Juan 9:1-41
9 Ha gin-aagian ni Jesus nakakita hiya hin lalaki nga buta tikang pa ha katawo.
2 Ngan ginpakianhan hiya han iya mga disipulo: “Rabbi, hin-o an nakasala salit natawo hiya nga buta, hiya o an iya mga kag-anak?”
3 Binaton hi Jesus: “Ini nga tawo waray makasala sugad man an iya mga kag-anak, kondi nahitabo ito basi maipakita an mga buhat han Dios pinaagi ha iya.
4 Kinahanglan buhaton naton an buruhaton han nagsugo ha akon samtang adlaw pa, kay waray tawo nga makakabuhat hito kon umabot na an kagab-ihon.
5 Samtang aanhi ako ha kalibotan, ako an kalamrag han kalibotan.”
6 Katapos niya magyakan hini, linurâ hiya ha tuna ngan naghimo hin lapok pinaagi han iya laway, ngan iginpahid ito ha mga mata han tawo
7 ngan ginsidngan hiya: “Kadto paghiram-os ha karigoan ha Siloam” (nga nangangahulogan, ‘Ginpaawas’). Salit kinadto hiya ngan ginhugasan an iya mga mata, ngan binalik nga nakakakita na.
8 Tungod hito an mga kahimungto ngan an mga nakakita ha iya nga makililimos hiya hadto, nagsiring: “Diri ba ito an tawo nga nagliliningkod ngan nakikilimos hadto?”
9 An iba nagsiring: “Amo ini hiya.” May nagsiring liwat: “Diri ito hiya, pero kapariho la niya.” Nagsiring ito nga tawo: “Ako ini.”
10 Salit nagpakiana hira ha iya: “Paonan-o napukrat an imo mga mata?”
11 Binaton hiya: “An tawo nga tinatawag nga Jesus naghimo hin lapok ngan iginpahid ito ha akon mga mata ngan ginsidngan ako, ‘Kadto ha Siloam ngan paghiram-os.’ Salit kinadto ako ngan pakahiram-os ko nakakita na ako.”
12 Ngan nagpakiana hira ha iya: “Hain na ito nga tawo?” Binaton hiya: “Diri ako maaram.”
13 Gindara nira ha mga Pariseo an tawo nga buta hadto.
14 Nahituman nga adlaw adto han Sabbath han naghimo hi Jesus hin lapok ngan ginpukrat an iya mga mata.
15 Salit hito nga oras nagpakiana liwat ha iya an mga Pariseo kon paonan-o hiya nakakita. Binaton hiya: “Ginpahiran niya hin lapok an akon mga mata, ngan pakahiram-os ko nakakita na ako.”
16 Tungod hito, an iba han mga Pariseo nagsiring: “Ito nga tawo diri tikang ha Dios, kay diri niya gintutuman an Sabbath.” An iba nagsiring: “Makakahimo ba hin sugad hito nga mga milagro an tawo nga makasasala?” Salit nagkabahinbahin hira.
17 Ginpakianhan utro nira an tawo nga buta hadto: “Ano an masisiring mo mahitungod ha iya nga nagpukrat han imo mga mata?” Binaton hiya: “Usa hiya nga propeta.”
18 Pero an Judio nga mga lider waray tumoo nga buta hiya hadto ngan nakakakita na yana. Salit iginpatawag nira an iya mga kag-anak
19 ngan ginpakianhan hira: “Ini ba an iyo anak nga ginsisiring niyo nga natawo nga buta? Kay ano man nga nakakakita na hiya yana?”
20 Binaton an iya mga kag-anak: “Maaram kami nga hiya an amon anak ngan natawo hiya nga buta.
21 Pero diri kami maaram kon paonan-o hiya nakakita, ngan diri liwat kami maaram kon hin-o an nagpukrat han iya mga mata. Hiya an pakianhi niyo. Daku na hiya. Hiya an magsusumat ha iyo.”
22 Ginsiring ito han iya mga kag-anak kay nahahadlok hira ha Judio nga mga lider, kay nagsarabot na ini nga mga Judio nga bisan hin-o an magsumat nga hi Jesus an Kristo, paiiwason ha sinagoga.*
23 Salit nagsiring an iya mga kag-anak: “Daku na hiya. Hiya an pakianhi niyo.”
24 Gintawag na liwat nira an tawo nga buta hadto ngan ginsidngan: “Himayaa an Dios; maaram kami nga ito nga tawo makasasala.”
25 Binaton hiya: “Kon makasasala man hiya, diri ako maaram. Pero maaram gud ako nga bisan kon buta ako hadto, yana nakakakita na ako.”
26 Tungod hito nagpakiana hira: “Ano an iya ginbuhat ha imo? Paonan-o niya ginpukrat an imo mga mata?”
27 Binaton hiya: “Ginsumatan ko na kamo, pero waray kamo pamati. Kay ano nga karuyag niyo mabatian ito utro? Diri niyo karuyag nga magin mga disipulo niya, diri ba?”
28 Tungod hito gin-insulto nira hiya: “Disipulo ka hito nga tawo, pero kami mga disipulo ni Moises.
29 Maaram kami nga an Dios nakiistorya kan Moises; pero mahitungod hito nga tawo, diri kami maaram kon diin hiya tikang.”
30 Binaton hiya: “Urusahon gud nga diri kamo maaram kon diin tikang hiya nga nagpukrat han akon mga mata.
31 Maaram kita nga an Dios diri namamati ha magpakasasala, pero namamati hiya ha bisan hin-o nga may kahadlok ha Dios ngan nagbubuhat han iya kaburut-on.
32 Tikang hadto waray pa gud hinbatian nga nagpukrat han mga mata hin natawo nga buta.
33 Kon ini nga tawo diri tikang ha Dios, diri hiya makakahimo hin bisan ano.”
34 Nagsiring hira: “Natawo ka nga makasasala, kay ano nga gintututdoan mo kami?” Katapos ginpaiwas nira hiya!
35 Nakabati hi Jesus nga ginpaiwas nira hiya ngan han nakita niya ito nga tawo, iya ginpakianhan: “Natoo ka ba ha Anak han tawo?”
36 Binaton hiya: “Hin-o hiya, ginoo, basi tumoo ako ha iya?”
37 Nagsiring hi Jesus: “Nakita mo na hiya, ha pagkamatuod an imo kaistorya yana amo hiya.”
38 Katapos nagsiring an tawo: “Natoo gud ako ha iya, Ginoo.” Ngan yinukbo hiya kan Jesus.
39 Nagsiring hi Jesus: “Kinanhi ako ha kalibotan tungod hini nga paghukom: basi makakita an diri nakakakita ngan mabuta an mga nakakakita.”
40 Nakabati hini an iba nga mga Pariseo nga nakadto, ngan nagpakiana hira ha iya: “Naghuhunahuna ka ba nga mga buta liwat kami?”
41 Binaton hi Jesus: “Kon buta kamo, waray unta kamo sala. Pero yana nasiring kamo, ‘Nakakakita kami.’ Nakakasala pa gihapon kamo.”
Mga footnote
^ O “lugar han pagsingba.”
