Juan 11:1-57
11 Ha baryo han Betania, may tawo nga nagkasakit nga Lasaro an ngaran. Kaupod niya an iya kabugtoan nga hira Maria ngan Marta.
2 Hiya an Maria nga nagpahid hin mahamot nga lana ngan nagpamara han mga tiil han Ginoo pinaagi han iya buhok; bugto hiya han may sakit nga hi Lasaro.
3 Salit an bugto nga kababayin-an ni Lasaro nagpatugon kan Jesus: “Ginoo, may sakit an imo pinalangga nga sangkay.”
4 Pero pakabati hito ni Jesus nagsiring hiya: “Ito nga sakit diri magriresulta hin kamatayon kondi hin himaya han Dios, basi himayaon an Anak han Dios pinaagi hito.”
5 Hinigugma ni Jesus hira Marta, Maria, ngan Lasaro.
6 Pero han pakabati ni Jesus nga may sakit hi Lasaro, gintuyo niya nga magpabilin pa hin duha ka adlaw didto ha lugar nga iya ginkadtoan.
7 Katapos, nagsiring hiya ha mga disipulo: “Balik kita ha Judea.”
8 Ginsidngan hiya han mga disipulo: “Rabbi, diri pa la maiha karuyag han mga taga-Judea nga batuhon ka. Kay ano nga mabalik ka ngadto?”
9 Binaton hi Jesus: “Diri ba 12 ka oras an kaadlawon? Kon naglalakat ha kaadlawon an bisan hin-o, diri hiya nahipapakdol kay nakikita niya an kalamrag hini nga kalibotan.
10 Pero kon naglalakat ha gab-i an bisan hin-o, nahipapakdol hiya kay waray hiya kalamrag.”
11 Katapos magsiring hito ni Jesus, nagpadayon hiya: “Nakaturog an aton sangkay nga hi Lasaro, pero makadto ako basi pukawon hiya.”
12 Salit nagsiring ha iya an mga disipulo: “Ginoo, kon nakaturog hiya, mag-oopay hiya.”
13 Kondi naghihisgot hi Jesus han kamatayon ni Lasaro. Pero kahuna nira nga naghihisgot hiya han literal nga pagkaturog.
14 Tungod hito, klaro nga nagsiring ha ira hi Jesus: “Patay na hi Lasaro,
15 ngan para ha iyo kaopayan nga waray ako didto, basi tumoo kamo. Kadto kita ha iya.”
16 Salit hi Tomas, nga gintatawag nga An Kambal, nagsiring ha iya mga igkasi-disipulo: “Kadto liwat kita, bisan kita mamatay upod niya.”
17 Pag-abot ni Jesus, hinbaroan niya nga upat ka adlaw na nga iginlubong hi Lasaro.
18 An Betania hirani ha Jerusalem, mga tulo ka kilometro an distansya.
19 Salit damu nga Judio an kinadto kanda Marta ngan Maria basi liawon hira tungod ha kamatay han ira bugto.
20 Pakabati ni Marta nga tiabot hi Jesus, iya gintapo hiya; pero hi Maria nagliningkod la ha balay.
21 Nagsiring hi Marta kan Jesus: “Ginoo, kon nakanhi ka la, waray unta kamatay an akon bugto.
22 Pero maaram ako nga bisan yana anoman an imo aroon ha Dios, ihahatag niya ha imo.”
23 Ginsidngan hiya ni Jesus: “Mabubuhi an imo bugto.”
24 Binaton hi Marta: “Maaram ako nga mabubuhi hiya ha pamanhaw ha kataposan nga adlaw.”
25 Nagsiring ha iya hi Jesus: “Ako an pagkabanhaw ngan an kinabuhi. An nagpapakita hin pagtoo ha akon, bisan kon mamatay hiya, mabubuhi;
26 ngan an ngatanan nga buhi ngan nagpapakita hin pagtoo ha akon diri na gud mamamatay. Natoo ka ba hini?”
27 Binaton hiya: “Oo, Ginoo; natoo ako nga ikaw an Kristo nga Anak han Dios, an Usa nga makanhi ha kalibotan.”
28 Katapos niya magyakan hini, binalik hiya ngan gintawag an iya bugto nga hi Maria, ngan ginhuringan: “Inabot na an Magturutdo ngan ginpapatawag ka niya.”
29 Pakabati hini ni Maria, binuhát dayon hiya ngan kinadto kan Jesus.
30 Pero hi Jesus waray pa makasulod ha baryo, kay nakadto pa hiya ha lugar diin gintapo hiya ni Marta.
31 Hito nga oras may mga Judio nga kaupod ni Maria ha balay basi liawon hiya. Pakakita nira nga nagdali-dali pagtindog hi Maria ngan ginawas, sinunod hira ha iya kay kahuna nira nga makadto hiya ha lubnganan ngan didto magtatangis.
32 Pag-abot ni Maria didto ngan pakakita niya kan Jesus, hinapa hiya ha may tiilan ni Jesus ngan nagsiring: “Ginoo, kon nakanhi ka la, waray unta kamatay an akon bugto.”
33 Salit, han nakita ni Jesus nga nagtitinangis hi Maria ngan an iya kaupod nga mga Judio, nabantad gud an iya kasingkasing* ngan nasubo gud hiya;
34 ngan nagsiring hi Jesus: “Diin niyo hiya iginlubong?” Binaton hira: “Ginoo, kadi ngan kitaa.”
35 Nagtangis hi Jesus.
36 Salit nagsiring an mga Judio: “Kitaa, pinalangga gud niya hi Lasaro!”
37 Pero an iba ha ira nagsiring: “Ini nga tawo nga nagpukrat han mga mata han buta, waray ba makapugong han kamatayon ni Lasaro?”
38 Nabantad na liwat an kasingkasing ni Jesus, ngan kinadto hiya ha lubnganan. Usa ito nga lungib nga an ganghaan ginsadhan hin daku nga bato.
39 Nagsiring hi Jesus: “Kuhaa niyo an bato.” Hi Marta, an bugto han namatay, nagsiring: “Ginoo, mabaho na gud hiya kay ikaupat ka adlaw na yana.”
40 Nagsiring hi Jesus: “Diri ba ginsidngan ko ikaw nga kon tumoo ka makikita mo an himaya han Dios?”
41 Salit ginkuha nira an bato. Katapos hinangad hi Jesus ha langit ngan nagsiring: “Amay, nagpapasalamat ako ha imo nga ginpapamatian mo ako.
42 Maaram ako nga ginpapamatian mo ako pirme; pero nagyayakan ako tungod han mga tawo nga aanhi, basi tumoo hira nga ginsugo mo ako.”
43 Pakasiring niya hini, ginuliat hiya: “Lasaro, gawas ngadi!”
44 Ginawas an namatay nga tawo nga ginsangboran hin mga bendahe an mga tiil ngan kamot, ngan ginputos hin tela an nawong. Nagsiring hi Jesus ha ira: “Badbari hiya ngan palakta.”
45 Salit damu nga Judio nga kinadto kanda Maria ngan nakakita han ginbuhat ni Jesus an tinoo ha iya;
46 pero an iba ha ira kinadto ha mga Pariseo ngan nagsumat han mga ginbuhat ni Jesus.
47 Tungod hito, gintirok han punoan nga mga saserdote ngan han mga Pariseo an Sanhedrin* ngan nagsiring: “Ano an aton bubuhaton, kay ini nga tawo nagbubuhat hin damu nga milagro?
48 Kon pabay-an la naton hiya, hira ngatanan matoo ha iya, ngan makanhi an mga Romano ngan aagawon an aton lugar* pati an aton nasud.”
49 Pero an usa ha ira, hi Caifas, nga hitaas nga saserdote hito nga tuig, nagsiring ha ira: “Waray gud kamo hinbabaroan,
50 ngan diri kamo nakakasabot nga para ha iyo kaopayan nga mamatay an usa nga tawo para ha katawohan imbes nga mabungkag an bug-os nga nasud.”
51 Ini nga iya ginsiring diri iya kalugaringon nga mga ideya; pero tungod kay hiya an hitaas nga saserdote hito nga tuig, nagtagna hiya nga hi Jesus itinanda nga mamatay para ha nasud,
52 ngan diri la para ha nasud, kondi basi liwat niya matirok nga urosa an nagpapatlaag nga mga anak han Dios.
53 Salit tikang hito nga adlaw nagsarabot hira pagpatay ha iya.
54 Tungod hito, waray na hi Jesus maglinakat-lakat hin dayag ha mga Judio, pero binaya hiya ngan kinadto ha lugar hirani ha kamingawan, ha syudad han Efraim, ngan nagpabilin didto upod han iya mga disipulo.
55 Hirani na an Paskua han mga Judio, ngan damu nga tawo tikang ha kaumhan an kinadto ha Jerusalem antes han Paskua basi maglimpyo ha kalugaringon uyon ha Balaud.
56 Ginbiniling nira hi Jesus ngan samtang naninindog hira ha templo, nag-iristorya hira: “Ha iyo paghunahuna, diri gud ba hiya makanhi ha piyesta?”
57 Pero an punoan nga mga saserdote ngan an mga Pariseo nagsugo nga magsumat an bisan hin-o nga mahibaro kon hain hi Jesus, basi arestuhon nira hiya.
Mga footnote
^ Ha literal, “espiritu.”
^ Kitaa an footnote ha Mat 26:59.
^ Karuyag sidngon, “an templo.”
