Juan 3:1-36
3 May Pariseo nga Nicodemo an ngaran, usa nga opisyal han mga Judio.
2 Usa ka gab-i, kinadto hiya kan Jesus ngan nagsiring: “Rabbi, maaram kami nga magturutdo ka nga tikang ha Dios, kay waray makakahimo hini nga mga milagro nga imo ginbubuhat kon diri hiya tagan han Dios hin gahum.”
3 Binaton ha iya hi Jesus: “Ha pagkamatuod susumatan ko ikaw, An usa nga tawo diri makakakita han Ginhadian han Dios kon diri hiya ig-anak utro.”*
4 Nagpakiana ha iya hi Nicodemo: “Paonan-o ig-aanak utro an usa nga tawo kon lagas na hiya? Makakasulod ba hiya ha tiyan han iya nanay basi ig-anak utro?”
5 Binaton hi Jesus: “Ha pagkamatuod susumatan ko ikaw, An usa nga tawo diri makakasulod ha Ginhadian han Dios kon diri hiya ig-anak utro pinaagi ha pagpabawtismo ha tubig ngan pagkarawat han baraan nga espiritu.
6 An igin-anak pinaagi han unod, unudnon; ngan an igin-anak pinaagi han espiritu, espirituhanon.
7 Ayaw kahipausa ha ginsiring ko ha imo, Kinahanglan ig-anak utro kamo.
8 An hangin nahuyop ha direksyon nga karuyag hito, ngan nababatian mo an tunog hito, pero diri ka maaram kon diin ito tikang ngan kon diin ito makadto. Sugad man, diri ka maaram kon paonan-o an usa igin-aanak pinaagi han espiritu.”
9 Nagpakiana ha iya hi Nicodemo: “Paonan-o ini mahitatabo?”
10 Binaton hi Jesus: “Magturutdo ka ha Israel, kay ano nga diri ka maaram hini?
11 Ha pagkamatuod susumatan ko ikaw, An amon hinbabaroan ginyayakan namon ngan an amon nakikita iginsusumat namon, pero diri niyo kinakarawat an amon iginsusumat.
12 Kon diri kamo natoo han akon iginsusumat ha iyo mahitungod han mga butang ha tuna, paonan-o kamo matoo kon sumatan ko kamo mahitungod han mga butang ha langit?
13 Waray pa tawo nga sinaka ha langit labot la han linusad tikang ha langit, an Anak han tawo.
14 Ngan sugad la nga ginbitay ni Moises an halas didto ha kamingawan, kinahanglan bitayon liwat an Anak han tawo,
15 basi an bisan hin-o nga natoo ha iya magkaada kinabuhi nga waray kataposan.
16 “Hinigugma gud han Dios an kalibotan salit iginhatag niya an iya bugtong nga Anak basi an tagsa nga nagpapakita hin pagtoo ha iya diri mamatay kondi magkaada kinabuhi nga waray kataposan.
17 Ginsugo han Dios an iya Anak nganhi ha kalibotan, diri basi hukman an kalibotan, kondi basi matalwas an kalibotan pinaagi ha iya.
18 An nagpapakita hin pagtoo ha iya diri huhukman. An diri nagpapakita hin pagtoo ginhukman na, kay diri hiya nagpapakita hin pagtoo ha ngaran han bugtong nga Anak han Dios.
19 Ini an basihan han paghukom, nga an kalamrag kinanhi ha kalibotan kondi hinigugma han mga tawo an kasisidman imbes nga an kalamrag, kay maraot an ira mga buhat.
20 Kay an nagbubuhat hin magraot nasisina ha kalamrag ngan diri nahirani ha kalamrag, basi diri sawayon an iya mga buhat.
21 Kondi an nagbubuhat hin maopay nahirani ha kalamrag basi makita an iya mga buhat nga uyon ha kaburut-on han Dios.”
22 Katapos hini, hi Jesus ngan an iya mga disipulo kinadto ha kaumhan han Judea, ngan nakig-upod hiya ha ira didto hin pipira ka adlaw ngan nanbawtismo.
23 Pero hi Juan nanbabawtismo liwat didto ha Enon hirani ha Salim, kay damu didto an tubig, ngan an mga tawo napakadto ngan ginbabawtismohan.
24 Hito nga panahon diri pa priso hi Juan.
25 Katapos nakigdiskusyon an mga disipulo ni Juan ha usa nga Judio mahitungod han paglimpyo uyon ha mga surundon.
26 Sunod, kinadto hira kan Juan ngan nagsiring: “Rabbi, an tawo nga kaupod mo ha tabok han Jordan nga mahitungod ha iya nagpamatuod ka, kitaa, nanbabawtismo hiya ngan an ngatanan napakadto ha iya.”
27 Nagsiring hi Juan: “An usa nga tawo diri magkakaada hin bisan usa nga butang labot la kon ihatag ito ha iya tikang ha langit.
28 Kamo mismo mga testigo nga nagsiring ako, Diri ako an Kristo, kondi ginsugo ako nga mag-una ha iya.
29 An tag-iya han maarasawa amo an karaslon nga lalaki. Pero an sangkay han karaslon nga lalaki nga natindog hirani han karaslon nalilipay gud kon nakakabati han iya tingog. Salit daku gud ini nga akon kalipay.
30 Hiya padayon nga madudugangan, pero ako padayon nga maiibanan.”
31 An napakanhi tikang ha igbaw amo an labaw ha ngatanan. An tikang ha tuna, tikang ha tuna ngan nagyayakan mahitungod han mga butang ha tuna. An napakanhi tikang ha langit amo an labaw ha ngatanan.
32 Nagpapamatuod hiya mahitungod han iya nakita ngan nabatian, pero waray tawo nga nakarawat han iya pamatuod.
33 An nakarawat han iya pamatuod natoo* gud nga an Dios nagyayakan han kamatuoran.
34 An ginsugo han Dios nagyayakan han mga pulong han Dios, kay diri limitado* an iya paghatag han espiritu.
35 Hinigugma han Amay an Anak ngan gintagan hiya hin awtoridad ha ngatanan nga butang.
36 An nagpapakita hin pagtoo ha Anak may kinabuhi nga waray kataposan; an diri nasugot ha Anak diri magkakaada hin kinabuhi, kondi padayon nga kangangalasan hiya han Dios.
Mga footnote
^ Ha literal, “ig-anak tikang ha kahitas-an.”
^ Ha literal, “nagbutang han iya selyo.”
^ O “sinukol.”
