Mabubuligan ba han mga Patay an mga Buhi?

HI Tamba, usa nga batan-on nga lalaki nga taga-Weste nga Aprika, hirani na kumuha hin eksamin ha eskwelahan. * An iya nanay nag-insister nga nanginginahanglan hiya hin bulig han ira patay na nga mga kapamilya basi makapasar. Ha Palermo, Sicily, damu nga turista an nabisita ha underground nga mga lubnganan diin makikita an nakapreserba nga ginatos nga patay. An iba natoo nga ini nga mga mummy nagtatagana hin panalipod han Dios ha mga buhi. Kada tuig, nabisita an mga tawo ha Lily Dale, usa nga bungto ha weste han New York State, E.U.A., nga kilala tungod han damu hinduro nga espiritista nga naukoy didto. Damu han nabisita didto an naglalaom nga ira makakaistorya an ira patay na nga kapamilya ngan kasangkayan ngan makakapabulig ha ira.

Ha bug-os nga tuna, kalyap an pagtoo nga an patay makakabulig ha buhi. Ano an imo opinyon mahitungod hini? Bangin natutdoan ka hito o duok ka ha usa nga natoo hito. Oo, natural la nga maghandom ha mga hinigugma nga patay na. Ngan an mga espiritista nagpapasarig ha pagtagana hito nga panginahanglan. Usa nga espiritista nga ginkotar ha Time nga magasin nasiring nga an mga espiritu “andam ha pagbulig kon gintatawag hira.” Tinuod ba ito? Mahimo gud ba buligan han mga patay an mga buhi? Bangin mahipausa ka ha matin-aw nga baton han Biblia.

Buhi ba an mga Patay ha Iba nga Lugar?

Iginsasaysay han Biblia ha simple, masayon masabtan nga mga pulong an kahimtang han patay. Tigamni an ginsisiring han Eklesiastes 9:5: “An mga buhi maaram nga hira mapatay: kondi an mga patay diri maaram han bisan ano.” May emosyon pa ba an mga patay? An bersikulo 6 nabaton: “An ira gugma, an ira pagdumot ngan an ira kaawa, nahanaw ha maiha na; waray na man hira bahin han bisan ano ha sirong han adlaw.” Tigamni liwat nga an bersikulo 10 nasiring: “Waray buruhaton, o paghunahuna, o hibaro, o kinaadman, didto ha Sheol, ngain ikaw kakadto.” An Hebreo nga pulong nga “Sheol” hini nga bersikulo nangangahulogan hin komon nga lubnganan han tawo. Makapainteres nga an Griego nga katugbang hito nga pulong, “Hades,” gin-gamit ha Biblia basi ipakita kon diin kumadto hi Jesu-Kristo ha sulod hin pipira ka panahon han hiya namatay.—Buhat 2:31.

Damu an ginbuligan ni Jesus han buhi pa hiya, kondi maaram hiya nga kinahanglan hiya mamatay. Naghunahuna ba hiya ha pagbulig pa ha mga tawo kon patay na hiya? Waray. Iya iginpariho an iya tiarabot nga kamatayon ha kagab-ihon diin waray na ginhihimo nga trabaho. (Juan 9:4) Maaram gud hiya nga kon umundang na an kinabuhi han mga tawo, patay na hira.—Isaias 26:14.

Ginamit liwat hi Jesus hin pagtanding nga nagpapabug-at hin pariho nga punto. Han namatay an iya sangkay nga hi Lasaro, iya iginpariho an kamatayon ha pagkaturog. (Juan 11:11-13) Diri kita naglalaom hin bulig ha tawo nga nakaturog, diri ba? An nakaturog waray sarabotan, diri makakabulig ha bisan hin-o.

May Bahin ba ha Lawas nga Diri Napatay?

Damu an natutdoan nga an kalag diri nakikita nga dagaw nga diri napatay. Kondi iba an gintututdo han Biblia. Ginpapatin-aw han siyahan nga libro han Biblia, ha Genesis 2:7 nga han  ginlarang an siyahan nga tawo, hiya “nahimo nga buhi nga kalag.” An mga tawo ha kabug-osan kalag, sugad man an mga hayop. (Genesis 1:20-25) Salit makatadunganon hunahunaon nga kon an tawo o hayop napatay, an kalag napatay liwat—ini an ginparig-on han Biblia.—Esekiel 18:4.

Kondi, bangin may magpakiana, ‘Kay ano man nga may mga istorya mahitungod hin mga tawo nga nakaistorya hin mga patay, nakabati han ira tingog, o nakakita pa ngani ha ira?’ Ito nga mga istorya komon ha damu nga bahin han kalibotan. Nakahatag ito hin paglaom ha nasusubo nga kapamilya o duok nga kasangkayan, nag-aaghat ha damu nga komunsulta ha espiritista nga nasiring nga nakakaistorya kuno nira an patay.

Tinuod ba ito nga mga istorya? Kon tinuod ito, diri ba ito supak ha mga punto ha Biblia nga aton ginhisgotan na? Hi Kristo Jesus nagsiring nga an Biblia, an Pulong han Dios kamatuoran. (Juan 17:17) An kamatuoran diri nagkakasumpaki. Ha pagkamatuod, matin-aw nga naggigiya ito kon paonan-o sadang tagdon an mga istorya nga an mga patay mahimo makabulig ha mga buhi. Nagsusumat ito mahitungod hin usa nga nagsari pangaro hin bulig ha patay. An pagbasa hito magpapatin-aw kon ano an tinuod.

An Hadi nga Nangaro hin Bulig ha Patay

Hi Hadi Saul ngan an iya kasundalohan gin-atake han kusgan nga militar nga mga Pilisteohanon ha patag-awayan ha norte nga Israel. Han makita niya an kampo han mga Pilisteohanon, “an iya kasingkasing nagkurog hinduro.” Hito nga panahon han iya paghadi, diri na hiya nagsisingba ha Dios. Salit, diri na ginbabaton ni Jehova an iya pag-ampo. Kan kanay hiya mangangaro hin bulig? Patay na an propeta han Dios nga hi Samuel.—1 Samuel 28:3, 5, 6.

Nangaro hi Saul hin giya tikang ha espiritista ha En-dor. Naghangyo hiya hito nga banhawon hi Samuel. Salit ginpatawag han espiritista an patay na nga hi Samuel. Ini nga “Samuel” nagsiring kan Saul nga magdadaog an mga Pilisteohanon ngan mamamatay hiya ngan an iya mga anak ha patag-awayan. (1 Samuel 28:7-19) Hi Samuel gud ba ito nga nabanhaw tikang ha mga patay?

Hunahunaa ini. An Biblia nasiring nga kon an tawo mamatay, hiya ‘mabalik ha tuna’ ngan an iya “mga hunahuna nawawara.” (Salmo 146:4) Hira Saul ngan Samuel maaram nga ginkukondenar han Dios an pakiistorya ha espiritista. Aw, hi Saul pa ngani an nanguna ha pagpoo ha mga buhat han mga espiritista!—Lebitiko 19:31.

Handurawa ini. Kon an matinumanon nga hi Samuel buhi pa gihapon sugad nga espiritu, tatalapason ba niya an balaud han Dios ngan makikigkooperar ha espiritista basi makaistorya hi Saul? Hi Jehova nagdumiri ha pakiistorya kan Saul. Mahimo ba mapwersa hin espiritista an Makagarahum-ha-ngatanan nga Dios ha pakiistorya kan Saul pinaagi han patay na nga hi Samuel? Diri. Matin-aw, ini nga “Samuel” diri an matinumanon nga propeta han Dios. Usa ito nga espiritu—usa nga demonyo nga nagpakunokuno nga an patay nga hi Samuel.

An mga demonyo mga anghel nga nagrebelde ha awtoridad han Dios ha tinikangan han kasaysayan. (Genesis 6:1-4; Judas 6) Naoobserbahan hini nga mga demonyo an mga tawo samtang buhi hira; maaram an mga demonyo kon paonan-o an kada tagsa nayakan ngan nagios. Disidido hira nga ipasarang nga buwa an ginsisiring  han Biblia. Salit diri urusahon nga igdiri han Biblia an pakiistorya ha ira! (Deuteronomio 18:10-12) Aktibo pa gihapon inin magraot nga espiritu.

Yana nasasabtan naton kon kay ano nga damu an nag-iistorya mahitungod ha “pakabati” o “pakakita” han ira mga hinigugma nga patay na. Bisan kon bangin hunahunaon nga may kapulsanan ito usahay, an magraot nga espiritu determinado ha paglimbong ha mga tawo. * (Efeso 6:12) Dugang pa, hunahunaa ini: Mahigugmaon nga Dios hi Jehova nga napaid ha aton. Kon an mga patay buhi ha iba nga lugar ngan mahimo makabulig ha ira kasangkayan ngan kapamilya, igdidiri ba han mahigugmaon nga Maglalarang an sugad nga komunikasyon ngan tagdon ito sugad nga durumtanan? Diri gud! (1 Pedro 5:7) Kon sugad, may-ada ba kita makukuhaan hin masasarigan nga bulig?

Tinuod nga Bulig Para ha mga Buhi Ngan mga Patay

Hinsabtan naton tikang ha aton ginhisgotan na nga an patay waray mahihimo ha pagbulig ha buhi. Dugang pa, diri la kay waray kapulsanan an pangalimbasog ha pangaro hin bulig ha ira kondi mas maraot pa gud an resulta hito; peligroso gud ito, tungod kay supak ito ha balaud han Dios ngan nagpapahirani ha aton ha impluwensya han demonyo.

An Biblia naggigiya ha aton ha gimaopayi nga Burabod han bulig—an aton Maglalarang, hi Jehova. Mahimo kita niya luwason tikang ha kamatayon mismo. (Salmo 33:19, 20) Yana, andam hiya ha pagbulig ha aton. Salit nagtatagana hiya hin tinuod nga paglaom, diri pariho ha palso nga paglaom nga iginhahatag han mga espiritista.

Hi Tamba, nga ginhisgotan ha tinikangan, personal nga nahibaro han kaibahan han palso nga paglaom nga igintatagana han mga espiritista ngan han kamatuoran nga iginhahatag ni Jehova. Ginsidngan hiya han mga espiritista nga kon diri hiya maghalad ha iya patay nga kaapoy-apoyan, diri hiya mapasar. Hito nga panahon, nag-aaram na hi Tamba han Biblia ha mga Saksi. Hinbaroan niya an tinuod nga kahimtang han patay ngan han maraot nga gintitikangan hadton nagpapakunokuno nga patay nga kaapoy-apoyan. Bisan kon ginpipirit hiya han iya nanay nga mangaro hin bulig ha espiritista, nagdumiri hiya ngan siniring, “Kon diri ako pumasar, maniniguro ako ha sunod nga tuig.”

Ano an resulta? Nauna hiya pakatapos han eksamin! Nahipausa an iya nanay, nawarayan pagsarig ha mga espiritista, ngan waray na gud maghisgot ha paghalad ha kaapoy-apoyan. Hinbaroan ni Tamba nga gindidid-an kita ni Jehova ha pangaro hin bulig ha mga patay. (Isaias 8:19) An pag-aram ha Biblia nakahatag ha iya hin pagsarig nga kon susundon niya an balaud han Dios, maglalampos hiya.—Salmo 1:1-3.

Kondi, kumusta man an aton patay na nga mga hinigugma ? Waray na ba hira paglaom? Dugang pa ha pagbulig ha mga buhi, nagsasaad liwat hi Jehova ha pagbulig ha mga patay. Katapos ihulagway an pagkawaray-mahihimo han mga patay, tigamni an ginsiring ni propeta Isaias ha kapitulo 26, bersikulo 19: “An imo mga patay mabubuhi; . . . Pagmata ngan pagkanta, kamo nga nag-uukoy ha tapotapo.” Nagdugang ito nga an mga patay mabubuhi utro.

Handurawa ito! An binilyon nga waray nahihimo ngan nangangaturog nga patay babanhawon! Oo, an Biblia nasiring nga gin-uungara ni Jehova an pagbanhaw ha ira. (Job 14:14, 15) Imposible ba ito? Diri, tungod kay iginhulagway na ngani ni Jesu-Kristo an mga patay sugad nga buhi na para kan Jehova.—Lukas 20:37, 38.

Karuyag mo ba magkaada sugad nga paglaom? * Padayon ha pagkuha hin husto nga kahibaro ha Biblia. Samtang nag-aaram ka, makukombinse ka nga hi Jehova makakabulig ha mga buhi ngan ha mga patay, ngan an iya mga saad “magtinumanon ngan mga totoo.”—Pahayag 21:4, 5.

[Mga footnote]

[Blurb ha pahina 19]

Natural la an paghandom ha aton mga hinigugma nga patay na

[Retrato ha pahina 20]

Hi propeta Samuel ba an binalik tikang ha mga patay ngan nakig-istorya kan Hadi Saul?