Juan 12:1-50
12 Unom ka adlaw antes han Paskua, inabot hi Jesus ha Betania, ha lugar ni Lasaro nga iya ginbanhaw.
2 Salit nag-andam hira didto hin panihapon para ha iya, ngan hi Lasaro usa han mga nanlilingkod upod ni Jesus ha may lamesa samtang hi Marta nag-aasikaso ha ira.
3 Katapos nagdara hi Maria hin mga tunga ka litro han mahamot nga lana, nga puro nga nardo ngan marahalon gud. Ngan ginpahiran niya an mga tiil ni Jesus ngan ginpamara ito pinaagi han iya buhok. An bug-os nga balay napuno han amyon han mahamot nga lana.
4 Kondi hi Judas Iscariote nga usa han iya mga disipulo, nga magtatraydor ha iya, nagsiring:
5 “Kay ano nga waray na la ibaligya hin 300 ka denaryo ito nga mahamot nga lana basi ihatag ha mga pobre?”
6 Pero ginsiring niya ini, diri tungod kay nagtatagad hiya ha mga pobre, kondi tungod kay kawatan hiya. Hiya an nakapot han kahon han kwarta ngan ginkikinawat niya an kwarta didto.
7 Salit nagsiring hi Jesus mahitungod kan Maria: “Pabay-i niyo hiya, kay ginbubuhat niya ini yana sugad nga pangandam para ha adlaw han akon lubong.
8 An mga pobre pirme niyo kaupod, pero ako diri niyo pirme makakaupod.”
9 Han nahibaro an damu nga Judio nga nakadto hi Jesus, kinadto hira, diri la tungod ha iya kondi basi makita liwat hi Lasaro nga iya ginbanhaw.
10 Nagsarabot an punoan nga mga saserdote nga patayon liwat hi Lasaro,
11 kay tungod ha iya damu nga Judio an napakadto ngan natoo kan Jesus.
12 Kinabuwasan, an damu nga tawo nga kinadto ha piyesta nakabati nga makadto hi Jesus ha Jerusalem.
13 Salit nanguha hira hin mga sanga han kahoy nga palma ngan nagkagawas basi tapoon hiya ngan ginuliat hira: “Nag-aampo kami ha imo, talwasa hiya! Bendisyonan unta an hadi han Israel nga napakanhi ha ngaran ni Jehova!”
14 Han nakaagi hi Jesus hin nati nga asno, sinakay hiya, sugad la han nahisurat:
15 “Ayaw kahadlok, anak nga babaye han Sion. Kitaa! An imo hadi tikanhi nga nasakay ha nati nga asno.”
16 Ha siyahan waray makasabot hito an mga disipulo, kondi han ginhimaya na hi Jesus, nahinumdom hira nga ito an iginsurat mahitungod ha iya ngan ito an ira ginbuhat ha iya.
17 An mga tawo nga nakadto han gintawag niya hi Lasaro ha lubnganan ngan ginbanhaw nagpinanumat liwat han ira nakita.
18 Tungod kay hinbatian han damu nga tawo an iya ginbuhat nga milagro, kinadto liwat hira basi tapoon hiya.
19 Salit nagbasol-basolay an mga Pariseo: “Nakita niyo? Waray gud kita nahimo. Kitaa! Nasunod na ha iya an bug-os nga kalibotan.”
20 May liwat mga Griego nga kinadto basi magsingba ha panahon han piyesta.
21 Dinaop hira kan Felipe nga tikang ha Betsaida ha Galilea, ngan naghangyo hira ha iya: “Mano, karuyag namon makita hi Jesus.”
22 Kinadto hi Felipe kan Andres ngan ginsumatan hiya. Katapos kinadto hira nga duha kan Jesus ngan ginsumatan hiya.
23 Kondi nagsiring ha ira hi Jesus: “Inabot na an oras basi himayaon an Anak han tawo.
24 Ha pagkamatuod susumatan ko kamo, Kon an usa nga liso han trigo diri mahulog ha tuna ngan diri mamatay, magpapabilin ito nga usa la nga liso; pero kon mamatay ito, mamumunga ito hin damu.
25 An nahigugma ha iya kalag* mawawad-an hito, pero an nasisina ha iya kalag dinhi hini nga kalibotan magpapanalipod hito para ha kinabuhi nga waray kataposan.
26 An bisan hin-o nga naruruyag mag-alagad ha akon, sadang hiya sumunod ha akon, ngan bisan diin ako kumadto, aadto liwat an akon surugoon. An bisan hin-o nga naruruyag mag-alagad ha akon, bibendisyonan hiya han Amay.
27 An akon kalag nasusubo gud yana, ngan ano an akon masisiring? Amay, talwasa ako ha mahitatabo hini nga oras. Kondi ini nga oras kinahanglan umabot ha akon, amo nga aanhi ako.
28 Amay, himayaa an imo ngaran.” Ngan may tingog nga nabatian tikang ha langit: “Ginhimaya ko na ito ngan paghihimayaon ko utro.”
29 Pakabati hito han mga tawo nga naninindog didto, nagsiring hira nga dinalugdog. An iba nagsiring: “May anghel nga nagyakan ha iya.”
30 Binaton hi Jesus: “Hinbatian ini nga tingog, diri tungod ha akon, kondi tungod ha iyo.
31 Ginhuhukman yana ini nga kalibotan ngan paiiwason an magmarando hini nga kalibotan.
32 Pero kon bitayon na ako, papahiranion ko ha akon an ngatanan nga klase hin tawo.”
33 Ginyakan niya ini basi ipasabot kon ano nga klase hin kamatayon an iya maieksperyensyahan.
34 Nagsiring ha iya an mga tawo: “Hinbatian namon ha Balaud nga an Kristo magpapadayon ha waray kataposan. Kay ano nga nasiring ka nga an Anak han tawo kinahanglan bitayon? Hin-o ini nga Anak han tawo?”
35 Salit nagsiring ha ira hi Jesus: “Halipot na la nga panahon nga makakaupod niyo an kalamrag. Lakat kamo samtang aada pa ha iyo an kalamrag basi diri kamo madaog han kasisidman. An naglalakat ha kasisidman diri maaram kon makain hiya.
36 Samtang aada ha iyo an kalamrag, magpakita kamo hin pagtoo ha kalamrag basi magin mga anak kamo han kalamrag.”
Katapos ini igyakan ni Jesus, linakat hiya ngan waray na magpakita ha ira.
37 Pero waray hira tumoo ha iya bisan kon nakita nira an damu gud nga milagro nga iya ginbuhat.
38 Salit natuman an igintagna ni propeta Isaias: “Jehova, hin-o an tinoo ha amon hinbatian? Ngan mahitungod han butkon ni Jehova, kan kanay ito iginpahayag?”
39 Ginsiring liwat ni Isaias an hinungdan kon kay ano nga waray hira tumoo:
40 “Ginbuta niya an ira mga mata ngan ginpatig-a an ira kasingkasing, basi diri hira makakita pinaagi han ira mga mata ngan diri makasabot pinaagi han ira kasingkasing ngan makabalik basi tambalon ko hira.”
41 Ginsiring ini ni Isaias mahitungod han Kristo kay nakita niya an Iya himaya.
42 Kondi damu an tinoo kan Jesus, bisan an Judio nga mga lider, pero tungod kay nahahadlok hira ha mga Pariseo, diri hira nagsusumat mahitungod ha iya basi diri hira paiwason ha sinagoga,
43 kay mas karuyag nira nga uyonan han mga tawo kay ha uyonan han Dios.
44 Pero nagsiring hi Jesus ha daku nga tingog: “An natoo ha akon, natoo diri la ha akon kondi ha nagsugo liwat ha akon,
45 ngan an nakakakita ha akon, nakakakita liwat ha nagsugo ha akon.
46 Kinanhi ako sugad nga kalamrag ha kalibotan basi an ngatanan nga natoo ha akon diri magpabilin ha kasisidman.
47 Pero diri ko ginhuhukman an bisan hin-o nga namamati han akon ginsisiring kondi diri nagbubuhat hito, kay kinanhi ako diri basi hukman an kalibotan kondi basi talwason an kalibotan.
48 May maghuhukom ha nagsasalikway ha akon ngan diri nakarawat han akon ginsisiring. An pulong nga akon ginyakan amo an maghuhukom ha iya ha kataposan nga adlaw,
49 kay an akon ginyayakan diri akon kalugaringon nga mga ideya, kondi an Amay nga nagpakanhi ha akon an naghatag hin sugo kon ano an akon igyayakan ngan igtututdo.
50 Maaram liwat ako nga an iya sugo nangangahulogan hin kinabuhi nga waray kataposan. Salit kon ano an ginsiring ha akon han Amay, amo man an akon ginyayakan.”
Mga footnote
^ O “kinabuhi.”
