Kailangan ng mga bata ng adultong papatnubay at magpapayo sa kanila. Bilang magulang, ikaw talaga ang nasa kalagayang magbigay nito. Ang totoo, pananagutan mo iyan. Pero puwede rin silang matuto sa ibang adulto.

Sa maraming lupain, ang mga kabataan ay bihirang makisama sa mga adulto. Pansinin ito:

• Mas maraming oras ang ginugugol ng mga bata sa paaralan, kung saan mas maraming estudyante kaysa sa mga guro at iba pang adulto.

• Pagkatapos ng klase, mag-isa na lang sa bahay ang ilang kabataan dahil nasa trabaho ang kanilang mga magulang.

• Ayon sa isang pag-aaral sa United States, ang mga batang edad 8 hanggang 12 ay gumugugol ng mga anim na oras sa panonood ng TV, pakikinig ng musika, at paglalaro ng mga video game. *

Sinasabi ng aklat na Hold On to Your Kids: “Ang mga kabataan ay nagpapaturo, nagpapahubog, at nagpapagabay, hindi sa kanilang nanay, tatay, guro, at iba pang responsableng adulto, kundi sa . . . kanilang mga kaedad.”

Maglaan ng panahon sa iyong mga anak.

PRINSIPYO SA BIBLIYA: “Sanayin mo ang bata sa landas na dapat niyang lakaran; kahit tumanda siya, hindi siya lilihis dito.”—Kawikaan 22:6.

Normal sa mga bata na umasa sa patnubay ng kanilang magulang. Ang totoo, sinasabi ng mga eksperto na mas pinahahalagahan pa rin ng mga nagtitin-edyer ang payo ng kanilang mga magulang kaysa sa kanilang mga kaedad. “Mga magulang pa rin ang may pinakamalaking impluwensiya sa ugali at paggawi ng kanilang mga anak hanggang sa maging tin-edyer at adulto ang mga ito,” ang isinulat ni Dr. Laurence Steinberg sa aklat na You and Your Adolescent. Sinabi pa niya: “Gustong malaman ng mga kabataan ang iniisip mo, at nakikinig sila sa sinasabi mo kahit hindi sila laging sang-ayon sa lahat ng iyon.”

Samantalahin ang tendensiya ng iyong anak na umasa sa iyo para sa patnubay. Gumugol ng panahon kasama ng iyong mga anak at sabihin sa kanila ang mga pananaw, pamantayan, at mga karanasan mo.

 Bigyan siya ng magtuturo sa kaniya.

PRINSIPYO SA BIBLIYA: “Ang lumalakad na kasama ng marurunong ay magiging marunong.”—Kawikaan 13:20.

May naiisip ka bang huwarang adulto na puwedeng tumulong sa iyong anak na tin-edyer? Puwede mong isaayos na makasama siya ng anak mo. Siyempre, hindi mo dapat talikuran ang pananagutan mo bilang magulang. Pero makakatulong sa pagsasanay mo sa iyong anak ang pampatibay-loob mula sa isang mapagkakatiwalaang adulto na alam mong hindi magpapahamak sa kaniya. Halimbawa, sa Bibliya, kahit ang adultong si Timoteo ay nakinabang nang husto sa pakikisama kay apostol Pablo, at ganoon din naman si Pablo.—Filipos 2:20, 22.

Sa ngayon, maraming pamilya ang nakatira malayo sa kanilang mga lolo’t lola, tiyo, tiya, at iba pang kamag-anak. Kung ganiyan ang pamilya mo, gumawa ng paraan para matuto ang mga anak mong tin-edyer mula sa mga adultong may mga katangian na gusto mong tularan nila.