Juan 14:1-31
14 “Ayaw pabay-i nga masubo an iyo kasingkasing. Magpakita kamo hin pagtoo ha Dios, ngan magpakita liwat kamo hin pagtoo ha akon.
2 Ha balay han akon Amay damu an urukyan. Kon diri ini totoo, diri ko unta kamo susumatan. Ha pagkamatuod, tikadto ako ha pag-andam hin lugar para ha iyo.
3 Kon kumadto ako ngan mag-andam hin lugar para ha iyo, mabalik ako ngan ig-uupod ko kamo ha akon balay basi kon hain ako, aadto liwat kamo.
4 Ngan ha akon kakadtoan maaram kamo han dalan.”
5 Nagsiring hi Tomas: “Ginoo, diri kami maaram kon makain ka. Paonan-o namon mahibabaroan an dalan?”
6 Binaton hi Jesus: “Ako an dalan ngan an kamatuoran ngan an kinabuhi. Waray nakakakadto ha Amay kon diri pinaagi ha akon.
7 Kon kilala niyo ako, kilala liwat unta niyo an akon Amay. Tikang yana makikilala niyo hiya. Ha pagkamatuod, nakita na niyo hiya.”
8 Nagsiring hi Felipe: “Ginoo, ipakita ha amon an Amay, ngan kontento na kami hito.”
9 Binaton hi Jesus: “Maiha na nga kaupod niyo ako, pero diri mo pa ako kilala, Felipe? An nakakita ha akon nakakita liwat ha Amay. Kay ano nga nasiring ka, ‘Ipakita ha amon an Amay’?
10 Diri ka ba natoo nga kahiusa ako han Amay ngan an Amay kahiusa ko? An akon ginsisiring ha iyo diri akon kalugaringon nga mga ideya; pero an Amay nga pirme kahiusa ko nagbubuhat han iya buruhaton.
11 Tumoo kamo ha akon nga kahiusa ako han Amay ngan an Amay kahiusa ko. Kon diri, too kamo tungod han akon mga ginbuhat.
12 Ha pagkamatuod susumatan ko kamo, An nagpapakita hin pagtoo ha akon magbubuhat liwat han akon mga ginbubuhat, ngan labaw pa hini an iya bubuhaton, kay tikadto na ako ha Amay.
13 Ngan bisan ano nga aroon niyo ha akon ngaran, ihahatag ko ito, basi himayaon an Amay pinaagi han Anak.
14 Kon mangaro kamo hin bisan ano ha akon ngaran, ihahatag ko ito.
15 “Kon nahigugma kamo ha akon, tutumanon niyo an akon mga sugo.
16 Maghahangyo ako ha Amay ngan tatagan niya kamo hin iba nga parabulig nga makakaupod niyo ha kadayonan,
17 an espiritu han kamatuoran, nga diri nakakarawat han kalibotan kay diri ito nakikita o hinbabaroan han kalibotan. Maaram kamo hito, kay nagpapabilin ito ha iyo ngan aada ha iyo.
18 Diri ko kamo babayaan nga masurub-on. Makanhi gud ako ha iyo.
19 Halipot na la nga panahon ngan diri na ako makikita han kalibotan, pero makikita niyo ako kay magpapadayon ako nga buhi ngan mabubuhi liwat kamo.
20 Hito nga panahon hibabaroan niyo nga kahiusa ako han Amay ngan kahiusa ko kamo ngan kahiusa ako niyo.
21 An nakarawat han akon mga sugo ngan nagtutuman hito, nahigugma ha akon. An nahigugma ha akon hihigugmaon liwat han akon Amay, ngan akon hiya hihigugmaon ngan ipapakilala ko ha iya an akon kalugaringon.”
22 Hi Judas, diri an Iscariote, nagpakiana: “Ginoo, kay ano nga karuyag mo ipakilala ha amon an imo kalugaringon pero diri ha kalibotan?”
23 Binaton hi Jesus: “An bisan hin-o nga nahigugma ha akon magtutuman han akon pulong, ngan hihigugmaon hiya han akon Amay, ngan makadto kami ha iya ngan makakaupod namon hiya.
24 An diri nahigugma ha akon diri nagtutuman han akon mga pulong; pero an pulong nga iyo hinbabatian diri akon, kondi kanan Amay nga nagsugo ha akon.
25 “Iginsusumat ko ini ha iyo samtang kaupod pa ako niyo.
26 Pero an parabulig, an baraan nga espiritu, nga ipapadara han Amay ha akon ngaran, ito an magtututdo ha iyo han ngatanan nga butang ngan magpapahinumdom ha iyo han ngatanan nga akon iginsumat ha iyo.
27 Igbibilin ko ha iyo an kamurayawan nga iginhatag ko ha iyo. An kamurayawan nga iginhahatag ko ha iyo diri pariho han iginhahatag ha iyo han kalibotan. Ayaw pabay-i nga masubo o mahadlok an iyo kasingkasing.
28 Hinbatian niyo nga nagsiring ako ha iyo, Mabaya ako ngan mabalik ha iyo. Kon hinigugma niyo ako, malilipay kamo nga makadto ako ha Amay, kay an Amay mas gamhanan kay ha akon.
29 Iginsusumat ko ito ha iyo yana antes ito mahitabo basi tumoo kamo kon mahitabo na ito.
30 Diri na ako magyayakan hin damu ha iyo, kay tiabot an magmarando han kalibotan. Diri niya ako madadaog,
31 pero basi mahibaro an kalibotan nga hinigugma ko an Amay, ginbubuhat ko an iginsugo ha akon han Amay. Buhát kamo, pagkalakat na kita.
