Juan 13:1-38
13 Antes han piyesta han Paskua, maaram na hi Jesus nga inabot na an iya oras ha pagbaya hini nga kalibotan basi bumalik ha Amay. Tungod kay hinigugma ni Jesus an iya mga sumurunod ha kalibotan, iginpakita niya an iya gugma ha ira tubtob ha kataposan.
2 Samtang nagpapadayon an panihapon, gin-impluwensyahan han Yawa an kasingkasing ni Judas Iscariote nga anak ni Simon basi magtraydor kan Jesus.
3 Tungod kay maaram hi Jesus nga iginhatag na ha iya han Amay an ngatanan ngan tungod kay maaram hiya nga tikang hiya ha Dios ngan mabalik ha Dios,
4 binuhát hiya samtang naninihapon ngan ginhukas an iya pantungbaw nga panapton. Kinuha hiya hin tuwalya ngan igintapis ito.
5 Katapos, nagbutang hiya hin tubig ha planggana ngan ginhimsawan an mga tiil han mga disipulo ngan gintrapohan ito han iya igintapis nga tuwalya.
6 Pagdaop niya kan Simon Pedro, ginsidngan hiya: “Ginoo, hihimsawan mo ba ako?”
7 Binaton hi Jesus: “Diri mo nasasabtan yana an akon ginbubuhat, pero katapos hini, masasabtan mo ito.”
8 Nagsiring hi Pedro: “Ayaw ako paghimsawi.” Binaton hi Jesus: “Kon diri ko ikaw himsawan, diri ka makakaupod ha akon.”
9 Nagsiring hi Pedro: “Ginoo, diri la an akon mga tiil, kondi pati an akon mga kamot ngan an akon ulo.”
10 Binaton hi Jesus: “An kinarigo na, limpyo na an bug-os nga lawas salit an iya mga tiil na la an hihimsawan. Limpyo na kamo, pero diri kamo ngatanan.”
11 Maaram gud hiya kon hin-o an magtatraydor ha iya. Amo nga nagsiring hiya: “Diri an ngatanan ha iyo limpyo.”
12 Katapos niya himsawan hira, iginsul-ot niya an iya pantungbaw nga panapton ngan binalik ha lamesa ngan nagsiring ha ira: “Nasasabtan ba niyo an akon ginbuhat ha iyo?
13 Gintatawag niyo ako nga ‘Magturutdo,’ ngan ‘Ginoo,’ ngan husto ito nga pagtawag niyo ha akon.
14 Salit, kon ako, bisan kon Ginoo ngan Magturutdo, naghimsaw ha iyo, kinahanglan liwat nga himsawan niyo an kada tagsa.
15 Kay nagpakita ako ha iyo hin susbaranan, nga sugad han akon ginbuhat ha iyo, kinahanglan buhaton liwat niyo ito.
16 Ha pagkamatuod susumatan ko kamo, An uripon diri labaw ha iya agaron, ngan an ginsugo diri labaw ha nagsugo ha iya.
17 Tungod kay maaram na kamo hini, malipayon kamo kon iyo ini buhaton.
18 Diri kamo ngatanan an akon gin-uunabi, kay kilala ko an akon mga pinili. Pero basi matuman an ginsiring han Kasuratan, ‘An kaupod ko ha pagkaon han tinapay nagtraydor* ha akon.’
19 Ginsusumatan ko kamo yana antes ito mahitabo, basi kon mahitabo na ito, tumoo kamo ha akon nga ako amo hiya.
20 Ha pagkamatuod susumatan ko kamo, An nakarawat ha bisan hin-o nga akon ginsugo, nakarawat liwat ha akon. Ngan an nakarawat ha akon, nakarawat liwat ha nagsugo ha akon.”
21 Katapos igyakan ini ni Jesus, nasubo hiya ngan nagsiring: “Ha pagkamatuod susumatan ko kamo, Usa ha iyo an magtatraydor ha akon.”
22 Nagsiplatay an mga disipulo, kay diri hira maaram kon hin-o an iya ginsisiring.
23 Nahundarig ha sapit* ni Jesus an usa han iya mga disipulo nga hinigugma niya.
24 Salit hi Simon Pedro tinangdo hini nga sapit ni Jesus ngan nagsiring ha iya: “Isumat kon hin-o an iya ginsisiring.”
25 Sinandig hiya ha dughan ni Jesus ngan nagpakiana: “Ginoo, hin-o hiya?”
26 Binaton hi Jesus: “Hiya an tatagan ko han tinapay nga akon igtutunlob.” Salit pakatunlob niya han tinapay, iginhatag niya ito kan Judas nga anak ni Simon Iscariote.
27 Pakakarawat ni Judas han tinapay, gin-impluwensyahan ni Satanas an iya kasingkasing. Katapos nagsiring hi Jesus ha iya: “Kon ano an imo ginbubuhat, durodagmita ito.”
28 Pero an mga nanlilingkod ha may lamesa diri maaram kon kay ano nga ginsiring ito ni Jesus ha iya.
29 Tungod kay hi Judas an nakapot han kahon han kwarta, naghunahuna an iba nga ginsusugo hiya ni Jesus nga pumalit han ira kinahanglanon ha piyesta, o maghatag ha mga pobre.
30 Salit pakakarawat niya han tinapay, ginawas dayon hiya. Gab-i na hadto.
31 Pakagawas ni Judas, nagsiring hi Jesus: “An Anak han tawo ginhihimaya yana, ngan ginhihimaya liwat an Dios pinaagi ha iya.
32 An Dios mismo maghihimaya ha Anak han tawo, ngan bubuhaton dayon niya ito.
33 Hinigugma nga mga anak, halipot na la nga panahon nga makakaupod ako niyo. Bibilngon niyo ako, pero igsisiring ko liwat ha iyo yana an akon ginsiring ha mga Judio, ‘Diri kamo makakakadto ha akon kakadtoan.’
34 Naghahatag ako ha iyo hin bag-o nga sugo, nga maghigugmaay kamo; sugad han akon paghigugma ha iyo, maghigugmaay liwat kamo.
35 Tungod hini an ngatanan mahibabaro nga mga disipulo ko kamo, kon naghihigugmaay kamo.”
36 Nagsiring hi Simon Pedro ha iya: “Ginoo, makain ka?” Binaton hi Jesus: “Diri ka makakakadto yana ha akon kakadtoan, pero masunod ka pagkatapos.”
37 Nagsiring hi Pedro: “Ginoo, kay ano nga diri ako makakaupod ha imo yana? Ihahatag ko an akon kalag para ha imo.”
38 Binaton hi Jesus: “Ihahatag mo ba an imo kalag* para ha akon? Ha pagkamatuod susumatan ko ikaw, Antes tumugaok an manok, igninigar mo ako hin tulo ka beses.”
Mga footnote
^ Ha literal, “nag-alsa han iya tikod kontra ha akon.”
^ Ha literal, “ha dughan.”
^ O “kinabuhi.”
