Juan 17:1-26
17 Katapos ni Jesus magyakan hini, hinangad hiya ha langit ngan nag-ampo: “Amay, inabot na an oras; himayaa an imo anak, basi himayaon ka han imo anak,
2 kay sugad la nga gintagan mo hiya hin awtoridad ha ngatanan nga tawo,* mahatagan unta niya hin kinabuhi nga waray kataposan hira ngatanan nga imo iginhatag ha iya.
3 Nangangahulogan ini hin kinabuhi nga waray kataposan, an ira pagkilala ha imo,* an amo la nga totoo nga Dios, ngan ha imo ginsugo, hi Jesu-Kristo.
4 Ginhimaya ko ikaw ha tuna ngan gintapos ko an buruhaton nga imo iginsugo ha akon.
5 Salit yana Amay, himayaa ako kaupod mo sugad han paghimaya mo ha akon han kaupod mo pa ako antes magtikang an kalibotan.
6 “Iginpahayag ko an imo ngaran ha mga tawo nga iginhatag mo ha akon tikang ha kalibotan. Imo hira, ngan iginhatag mo hira ha akon, ngan gintutuman nira an imo pulong.
7 Maaram na hira yana nga tikang ha imo an ngatanan nga iginhatag mo ha akon,
8 kay iginsumat ko ha ira an imo iginsumat ha akon. Ginkarawat nira ito ngan nahibaro gud hira nga kinanhi ako sugad nga imo representante. Tinoo hira nga ginsugo mo ako.
9 Naghahangyo ako para ha ira. Naghahangyo ako, diri para ha kalibotan, kondi para ha ira nga iginhatag mo ha akon, kay imo hira.
10 Imo an ngatanan nga akon gintatag-iya, ngan akon an imo gintatag-iya. Ginhihimaya ako nira.
11 “Mabalik ako ha imo ngan babayaan ko na ini nga kalibotan, pero aanhi hira ha kalibotan. Baraan nga Amay, alayon panalipdi hira tungod han imo ngaran nga iginhatag mo ha akon, basi magin usa hira sugad nga kita uusa.
12 Han kaupod ko hira, akon hira ginpanalipdan tungod han imo ngaran nga iginhatag mo ha akon. Ginhirotan ko hira, ngan waray bisan usa ha ira nga nawara labot la han anak han kabungkagan, basi matuman an kasuratan.
13 Pero yana mabalik ako ha imo, ngan iginsusumat ko ini ha kalibotan basi abaton gud nira an akon kalipay.
14 Iginsumat ko ha ira an imo pulong, pero nasisina ha ira an kalibotan kay diri hira kanan kalibotan, sugad la nga ako diri kanan kalibotan.
15 “Naghahangyo ako nga diri mo hira kuhaon ha kalibotan, kondi nga panalipdan mo hira tikang ha usa nga maraot.
16 Diri hira kanan kalibotan, sugad la nga ako diri kanan kalibotan.
17 Baraana hira pinaagi han kamatuoran; an imo pulong kamatuoran.
18 Sugad la nga ginsugo mo ako ha kalibotan, ginsugo ko liwat hira ha kalibotan.
19 Nagpapabilin ako nga baraan tungod ha ira, basi magin baraan liwat hira pinaagi han kamatuoran.
20 “Naghahangyo ako, diri la para ha ira, kondi para liwat ha mga natoo ha akon pinaagi han ira pulong;
21 basi hira ngatanan magin usa, sugad nga ikaw, Amay, kahiusa ko ngan ako kahiusa mo, basi hira magin kahiusa liwat naton, ngan tumoo an kalibotan nga ginsugo mo ako.
22 Ginpapasidunggan ko liwat hira sugad han imo pagpasidungog ha akon, basi magin usa hira sugad nga kita uusa.
23 Kahiusa nira ako ngan kahiusa ko ikaw, basi magkaurosa gud hira; ngan basi mahibaro an kalibotan nga ginsugo mo ako ngan hinigugma mo hira sugad la nga hinigugma mo ako.
24 Amay, karuyag ko nga kon hain ako, kaupod ko liwat hira nga iginhatag mo ha akon, basi makita nira an himaya nga iginhatag mo ha akon tungod kay hinigugma mo ako antes pa han tinikangan han kalibotan.
25 Matadong nga Amay, diri gud nakilala ha imo an kalibotan, pero nakilala ako ha imo ngan maaram an mga disipulo nga ginsugo mo ako.
26 Iginpakilala ko ha ira an imo ngaran ngan padayon nga igpapakilala ko ito, basi magpakita hira hin gugma sugad han paghigugma mo ha akon ngan basi magin kahiusa ako nira.”
