Juan 16:1-33
16 “Ginyayakan ko ini ha iyo basi diri kamo mahipakdol.*
2 Paiiwason kamo han mga tawo tikang ha sinagoga. Ha pagkamatuod, maabot an oras nga an nagpapatay ha iyo maghuhunahuna nga nagbubuhat hiya hin sagrado nga pag-alagad ha Dios.
3 Pero bubuhaton nira ini tungod kay diri hira nakilala ha Amay o ha akon.
4 Kondi iginsusumat ko ini ha iyo basi kon mahitabo na ini, mahinumdom kamo nga iginsumat ko ini ha iyo.
“Pero hadto waray ko ini isumat ha iyo tungod kay kaupod pa ako niyo.
5 Yana tikadto ako ha nagsugo ha akon, pero waray ha iyo napakiana ha akon, ‘Makain ka?’
6 Tungod kay iginsumat ko ini ha iyo, napuno hin kasubo an iyo kasingkasing.
7 Pero susumatan ko kamo han kamatuoran, Para ha iyo kaopayan an akon pagbaya. Kay kon diri ako bumaya, diri gud makanhi ha iyo an parabulig; kondi kon bumaya ako, pakakanhion ko ito ha iyo.
8 Ngan kon umabot na ito nga parabulig, ipapakita hito ha kalibotan kon ano an sala, kon ano an matadong, ngan kon ano an paghukom han Dios:
9 siyahan, kon ano an sala, kay diri hira nagpapakita hin pagtoo ha akon;
10 sunod, kon ano an matadong, kay tikadto ako ha Amay ngan diri na niyo ako makikita;
11 katapos, kon ano an paghukom han Dios, kay ginhukman na an magmarando hini nga kalibotan.
12 “Damu pa an akon igsisiring ha iyo, pero diri kamo makakasabot hito yana.
13 Kon umabot an parabulig, an espiritu han kamatuoran, gigiyahan kamo niya basi masabtan niyo hin bug-os an kamatuoran, kay diri hiya magyayakan hin kalugaringon nga mga ideya, kondi an hinbabatian niya amo an iya igyayakan, ngan igsusumat niya ha iyo an mga mahitatabo.
14 Maghihimaya hiya ha akon, kay an hinbatian niya ha akon iya igpapahayag ha iyo.
15 Akon an ngatanan nga gintatag-iya han Amay. Ini an hinungdan nga nasiring ako nga an hinbatian niya ha akon, iya igpapahayag ha iyo.
16 Diri mag-iiha diri na ako niyo makikita, ngan diri liwat mag-iiha makikita ako niyo.”
17 Salit an iba han mga disipulo nag-iristorya: “Ano an karuyag sidngon han iya ginsiring, ‘Diri mag-iiha diri na ako niyo makikita, ngan diri liwat mag-iiha makikita ako niyo,’ ngan ‘tungod kay tikadto ako ha Amay’?”
18 Salit nagsiniring hira: “Ano an iya karuyag sidngon han ‘diri mag-iiha’? Diri naton masabtan an iya ginyiyinakan.”
19 Maaram hi Jesus nga karuyag nira magpakiana ha iya, salit nagsiring hiya: “Nagpapakianahay ba kamo basi hibaroan kon kay ano nga nagsiring ako: Diri mag-iiha diri na ako niyo makikita, ngan diri liwat mag-iiha makikita ako niyo?
20 Ha pagkamatuod susumatan ko kamo, Magtatangis kamo ngan magngunguyngoy, pero an kalibotan magrarayhak; masusubo gud kamo, pero an iyo kasubo magigin kalipay.
21 Kon nanganganak an babaye, naabat hiya hin kaul-ol; pero katapos manganak, diri na hiya nahinunumdom han kasakit tungod ha kalipay nga natawo na an iya anak.
22 Salit nasusubo liwat kamo yana, pero makikigkita utro ako ha iyo ngan magrarayhak kamo, ngan waray makakakuha han iyo kalipay.
23 Hito nga adlaw diri na gud kamo magpapakiana ha akon. Ha pagkamatuod susumatan ko kamo, Kon mangaro kamo ha Amay hin bisan ano, ihahatag niya ito ha iyo ha akon ngaran.
24 Tubtob yana waray pa kamo mangaro hin bisan usa ha akon ngaran. Pangaro ngan makarawat kamo, basi malipay gud kamo.
25 “Ginsisiring ko ini ha iyo pinaagi hin mga ilustrasyon. Maabot an panahon nga diri na ako magyayakan ha iyo pinaagi hin mga ilustrasyon, pero susumatan ko kamo hin klaro mahitungod han Amay.
26 Hito nga adlaw mangangaro kamo ha Amay ha akon ngaran; pero diri ini nangangahulogan nga ako an mangangaro para ha iyo.
27 Kay pinalangga kamo han Amay, tungod kay pinalangga niyo ako ngan natoo kamo nga kinanhi ako sugad nga representante han Amay.
28 Tikang ako ha Amay ngan kinanhi ako ha kalibotan. Yana mabaya ako ha kalibotan ngan mabalik ako ha Amay.”
29 Nagsiring an mga disipulo: “Nagyayakan ka yana hin klaro ngan diri na nagamit hin mga ilustrasyon.
30 Nasasabtan na namon yana nga maaram ka han ngatanan ngan diri kinahanglan magpakiana ha imo an bisan hin-o. Tungod hini, natoo kami nga tikang ka ha Dios.”
31 Nagsiring hi Jesus: “Natoo na ba kamo yana?
32 Kitaa! Hirani na gud umabot an oras nga magbuburublag kamo kay an tagsa ha iyo mauli ha iyo kalugaringon nga balay ngan babayaan niyo ako nga nag-uusahan; pero diri ako nag-uusahan kay kaupod ko an Amay.
33 Iginsusumat ko ini ha iyo basi pinaagi ha akon magkaada kamo kamurayawan. Ha kalibotan may kasakitan kamo, pero magmaisugon kamo! Gindaog ko an kalibotan.”
Mga footnote
^ O “makasala.” Kitaa an “Kahipakdol” ha Glossary.
