Juan 20:1-31
20 Ha primero nga adlaw han semana, aga-aga pa nga kinadto hi Maria Magdalena ha lubnganan samtang masirom-sirom pa, ngan nakita niya nga ginkuha na an bato ha ganggang han lubnganan.
2 Salit dinalagan hiya ngadto kan Simon Pedro ngan ha usa pa nga disipulo nga pinalangga ni Jesus, ngan nagsiring hiya ha ira: “Ginkuha nira an Ginoo ha lubnganan, ngan diri kami maaram kon diin hiya iginbutang.”
3 Tungod hito, hi Pedro ngan an usa pa nga disipulo kinadto ha lubnganan.
4 Dinalagan hira nga duha ngadto ha lubnganan, pero nahiuna pag-abot didto ito nga disipulo kay mas malaksi hiya kan Pedro.
5 Paghil-ing niya ha sulod, nakita niya an mga tela, pero waray hiya sumulod.
6 Inabot liwat hi Simon Pedro nga nasunod ha iya, ngan sinulod ha lubnganan. Nakita ni Pedro didto an mga tela.
7 Pero an tela nga iginputos ha ulo ni Jesus nakalukot ha piliw, bulag ha iba nga mga bendahe nga tela.
8 Sinulod liwat an disipulo nga nahiuna pag-abot ha lubnganan, ngan ha iya nakita, tinoo hiya ha iginsumat ha ira.
9 Pero waray pa nira masabti an ginsiring han kasuratan nga mababanhaw hiya.
10 Salit inuli an mga disipulo.
11 Pero hi Maria nagtinindog ha gawas hirani han lubnganan ngan nagtinangis. Samtang nagtitinangis, naghil-ing hiya ha sulod han lubnganan
12 ngan nakakita hiya hin duha nga anghel nga nakabusag, an usa nalingkod ha may ulohan ngan an usa ha may tiilan han ginbutangan han lawas ni Jesus.
13 Ngan nagsiring hira ha iya: “Babaye, kay ano nga nagtitinangis ka?” Binaton hiya: “Ginkuha nira an akon Ginoo, ngan diri ako maaram kon diin nira hiya iginbutang.”
14 Katapos niya magyakan, liningi hiya ngan nakita niya hi Jesus nga nagtitinindog, pero waray hiya pakakilala nga hi Jesus adto.
15 Nagpakiana hi Jesus kan Maria: “Babaye, kay ano nga nagtitinangis ka? Hin-o an imo ginbibiling?” Kahuna ni Maria nga hiya an hardinero, salit nagsiring hiya: “Mano, kon ikaw an nagdara ha iya, sumati ako kon diin mo hiya iginbutang kay kukuhaon ko hiya.”
16 Nagsiring hi Jesus ha iya: “Maria!” Paglingi niya, nagsiring hiya kan Jesus ha Hebreo: “Rabboni!” (nangangahulogan, “Magturutdo!”)
17 Ginsidngan hiya ni Jesus: “Ayaw ako pagkapti, kay waray pa ako sumaka ngadto ha akon Amay. Kadto lugod ha akon kabugtoan ngan sumati hira, ‘Masaka ako ngadto ha akon Amay ngan ha iyo Amay, ha akon Dios ngan ha iyo Dios.’ ”
18 Kinadto hi Maria Magdalena ha mga disipulo ngan ginsumatan hira: “Nakita ko an Ginoo!” Ngan iya iginsumat ha ira an ginsiring ni Jesus.
19 Han gab-i na hito nga primero nga adlaw han semana, nagkatirok an mga disipulo. Nakatrangka an mga purtahan kay nahahadlok hira ha mga Judio. Nagpakita ha ira hi Jesus ngan tinindog ha butnga nira ngan nagsiring: “Magmamurayawon unta kamo.”
20 Katapos niya magsiring hini, iginpakita niya an iya mga kamot ngan an iya kagiliran. Tungod hito, nagkalipay an mga disipulo han nakita nira an Ginoo.
21 Nagsiring utro ha ira hi Jesus: “Magmamurayawon unta kamo. Sugad la nga ginsugo ako han Amay, ginsusugo ko liwat kamo.”
22 Katapos niya magsiring hini, ginhuypan niya hira ngan ginsidngan: “Karawata niyo an baraan nga espiritu.
23 Kon ginpapasaylo niyo an mga sala han bisan hin-o, an ira mga sala ginpasaylo na. Pero kon diri niyo ginpapasaylo an mga sala han bisan hin-o, an ira mga sala waray pa mapasaylo.”
24 Pero hi Tomas, nga usa han 12 nga apostol, nga gintatawag nga An Kambal, waray didto han nagpakita ha ira hi Jesus.
25 Salit ginsumatan hiya han iba nga disipulo: “Nakita namon an Ginoo!” Pero nagsiring hiya: “Kon diri ko makita an ulat han mga raysang ha iya mga kamot ngan makaptan ito han akon tudlo ngan makaptan an iya kagiliran, diri gud ako matoo.”
26 Paglabay hin walo ka adlaw, nagkatirok na liwat an iya mga disipulo ha usa nga balay, ngan kaupod na nira hi Tomas. Bisan kon nakatrangka an mga purtahan, nagpakita ha ira hi Jesus ngan tinindog ha butnga nira ngan nagsiring: “Magmamurayawon unta kamo.”
27 Katapos ginsidngan niya hi Tomas: “Ibutang didi an imo tudlo, ngan kitaa an akon mga kamot. Kapti an akon kagiliran, ngan ayaw na pagruhaduha, lugod tumoo ka.”
28 Nagsiring hi Tomas: “Ginoo ko ngan Dios ko!”
29 Ginsidngan hiya ni Jesus: “Natoo ka ba kay nakita mo ako? Malipayon an mga natoo bisan kon waray makakita.”
30 Ha pagkamatuod, damu pa nga milagro nga waray mahisurat dinhi hinin linukot nga basahon an ginbuhat liwat ni Jesus ha atubangan han mga disipulo.
31 Pero iginsurat ini basi tumoo kamo nga hi Jesus an Kristo nga Anak han Dios, ngan tungod ha pagtoo, makarawat unta niyo an kinabuhi pinaagi han iya ngaran.
