Juan 5:1-47
5 Katapos, pag-abot han piyesta han mga Judio, kinadto hi Jesus ha Jerusalem.
2 Didto ha Jerusalem, hirani ha ganghaan para han mga karnero, may karigoan nga ha Hebreo gintatawag nga Betsata. Ginpapalibotan ito hin lima nga portiko.*
3 Didto nahigda an damu nga may sakit, buta, piay, ngan baldado.
4 * ——
5 May usa nga tawo didto nga 38 ka tuig na nga may sakit.
6 Pakakita ni Jesus hini nga tawo nga nahigda, ngan tungod kay maaram hiya nga maiha na ini nga may sakit, nagsiring hi Jesus ha iya: “Karuyag mo ba nga mag-opay ka?”
7 Binaton an may sakit: “Mano, waray nabulig ha akon nga makalugsong ha tubig kon nagkikiwa ito; samtang tilugsong ako may nahiuuna ha akon.”
8 Ginsidngan hiya ni Jesus: “Buhát, dad-a an imo tiheras ngan lakat.”
9 Tungod hito nag-opay dayon hiya, gindara an iya tiheras ngan linakat.
Adlaw adto han Sabbath.*
10 Salit ginsidngan han mga Judio an tawo nga nag-opay na: “Sabbath yana, salit supak ha balaud nga dad-on mo an tiheras.”
11 Binaton hiya: “An nagtambal mismo ha akon an nagsiring, ‘Dad-a an imo tiheras ngan lakat.’ ”
12 Nagpakiana hira: “Hin-o an nagsiring ha imo, ‘Dad-a ito ngan lakat’?”
13 Pero an nag-opay na nga tawo diri nakilala kon hin-o an nagtambal ha iya, kay binaya hi Jesus tungod han damu nga tawo didto.
14 Katapos, nakita hiya ni Jesus ha templo ngan ginsidngan: “Kitaa, maopay ka na. Ayaw na pagbuhat hin sala basi waray mas maraot pa nga mahitabo ha imo.”
15 Linakat hiya ngan nagsumat ha mga Judio nga hi Jesus an nagtambal ha iya.
16 Salit gintimaraot han mga Judio hi Jesus, kay ginbuhat niya ito ha adlaw han Sabbath.
17 Pero ginbaton hira ni Jesus: “An akon Amay padayon nga nagbubuhat tubtob yana, ngan ako liwat padayon nga nagbubuhat.”
18 Tungod hini, mas nangalimbasog an mga Judio nga patayon hiya, kay naghuhunahuna hira nga diri la kay gintatalapas niya an Sabbath kondi gintatawag liwat niya nga iya Amay an Dios, ngan gintatagad an iya kalugaringon nga katupong han Dios.
19 Salit binaton hi Jesus: “Ha pagkamatuod susumatan ko kamo, An Anak diri nagbubuhat hin bisan ano nga iya la karuyag, kondi an nakikita niya ha Amay amo la an iya ginbubuhat. Tungod kay kon ano an ginbubuhat han Amay, ito liwat an ginbubuhat han Anak.
20 Kay pinalangga han Amay an Anak ngan ginpapakita ha iya an ngatanan nga Iya ginbubuhat, ngan mas urusahon pa hini an Iya ipapakita ha iya, basi mahipausa gud kamo.
21 Ginbabanhaw han Amay an mga patay ngan gintatagan hira hin kinabuhi, salit gintatagan liwat han Anak hin kinabuhi adton karuyag niya tagan.
22 An Amay diri naghuhukom ha bisan hin-o, lugod iginhatag niya ha Anak an bug-os nga awtoridad ha paghukom,
23 basi an Anak pasidunggan han ngatanan sugad la nga ginpapasidunggan nira an Amay. An diri nagpapasidungog ha Anak diri nagpapasidungog ha Amay nga nagsugo ha iya.
24 Ha pagkamatuod susumatan ko kamo, An namamati han akon pulong ngan natoo ha nagsugo ha akon magkakaada kinabuhi nga waray kataposan, ngan diri hiya huhukman kondi pariho hiya hin tawo nga namatay ngan buhi na yana.
25 “Ha pagkamatuod susumatan ko kamo, Maabot an oras, ngan yana na, nga an mga patay makakabati han tingog han Anak han Dios, ngan an mga naghatag hin atensyon mabubuhi.
26 Kay sugad la nga an Amay an burabod han kinabuhi, gintagan liwat niya an Anak hin gahum ha paghatag hin kinabuhi.
27 Ngan Iya gintagan hiya hin awtoridad ha paghukom, kay hiya an Anak han tawo.
28 Ayaw kamo kahipausa hini, kay maabot an oras nga an ngatanan nga aadto ha handumanan nga mga lubnganan makakabati han iya tingog
29 ngan mababanhaw. An mga nagbubuhat hin maopay magkakaada kinabuhi nga waray kataposan, pero an mga nagbubuhat hin maraot huhukman.
30 Diri ako nagbubuhat hin bisan ano nga akon la karuyag. Naghuhukom ako uyon ha akon nababatian, ngan matadong an akon paghukom, kay an akon ginbubuhat diri an akon kaburut-on kondi an kaburut-on han nagsugo ha akon.
31 “Kon ako la an magpapamatuod mahitungod han akon kalugaringon, an akon pamatuod diri totoo.
32 Pero may usa pa nga nagpapamatuod mahitungod ha akon, ngan maaram ako nga totoo an iya pamatuod.
33 Nagsugo kamo hin mga tawo ngadto kan Juan, ngan nagsumat hiya han kamatuoran.
34 Pero diri ko kinahanglan an pamatuod han tawo, kondi ginsisiring ko ini basi matalwas kamo.
35 Hi Juan amo an naglalaga ngan naglalawag nga lampara, ngan ha halipot nga panahon nalipay gud kamo han iya lamrag.
36 Pero may ebidensya ako nga mas marig-on kay ha ebidensya ni Juan, kay an mga buruhaton mismo nga iginpapatuman ha akon han Amay, ini nga mga buruhaton nga akon ginbubuhat, nagpapamatuod nga an Amay an nagsugo ha akon.
37 Ngan an Amay mismo nga nagsugo ha akon nagpapamatuod mahitungod ha akon. Waray pa gud kamo pakabati han iya tingog o pakakita han iya hitsura;
38 ngan waray dida ha iyo kasingkasing an iya pulong, kay diri kamo natoo ha iya mismo ginsugo.
39 “Gin-uusisa niyo an Kasuratan kay naghuhunahuna kamo nga pinaagi hito magkakaada kamo kinabuhi nga waray kataposan; ngan ito mismo an nagpapamatuod mahitungod ha akon.
40 Kondi diri kamo naruruyag pagdaop ha akon basi magkaada kamo kinabuhi.
41 Diri ko kinahanglan an pagdayaw han mga tawo,
42 pero maaram gud ako nga waray kamo gugma ha Dios.
43 Kinanhi ako ha ngaran han akon Amay, pero diri kamo natoo ha akon; kon may iba nga umabot ha iya kalugaringon nga ngaran, matoo kamo ha iya.
44 Paonan-o kamo matoo ha akon kon naggigidayaw-dayaw kamo ngan diri niyo ginpapangalimbasogan an kadayawan tikang ha amo la nga Dios?
45 Ayaw kamo paghunahuna nga aakusaran ko kamo ha Amay. May usa nga nag-aakusar ha iyo, hi Moises, nga iyo sinasarigan.
46 Ha pagkamatuod, kon natoo kamo kan Moises matoo liwat kamo ha akon, kay nagsurat hiya mahitungod ha akon.
47 Pero kon diri kamo natoo ha iya mga sinurat, paonan-o kamo matoo ha akon mga pulong?”
Mga footnote
^ Aragian nga may atop.
^ Kitaa an footnote ha Mat 17:21.
^ Kitaa an “Sabbath” ha Glossary.
