Fetela kwa tshedimosetsong

Dihele ke Eng? A ke Lefelo le Batho ba Tlhokofadiwang ka Bosakhutleng Kwa go Lone?

Dihele ke Eng? A ke Lefelo le Batho ba Tlhokofadiwang ka Bosakhutleng Kwa go Lone?

Karabo ya Baebele

Dithanolo dingwe tsa Baebele di dirisa lefoko “dihele” fa di ranola lefoko la Sehebera “Sheole” le le le tshwanang le lone la Segerika e leng “Hadese,” mme mafoko ano ka bobedi a kaya lebitla le le tlwaelegileng. (Pesalema 16:10; Ditiro 2:27) Batho ba le bantsi ba dumela gore go na le molelo wa dihele jaaka go bontshitswe mo setshwantshong sa bodumedi se se tlhagang mo setlhogong seno. Mme Baebele yone ga e rute jalo.

  1. Batho ba ba leng kwa diheleng ga ba itse sepe ka jalo ba ka se utlwe botlhoko bope. “Ga go na tiro le fa e le go loga maano le fa e le kitso le fa e le botlhale kwa Sheole.”—Moreri 9:10.

  2. Batho ba ba siameng ba ya diheleng. Banna ba ba ikanyegang e bong Jakobe le Jobe ba ne ba itse gore ba tla ya diheleng.—Genesise 37:35; Jobe 14:13.

  3. Kotlhao ya boleo ke loso, e seng go tlhokofadiwa kwa diheleng. “Yo o suleng o golotswe mo boleong.”—Baroma 6:7.

  4. Go tlhokofatsa batho ka bosakhutleng go ne go tla bo go kaya gore Modimo ga a na tshiamiso. (Duteronome 32:4) Fa motho wa ntlha e bong Adame a sena go leofa, Modimo o ne a mo raya a re kotlhao ya gagwe ke gore o ne a ka se tlhole a nna gone: “O lorole mme o tla boela mo loroleng.” (Genesise 3:19) Modimo o ne a tla bo a buile maaka fa e le gore o ne a isa Adame kwa molelong wa dihele.

  5. Go tlhokofatsa batho ka bosakhutleng ke selo se Modimo a sa se akanyeng gotlhelele. Kgang ya gore Modimo o tla otlhaya batho kwa molelong wa dihele ga e dumalane le thuto ya Baebele ya gore “Modimo ke lorato.”—1 Johane 4:8; Jeremia 7:31.