1, 2. Ha ultimo nga gab-i han kinabuhi ni Jesus ha tuna, ano nga leksyon an iya igintutdo ha iya mga apostol?

ULTIMO adto nga gab-i han kinabuhi ni Jesus ha tuna, ngan kaupod niya an iya mga apostol ha kwarto ha igbaw han usa nga balay ha Jerusalem. Han nangangaon hira, binuhát hi Jesus, ginhukas an iya pantungbaw nga bado, ngan nagtapis hin tualya. Katapos ginbutangan niya hin tubig an planggana ngan ginhimsawan an mga disipulo ngan gintrapohan han tualya an ira mga tiil. Kahuman hito, iginsul-ot niya utro an iya pantungbaw nga bado. Kay ano nga ginbuhat ni Jesus iton ubos nga buruhaton?—Juan 13:3-5.

² Hi Jesus mismo nagsiring: “Maaram ba kamo kon ano an akon ginbuhat ha iyo? . . . Kon ako an Ginoo, ngan an Magturutdo, nga nanmusa han iyo mga tiil, kamo kinahanglan man, nga magpinusaay han mga tiil han usa kag usa. Kay akon kamo tinagan hin susbaran nga sugad han akon ginbuhat, iyo man buhaton.” (Juan 13:12-15) Pinaagi han kinaburut-on nga pagbuhat hinin ubos nga buruhaton, gintutdoan ni Jesus an iya mga apostol hin leksyon nga diri gud nira hingangalimtan ngan makakaaghat ha ira nga magin mapainubsanon ha urhi.

3. (a) Ha duha nga higayon, paonan-o ginpabug-atan ni Jesus kon ano kaimportante an pagin mapainubsanon? (b) Ano an hihisgotan hini nga artikulo?

³ Han ginhimsawan ni Jesus an iya mga apostol, diri ito an siyahan nga higayon nga iya ginpabug-atan kon ano kaimportante an pagin mapainubsanon. Antes hito, han an pipira nga apostol naglantugi kon hin-o ha ira an labaw, nagkuha hi Jesus hin bata ngan ginpatukdaw ha iya sapit, ngan nagsiring ha ira: “Kon hin-o an kumarawat hini nga bata ha akon ngaran, nakarawat ha akon: ngan kon hin-o an kumarawat ha akon, nakarawat han nagpakanhi ha akon; kay an guroguti ha iyo ngatanan, ini amo an daku.” (Luk. 9:46-48) Tungod kay  maaram hi Jesus nga karuyag han mga Pariseo magin prominente, ha urhi hiya nagsiring: “An ngatanan nga nagpapakahitaas, mahiuubos; ngan an nagpapaubos, mahihitaas.” (Luk. 14:11) Matin-aw nga karuyag ni Jesus nga magin mapainubsanon an iya mga sumurunod, diri mapahitas-on o arogante. Usisahon naton hin maopay an iya susbaranan ha pagkamapainubsanon basi masubad naton hiya. Hihisgotan liwat naton kon paonan-o ini nga kalidad mapulsanon diri la ha nagpapakita hito kondi pati liwat ha iba.

4. Paonan-o iginpakita han Anak han Dios an pagkamapainubsanon antes hiya kumanhi ha tuna?

⁴ An Anak han Dios nagpakita hin pagkamapainubsanon bisan antes pa hiya kumanhi ha tuna. Ha langit, kaupod niya an iya langitnon nga Amay hin maiha hinduro nga panahon. Iginsaysay ha libro han Biblia nga Isaias an duok nga relasyon han Anak ha iya Amay, nasiring: “An Ginoo hi Jehova naghatag ha akon han dila nira nga gintutdoan, nga ako mahibaro kon inoonan-o an pag-alang-agang pinaagi hin mga pulong ha iya nga ginugol-an: hiya namata ha ikinaaga, hiya nagpupukaw han akon talinga ha pamati sugad ha ira nga gintututdoan. An Ginoo nga hi Jehova nag-abri han akon talinga, ngan ako waray magmasukihon, waray man ako umisol.” (Isa. 50:4, 5) Iginpakita han Anak han Dios an pagkamapainubsanon ngan namati hin maopay ha igintutdo ha iya ni Jehova. Karuyag gud niya magpatutdo ha tinuod nga Dios. Sigurado nga naobserbaran gud niya an pagkamapainubsanon ni Jehova ha pagpakita hin kalooy ha makasasala nga katawohan!

5. Sugad nga hi Miguel nga arkanghel, paonan-o hi Jesus nagpakita hin susbaranan ha pagkamapainubsanon ngan pagkarawat hin limitasyon ha iya pagtratar ha Yawa?

⁵ Diri ngatanan nga anghel mapainubsanon pariho han Anak han Dios. An anghel nga nagin Satanas nga Yawa nadiri pagpatutdo kan Jehova. Nagin mapahitas-on hiya ngan inabat nga mas importante hiya ha iba. Kabaliktaran gud ito han pagkamapainubsanon. Tungod hito nagrebelde hiya kan Jehova. Ha luyo nga bahin, hi Jesus waray maghingyap hin dugang nga katungdanan ha langit ngan diri liwat niya karuyag gamiton an iya awtoridad ha sayop nga paagi. Pananglitan, sugad nga hi Miguel nga arkanghel, han ‘nakig-away hiya ha yawa tungod ha lawas ni Moises,’ waray hiya magbuhat hin labaw ha iya awtoridad. Lugod, iginpakita niya an pagkamapainubsanon ngan ginkarawat an iya limitasyon. Nalipay hiya paghulat kan Jehova, an Supremo nga Hukom han uniberso, nga sulbaron ito ha Iya paagi ngan panahon.—Basaha an Judas 9.

6. Paonan-o iginpakita ni Jesus an pagkamapainubsanon ha pagkarawat han toka nga magin Mesias?

⁶ Antes hi Jesus kumanhi ha tuna, sigurado nga maaram na hiya han ngatanan nga tagna mahitungod han mahitatabo ha iya sugad nga Mesias. Salit posible gud nga maaram hiya nga daan nga mag-aantos hiya. Bisan pa hito, ginkarawat niya an toka nga mabuhi ha tuna ngan mamatay sugad nga an iginsaad nga Mesias. Kay ano? Ha pagpabug-at han pagkamapainubsanon han bugtong nga Anak han Dios, hi apostol Pablo nagsurat: “Ha dagway han Dios, waray niya pag-isipa an hinugad han Dios, butang nga aragawon, kondi gin-ula niya an iya kalugaringon, nga nagpariho hin dagway han uripon, kay ginhimo nga ladawan han mga tawo.”—Fil. 2:6, 7.

7, 8. Ha ano nga mga paagi iginpakita ni Jesus an pagkamapainubsanon han bata pa hiya ngan ha iya ministeryo?

⁷ Hi Pablo nagsurat nga han “sugad na [hi Jesus] ha bayhon han tawo, nagpaubos hiya ha iya ngahaw, nga nagmasinugtanon tubtob ha kamatayon.” (Fil. 2:8) Tikang ha kabata ni Jesus, nagpakita hiya hin susbaranan ha pagkamapainubsanon. Bisan kon ginpadaku hiya hin mga kag-anak nga diri hingpit—hira Jose ngan Maria—mapainubsanon nga “nagpasakop hiya ha ira.” (Luk. 2:51) Maopay gud hiya nga susbaranan ha mga batan-on, nga bibendisyonan han Dios tungod han ira kinaburut-on nga pagpasakop ha ira mga kag-anak!

 ⁸ Sugad nga adulto, iginpakita ni Jesus an pagkamapainubsanon pinaagi han pag-una han kaburut-on ni Jehova. (Juan 4:34) Ha ministeryo ni Jesu-Kristo, iya gin-gamit an ngaran han Dios ngan ginbuligan an sinsero nga mga tawo nga magkaada husto nga kahibaro mahitungod han mga kalidad ni Jehova ngan han Iya katuyoan para ha katawohan. Nagkinabuhi liwat hiya uyon ha iya igintutdo mahitungod kan Jehova. Pananglitan, ha modelo nga pag-ampo, ini an siyahan nga gin-unabi ni Jesus: “Amay namon, nga aada ka ha langit, gindadayaw an imo ngaran.” (Mat. 6:9) Hini nga paagi gintutdoan ni Jesus an iya mga sumurunod nga an pagdayaw, o pagbaraan, ha ngaran ni Jehova an sadang magin pinakaimportante ha ira. Hiya mismo nagbuhat hito. Ha ikatarapos han ministeryo ni Jesus ha tuna, nakagsiring hiya ha iya pag-ampo kan Jehova: “Akon iginpakilala ha ira [mga apostol] an imo ngaran, ngan akon pa ipinakikilala.” (Juan 17:26) Dugang pa, ha bug-os nga ministeryo ni Jesus iginhatag niya kan Jehova an kadayawan ha iya nahimo dinhi ha tuna.—Juan 5:19.

9. Ano an igintagna ni Sakarias mahitungod han Mesias, ngan paonan-o ini gintuman ni Jesus?

⁹ Mahitungod han Mesias, hi Sakarias nagtagna: “Pagmalipay hin daku, O anak nga babaye han Sion; singgit, O anak nga babaye han Jerusalem: kitaa, an imo hadi makada ha imo; hiya hingpit, ngan may-ada kaluwasan; ubos, ngan masakay ha usa nga asno, bisan ha usa nga pulyino, an nati han usa nga asno.” (Sak. 9:9) Natuman ini han sinulod hi Jesus ha Jerusalem antes han Paskua han 33 C.E. An mga tawo naglatag ha dalan han ira pantungbaw nga mga bado ngan hin mga sanga han kahoy. Ha pagkamatuod, eksayted an ngatanan ha Jerusalem han ira hinbaroan nga tiabot hiya. Bisan han gindayaw hi Jesus han mga tawo sugad nga ira Hadi, mapainubsanon hiya.—Mat. 21:4-11.

10. Ano an napamatud-an han kinaburut-on nga pagsunod ni Jesus tubtob ha kamatayon?

¹⁰ Han hi Jesu-Kristo nakanhi ha tuna, iginpakita niya an pagkamapainubsanon ngan pagkamasinugtanon tubtob ha iya kamatay ha pasakitan nga kahoy. Iya ginpamatud-an ha gimaopayi nga paagi nga an mga tawo mahimo makapabilin nga maunungon kan Jehova bisan pa han  makuri hinduro nga pagsari. Iginpakita liwat ni Jesus nga sayop an akusasyon ni Satanas nga an mga tawo nag-aalagad kan Jehova tungod la kay may nakakarawat hira. (Job 1:9-11; 2:4) Pinaagi han hingpit nga pagsunod ni Kristo ha iya Amay, gindepensahan niya an katungod ni Jehova ha pagmando, ngan iya iginpakita nga nasarig hiya nga an paagi han pagmando ni Jehova amo an gimaopayi. Sigurado nga nalipay hi Jehova ha pagkita ha iya mapainubsanon nga Anak nga nagpabilin nga maunungon.—Basaha an Proberbios 27:11.

11. Ano nga paglaom para ha katawohan nga may pagtoo kan Jesus an nagin posible tungod han iya halad lukat?

¹¹ Pinaagi han kamatay ni Jesus ha pasakitan nga kahoy, nagin posible nga matalwas an mga tawo ha sala ngan kamatayon. (Mat. 20:28) Pinaagi han halad lukat ni Jesus mahimo mapasaylo ni Jehova an aton mga sala uyon ha iya matadong nga mga suruklan ngan mahatagan hin higayon an katawohan nga mabuhi ha waray kataposan. Hi Pablo nagsurat: ‘Tungod ha usa nga buhat han katadongan dinangat an ngatanan nga mga tawo ngadto ha pagkamatadong han kinabuhi.’ (Roma 5:18) Tungod han kamatayon ni Jesus nagin posible an imortal nga kinabuhi ha langit para ha dinihogan nga mga Kristiano ngan an kinabuhi nga waray kataposan ha tuna para ha ‘iba nga mga karnero.’—Juan 10:16; Roma 8:16, 17.

12. Paonan-o iginpakita ni Jesus an pagkamalumo ngan pagkamapainubsanon ha iya pagtratar ha diri-hingpit nga mga tawo?

¹² Gin-imbitar ni Jesus an ngatanan nga “nagbubuhat ngan binubug-atan” nga kumadto ha iya. Hiya nagsiring: “Pas-ana niyo an akon yugo, ngan magtoon kamo ha akon, kay ako maaghop ngan mapainubsanon ha kasingkasing, ngan kamo makakaagi hin pagpahuway ha iyo mga kalag.” (Mat. 11:28, 29) Tungod kay hi Jesus mapainubsanon ngan malumo, buotan hiya ngan waray dinadapigan ha pagtratar ha diri hingpit nga mga tawo. Makatadunganon hiya ha iya ginlalaoman ha iya mga disipulo. Ginkumendasyonan ngan gindasig niya hira. Waray niya ipaabat ha ira nga hira waray-kapas o waray-pulos. Hi Jesus diri gud mapintas o maraugdaog. Lugod, ginpasarig niya an iya mga sumurunod nga kon magigin duok hira ha iya ngan susundon an iya mga igintututdo, marirepreskohan hira, kay an iya yugo masayon ngan an iya pinas-an magaan. An kalalakin-an, kababayin-an, kabataan, ngan mga lagas komportable nga makaupod hi Jesus.—Mat. 11:30.

13. Paonan-o hi Jesus nagpakita hin kalooy ha mga tawo nga makuri an kahimtang?

¹³ Han nakaupod ni Jesus an ordinaryo nga mga tawo ha Israel, nalooy hiya kay makuri an ira kahimtang, ngan mahigugmaon nga ginbuligan niya hira. Hirani ha Jeriko, iginkita hi Jesus hin duha nga buta nga makililimos, hi Bartimeo ngan an iya sangkay. Padayon hira nga nangaro hin bulig kan Jesus, kondi ginsaway hira han mga tawo ngan ginsidngan nga diri mag-inaringasa. Puydi gud unta ni Jesus igbalewaray an hangyo hinin duha nga buta! Kondi hi Jesus nagsiring  nga dad-on hira ha iya, ngan tungod han iya kalooy iya hira gintambal ngan nakakita na hira. Oo, ginsubad ni Jesus an iya Amay nga hi Jehova pinaagi ha pagin mapainubsanon ngan pagpakita hin kalooy ha makasasala nga mga tawo.—Mat. 20:29-34; Mar. 10:46-52.

14. Ano nga mga kapulsanan an nagin resulta han pagin mapainubsanon ni Jesus?

¹⁴ An pagin mapainubsanon ni Jesu-Kristo nagresulta hin kalipay ngan mga bendisyon. Nalipay hi Jehova pagkita ha iya hinigugma nga Anak nga mapainubsanon nga sinugot ha iya kaburut-on. An mga apostol ngan disipulo narepreskohan han pagin malumo ngan mapainubsanon ni Jesus. An iya susbaranan, mga katutdoan, ngan mahigugmaon nga kumendasyon nakaaghat ha ira nga mag-uswag ha espirituwal. An ordinaryo nga mga tawo nagpahimulos ha pagkamapainubsanon ni Jesus kay iya hira ginbuligan, gintutdoan, ngan gindasig. Ha pagkamatuod, tungod han halad lukat ni Jesus, an ngatanan nga may pagtoo ha iya makakakarawat hin mga bendisyon ha waray kataposan.

15. Paonan-o nagpahimulos hi Jesus ha iya pagin mapainubsanon?

¹⁵ Kumusta man hi Jesus? Nagpahimulos ba hiya ha iya pagin mapainubsanon? Oo, kay nagsiring hiya ha iya mga disipulo: ‘Bisan hin-o nga magpapaubos pagpapahitas-on.’ (Mat. 23:12) Ito nga mga pulong natuman gud ha iya. Hi Pablo nagsiring: “Ginbayaw [hi Jesus] han Dios ha hitaas gud, ngan tinagan hiya hin ngaran nga labaw ha ngatanan nga mga ngaran; basi nga ha ngaran ni Jesus an ngatanan nga tuhod lumuhod, han mga bagay nga aadto ha langit ngan han mga bagay nga aada ha tuna, ngan han mga bagay nga aadto ha ilarom han tuna, ngan nga an ngatanan nga dila magsumat nga hi Jesu-Kristo amo an Ginoo, ha himaya han Dios nga Amay.” Tungod han pagin mapainubsanon ngan matinumanon ni Jesus han nakanhi hiya ha tuna, ginpahitaas hiya ni Jehova nga Dios pinaagi ha paghatag ha iya hin awtoridad ha mga linarang ha langit ngan ha tuna.—Fil. 2:9-11.

16. Ano an nagpapakita nga padayon nga magigin mapainubsanon an Anak han Dios ha iya mga buruhaton?

¹⁶ Padayon nga ipapakita han Anak han Dios an pagkamapainubsanon ha iya mga buruhaton. Ha pagtagna kon ano an bubuhaton ni Jesus ha Iya mga kaaway sugad nga Hadi ha langit, an salmista nagkanta: “Ha imo kaharangdon sakay hin pauswag, tungod han kamatuoran, han kaaghop [“pagkamapainubsanon,” NW] ngan han kamatadong.” (Sal. 45:4) Ngan ano an mahitatabo ha kataposan han Usa ka Yukot ka Tuig nga Pagmando han Mesias nga Hadi katapos niya “pagwad-on an ngatanan nga pagdumara ngan an ngatanan nga kagamhanan, ngan gahum”? Magpapakita ba hiya hin pagkamapainubsanon? Oo, kay iya ‘itutubyan an ginhadian ngadto ha Dios nga Amay.’—Basaha an 1 Korinto 15:24-28.

17, 18. (a) Kay ano nga importante nga subaron han mga surugoon ni Jehova an susbaranan ni Jesus ha pagkamapainubsanon? (b) Ano an hihisgotan ha sunod nga artikulo?

¹⁷ Kumusta man kita? Susubaron ba naton an susbaranan ni Jesus ngan magpapakita hin pagkamapainubsanon? Ha Armagedon, an mga mapainubsanon ngan matadong la an luluwason han Hadi nga hi Jesu-Kristo. Salit kinahanglan magin mapainubsanon kita kon karuyag naton maluwas. Dugang pa, sugad la nga an pagkamapainubsanon ni Jesu-Kristo nagin mapulsanon ha iya ngan ha iba, an aton pagpakita hin pagkamapainubsanon magigin mapulsanon ha damu nga paagi.

¹⁸ Ano an makakabulig ha aton nga masubad an pagkamapainubsanon ni Jesus? Paonan-o kita mangangalimbasog nga magin mapainubsanon bisan ha mga panahon nga makuri ito buhaton? Ini nga mga pakiana hihisgotan ha sunod nga artikulo.