Mabubungkag ba an Tuna?

“AN KABUNGKAGAN han tuna usa nga topiko nga pirme gud nakakakuha han interes, labi na ha mga pelikula.” Ito an siring han kolumnista nga hi John Scalzi. Kay ano nga naiinteres an mga tawo ha mga sine mahitungod han kabungkagan han kalibotan? “Tungod kay iginhahayag hito an aton ginkakahadlokan,” siring ni Scalzi. Nauyon ka ba hito? May-ada ba kita makatadunganon nga mga hinungdan nga mahadlok kon paonan-o ngan kon san-o an tuna—ngan an ngatanan nga kinabuhi dida hito—mabubungkag?

Haros kada adlaw, hinbabatian naton an mahitungod han natural nga mga kalamidad nga nakakadaot ha iba-iba nga lugar. An mga video hito pauroutro-utro nga nakikita ha TV ngan Internet. Kon pirme kita napapalibotan hin aktuwal nga mga tawo ngan mga lugar nga nadadaot, masayon hunahunaon nga an kabungkagan han kalibotan aktuwal nga tarhog ngan diri hinimo-himo la han pelikula.

An mga syentista naghimo hin mga teoriya kon paonan-o mabubungkag an tuna nga nakadugang ha kahadlok han mga tawo. Ginbanabana pa ngani han iba an petsa hito. Han Marso 2008, an Monthly Notices of the Royal Astronomical Society nagsiring nga duha nga astronomo an nagbanabana nga ha mga 7.59 bilyon ka tuig, hihigupon han adlaw an tuna ngan tutunawon ito.

Maabot gud ba an panahon nga mabubungkag an tuna?

May-ada ba Petsa kon San-o Mabubungkag an Aton Planeta?

An Biblia nagpapasarig: “An mga henerasyon naabot ngan an mga henerasyon nalabay, kondi an tuna magpapabilin ha waray kataposan.” (Eklesiastes 1:4, New International Version) ‘Iginbutang [ni Jehova nga Dios] an mga karig-onan han tuna,’ ngan gindisenyo ito nga magpabilin “ha waray kataposan.” (Salmo 104:5) Sobra gud ba kaopay ini nga giniyahan nga mga pulong han Dios salit imposible na mahitabo? Kay ano nga sadang ka tumoo nga an tuna diri mabubungkag, bisan kon may mga syentista nga nasiring nga mabubungkag ito?

Pananglitan, an mga produkto ha estante hin tindahan. An pipira hito may expiration date. Hin-o an nagbutang hito? Ginbanabana la ba ito han tindera uyon han iya eksperyensya? Diri! An naghimo han produkto amo an nagbutang hito. Natoo kita hito tungod kay an naghimo hito mas maaram han produkto kay ha bisan hin-o. Ha sugad nga paagi, sadang liwat kita sumarig ha Naghimo han aton planeta! An iya Pulong matin-aw nga nasiring nga iya “gintukod an tuna” basi magpabilin ha waray kataposan. Waray gud ito expiration date!—Salmo 119:90.

Kondi, posible ba madaot an tuna ha kadayonan han mga tawo nga diri naghihingyap ha pagtipig hito? Diri gud! Diri pariho ha tawo nga manufacturer, hi Jehova “makakabuhat han ngatanan.” (Job 42:2) Salit, makakapasarig gud hiya: ‘Maaamo man an akon pulong nga magawas ha akon baba ini mauswag.’ (Isaias 55:11) Makakasiguro kita nga waray tutugotan an “aton Magburuhat” nga may makaulang ha pagtuman han iya katuyoan para ha tuna. (Salmo 95:6) Ano ito nga katuyoan, ngan paonan-o niya tutumanon ito?

Tutumanon han Ginhadian han Dios an Iya Katuyoan

Dugang pa ha pagpasarig nga an tuna diri mabubungkag, an Biblia nasiring liwat nga Iya ‘ginhitsura ini [basi] pag-ukyan.’ (Isaias 45:18) Bisan kon gin-uukyan na ito ha sulod hin yinukot na ka tuig, diri pa hito natutuman an katuyoan han Dios.

Hi Jehova “malipayon nga Dios” ngan ‘nahigugma ha katadongan.’ (1 Timoteo 1:11, NW; Salmo 37:28) Katuyoan niya nga an mga tawo mag-ukoy nga malipayon ha tuna nga may hustisya.  Basi matuman an iya katuyoan, iya igintagna nga magtutukod hiya hin Ginhadian ha langit nga magmamando ha bug-os nga tuna. (Daniel 2:44) Salit han nakanhi pa hi Jesus ha tuna, pirme hiya naghihisgot mahitungod han Ginhadian han Dios. Iya gin-aghat an iya mga disipulo nga pangaroon ito ha pag-ampo tungod kay maaram hiya han mga bendisyon kon an tuna magin sakop na hito. (Mateo 6:9, 10; 24:14) Ano an pipira hito?

▪ Magkakaada kamurayawan ngan kasigurohan ha bisan diin tungod kay nagsaad an Dios nga mawawaray na girra.—Salmo 46:9.

▪ Magkakaada hura nga pagkaon para ha ngatanan.—Salmo 72:16.

▪ Diri na magigin problema an kahimsog tungod kay waray na ‘umurukoy nga masiring: Ako masakit.’—Isaias 33:24.

▪ Waray na magmiminatay tungod kay “mawawaray na kamatayon.”—Pahayag 21:4.

▪ Nagsasaad an Dios nga an iya katawohan magtutukod han ira kalugaringon nga balay, magkikinabuhi nga may seguridad, ngan ‘magrarayhak’ ha kadayonan.—Isaias 65:17-24.

Waray ruhaduha nga naghahandom ka ha pagpahimulos han mga kahimtang nga ginhisgotan pa la. Hi Jehova naghihingyap gud ha pagtuman han ngatanan nga iya igintagna. (Isaias 9:6, 7) Kondi bangin ka magpakiana: ‘Yinukot ka tuig na an naglabay tikang han ginsurat ha Biblia an mga saad han Dios, pero kay ano nga waray pa ito katutuman?’

An Pagpailob han Dios Mahimo Magtugway ha Kaluwasan

Makakasiguro kita nga hi Jehova “diri mag-aalang mahitungod ha iya saad.” Iginpapakita han Biblia nga an Dios mahigugmaon nga nagpapailob ha aton. Salit, gin-aaghat kita ha paghunahuna nga ‘an pagkamapailubon han Ginoo amo an kaluwasan.’ (2 Pedro 3:9, 15) Kondi kay ano nga importante para ha aton kaluwasan an pagpailob han Dios?

Siyahan, maaram an Dios nga antes niya maitagana ha magtadong nga tawo an may kasigurohan ngan maopay nga urukyan, kinahanglan niya ‘hibangon an naghihibang han tuna.’ (Pahayag 11:18) Kondi, tungod kay hinigugma niya an mga tawo, “diri [niya] buot nga may-ada mawara.” Salit, hiya mapailubon nga ‘nagpapahamangno ha maraot tikang ha maraot nga paagi.’ Tungod hito, iginsusugo han Dios an pagsangyaw han Ginhadian ha bug-os nga kalibotan. * (Esekiel 3:17, 18) An ngatanan nga nakarawat han iya pahamangno ngan nagkikinabuhi uyon ha iya magtadong nga prinsipyo makarawat hin kaluwasan ngan kinabuhi nga waray kataposan ha paraiso nga tuna.

Dangop ha Dios Ngan Maluwas

Oo, an Biblia may-ada “Maopay nga Sumat.” (Mateo 24:14) Nagsusulod ito han diri mapapakyas nga pulong han Dios nga an tuna diri gud mabubungkag! Dugang pa, sumala ha mga tagna hito, makakasarig kita nga ha ‘diri maiha, an magraot pagwawad-on.’ Hito nga takna, an magtadong la an “makakapanunod han tuna, ngan maglilipay hira tungod han kahuraan han kamurayaw.” (Salmo 37:9-11, 29; Mateo 5:5; Pahayag 21:3, 4) Tubtob hito nga panahon, an Dios padayon nga mapailubon nga magtatawag: “Balik kamo ngadi ha akon yana ngan matatalwas kamo, mga tawo ha bug-os nga kalibotan!” (Isaias 45:22, Maopay nga Sumat) Kakarawaton mo ba ito?

Kay ano nga diri magin determinado nga magpasakop ha Dios? An Salmo 37:34 nagsasagda: “Paghulat kan Jehova, ngan pagbantayi iton iya dalan, ngan igpapahitaas ka niya basi ka makapanunod han tuna.” An mga Saksi ni Jehova malilipay pagbulig ha imo nga mahibaro hin dugang pa mahitungod han waray kataposan nga katuyoan han Dios para ha tuna ngan kon paonan-o ka maluluwas ngan makakaeksperyensya han katumanan hito.

[Footnote]

[Ginkuhaan han mga Retrato ha pahina 22]

NASA photo