ngan paghalad hin mga tawo. Ha kabaliktaran, an pagsingba kan Jehova naghahatag hin dignidad ha iya katawohan, an Israel, tungod kay nakalikay hira ha sugad nga magraot nga buhat. Salit hunahunaa la: Kon magpapadara ka hin surat ha imo respetado nga sangkay, naglalaom ka ba nga mahingangadto  ito ha usa nga an ngaran ngan adres iba gud han imo sangkay? Diri gud!

Kon nag-aampo ka kan Jehova, nag-aampo ka ha Maglalarang, an Amay han katawohan. a “Ikaw, O Jehova, amo an amon Amay,” siring ni propeta Isaias ha iya pag-ampo. (Isaias 63:16) Kon sugad, ini an Usa nga ginhihisgotan ni Jesus han hiya nagsiring ha iya mga sumurunod: “Ako masaka ngadto ha akon Amay, ngan ha iyo Amay, ngan ha akon Dios, ngan ha iyo Dios.” (Juan 20:17) Hi Jehova an Amay ni Jesus. Hiya an Dios nga gin-ampoan ni Jesus ngan an iya igintutdo ha iya mga sumurunod nga sadang tawagon kon hira nag-aampo.—Mateo 6:9.

Gintututdoan ba kita han Biblia nga mag-ampo kan Jesus, kan Maria, ha mga santo, o ha mga anghel? Diri—kondi kan Jehova la. Kay ano? Siyahan, an pag-ampo usa nga paagi han pagsingba, ngan an Biblia nasiring nga hi Jehova gud la an sadang singbahon. (Eksodo 20:5) Ikaduha, an Biblia nasiring nga Hiya an ‘Parapamati han pag-ampo.’ (Salmo 65:2) Waray gud Niya itapod ini ha bisan hin-o, bisan kon igintatapod Niya ha iba an damu nga responsabilidad. Hiya an Dios nga nagsasaad nga Hiya mismo an mamamati han aton pag-ampo.

Salit, kon karuyag mo pamatian han Dios an imo pag-ampo, hinumdumi ini: “Bisan hin-o nga magtawag han ngaran ni Jehova maluluwas.” (Joel 2:32) Kondi, pinamamatian ba ni Jehova an ngatanan nga pag-ampo? O may-ada pa ba kita kinahanglan hibaroan basi pamatian niya an aton pag-ampo?

[Footnote]

[Retrato ha pahina 5]

Napamatud-an han ayat ni Elias ha mga propeta ni Baal nga diri uusa la an gindadangatan han ngatanan nga pag-ampo