Lekwalo la Bakolosa 2:1-23

  • Keresete ke sephiri se se boitshepo sa Modimo (1-5)

  • Ikeleng tlhoko gore lo se ka lwa tsiediwa (6-15)

  • Selo sa mmatota ke sa ga Keresete (16-23)

2  Ke batla gore lo lemoge gore ke kgaratlha go le kana kang ke leka go thusa lona le ba ba kwa Laodikia+ le botlhe ba ba iseng ba mpone.*  Ke dira jalo gore ba tle ba gomotsege+ le gore ba kopanngwe mmogo ka lorato.+ Seno se tla dira gore ba nne le dikhumo tse dintsi, e leng gore ba tlhaloganye sentle sephiri se se boitshepo sa Modimo, e bong Keresete, le gore ba nne le kitso e e boammaaruri ka sone.+  Matlotlo otlhe a botlhale le a kitso a fitlhilwe mo go ene.+  Ke bua jaana gore go se ka ga nna le motho ope yo o lo tsietsang ka maaka.  Gone le fa ke se na le lona, ke nna ke akantse ka lona, ke itumelela go utlwa gore lo dira dilo ka thulaganyo+ le gore lo tshepa Keresete ka pelo yotlhe.+  Ka jalo, e re ka lo amogetse Keresete Jesu Morena wa rona, tswelelang lo mo ikobela.  Fela jaaka lo ithutile, tumelo ya lona mo go Keresete e tshwanetse go lo nonotsha le go lo tiisa jaaka setlhare se medi ya sone e nweleletseng kwa teng.+ Tumelo ya lona e tshwanetse go gola fa lo leboga Modimo ka metlha.+  Ikeleng tlhoko gore ope a se ka a lo digela mo seraing* a dirisa botlhale jwa lefatshe le maaka,+ e leng dilo tse di sa tsweng mo go Keresete mme di tswa mo dingwaong tsa batho le mo dikakanyong tsa lefatshe;  gonne Keresete o na le botho jo bo tshwanang le jwa Modimo.+ 10  Ka jalo, ga lo tlhaele sepe ka ntlha ya gagwe, ene yo e leng tlhogo ya dipuso tsotlhe le balaodi.+ 11  E re ka lo atamalane le ene, ga lo a ka lwa rupa jaaka batho ba dira mme lo rupile ka go tlogela se se ratiwang ke mmele wa lona o o nang le boleo.+ Eno ke tsela e batlhanka ba ga Keresete ba tshwanetseng go rupa ka yone.+ 12  Gonne lo ne lwa fitlhwa le ene ka go kolobediwa ka kolobetso e e tshwanang le ya gagwe,+ mme e re ka lo atamalane le ene lo ne lwa tsosiwa mmogo+ ka gonne lo dumela mo ditirong tse di maatla tsa Modimo, yo o neng a mo tsosa mo baswing.+ 13  Mo godimo ga moo, le fa lo ne lo sule ka ntlha ya maleo a lona e bile lo sa rupa, Modimo o ne a dira gore lo tshele gore lo nne mmogo le Keresete.+ O ne a ikemisetsa go itshwarela maleo a rona otlhe+ 14  a bo a phimola lekwalo le le kwadilweng ka seatla+ le le neng le na le ditaelo+ e bile le ganetsana le rona.+ O ne a le tlosa ka go le kokotela mo koteng ya tlhokofatso.*+ 15  O ne a fenya dipuso le balaodi mme a bontsha mongwe le mongwe gore o di fentse+ mme di bo di tla di mo setse morago jaaka magolegwa. 16  Ka jalo, a motho ope a se ka a lo atlhola ka se lo se jang le ka se lo se nwang+ kgotsa ka go keteka moletlo mongwe kgotsa ngwedi yo mosha*+ kgotsa sabata.+ 17  Gonne dilo tseo ke moriti wa dilo tse di tlang,+ mme selo sa mmatota ke Keresete.+ 18  Ikeleng tlhoko mo bathong ba ba ikokobetsang fela gore ba bonwe ke batho e bile ba obamela baengele,* ka gonne ga ba batle gore lo amogele sekgele.+ Batho bao, ba ngangatlela dilo tse ba di bonang e bile ba ikgantsha ka dikakanyo tsa bone tse di se nang mosola, 19  mme ga ba ikobele tlhogo,+ ene yo o otlang mmele otlhe e bile a o kopanya mmogo ka ditokololo le mesifa gore o gole ka maatla a Modimo.+ 20  Fa e le gore lo ne lwa swa mmogo le Keresete e bile lo ganne dikakanyo tsa lefatshe,+ ke ka ntlha yang fa lo tshela jaaka e kete lo karolo ya lefatshe ka go tswelela lo ikobela ditaelo tseno:+ 21  “O se ka wa tshwara, wa latswa kgotsa wa kgoma sepe”? 22  Gonne dilo tseno tsotlhe di a nyelela fa di dirisiwa e bile ke ditaelo le dithuto tse batho ba di rutang.+ 23  Le fa dilo tseo di lebega di dira gore batho ba nne botlhale, ga di ba thuse go lwantsha dikeletso tsa bone tse di sa siamang.+ Seo se direga ka gonne batho ba itirela tshwetso ya gore ba batla go obamela Modimo jang, ba ikokobetsa fela gore ba bonwe ke batho e bile ba utlwisa mebele ya bone botlhoko.

Dintlha Tse di Kwa Tlase

Seger., “ba bone sefatlhego sa me mo nameng.”
Kgotsa “ope a se ka a lo dira legolegwa.”
Kgotsa “ba obamela ka tsela e baengele ba obamelang ka yone.”