Mga Kawikaan 22:1-29

22  Ang magandang pangalan* ay mas dapat piliin kaysa sa malaking kayamanan;+Ang paggalang* ng iba ay mas mabuti kaysa sa pilak at ginto.   May pagkakatulad* ang mayaman at mahirap: Pareho silang ginawa ni Jehova.+   Nakikita ng matalino ang panganib at nagtatago,Pero tulóy lang ang mga walang karanasan at pinagdurusahan ang epekto* nito.   Ang resulta ng kapakumbabaan at pagkatakot kay JehovaAy kayamanan, karangalan, at buhay.+   May mga tinik at bitag sa landas ng liko,Pero ang nagpapahalaga sa buhay niya ay lumalayo sa mga ito.+   Sanayin mo ang bata* sa landas na dapat niyang lakaran;+Kahit tumanda siya, hindi siya lilihis dito.+   Ang mayaman ang namamahala sa mahihirap,At ang nanghihiram ay alipin ng nagpapahiram.+   Ang naghahasik ng kasamaan ay aani ng kapahamakan,+At ang tungkod ng galit niya ay babaliin.*+   Ang bukas-palad* ay pagpapalain,Dahil hinahatian niya ng kaniyang pagkain ang mahihirap.+ 10  Palayasin mo ang mapanghamak,At mawawala ang pag-aaway;Matitigil ang mga pagtatalo* at pang-iinsulto. 11  Ang taong malinis ang puso at mabait magsalitaAy magiging kaibigan ng hari.+ 12  Iniingatan ni Jehova ang kaalaman,Pero binibigo niya ang mga salita ng taksil.+ 13  Sinasabi ng tamad: “May leon sa labas! Mapapatay ako sa gitna ng liwasan!”*+ 14  Ang bibig ng masasamang* babae ay malalim na hukay.+ Mahuhulog doon ang hinatulan ni Jehova. 15  Ang kamangmangan ay nakatali sa puso ng bata,*+Pero aalisin ito ng pamalong pandisiplina.+ 16  Ang nandaraya sa dukha para mas yumaman pa+At ang nagreregalo sa mayayamanAy tiyak na maghihirap. 17  Magbigay-pansin ka* at makinig sa mga salita ng marurunong+Para maiayon mo ang puso mo sa aking kaalaman,+ 18  Dahil magandang maitanim iyon sa puso mo+Para iyon ang laging lumabas sa mga labi mo.+ 19  Para kay Jehova ka magtiwala,Binibigyan kita ngayon ng kaalaman. 20  Hindi ba sumulat na ako sa iyo noonPara magbigay ng payo at kaalaman, 21  Para ituro sa iyo ang katotohanan at maaasahang mga salita,Para makapagbigay ka ng tumpak na ulat sa nagsugo sa iyo? 22  Huwag mong nanakawan ang dukha dahil mahirap siya,+At huwag mong aapihin ang maralita sa pintuang-daan ng lunsod,+ 23  Dahil si Jehova mismo ang magtatanggol sa kanilang usapin,+At papatayin niya ang nandaraya sa kanila. 24  Huwag kang makisama sa taong mainitin ang uloO makipagkaibigan sa taong magagalitin, 25  Para hindi mo matutuhan ang mga landas niyaAt ikaw mismo ang mabitag.+ 26  Huwag kang makisama sa mga nakikipagkamay para sa isang kasunduan,Sa mga nananagot sa mga pautang.+ 27  Kung wala kang pambayad,Kukunin nila ang hinihigaan mo! 28  Huwag mong iuusod ang muhon*Na matagal nang inilagay ng mga ninuno mo.+ 29  Nakakita ka na ba ng taong mahusay sa gawain niya? Tatayo siya sa harap ng mga hari;+Hindi siya tatayo sa harap ng karaniwang mga tao.

Talababa

O “Ang magandang reputasyon.” Lit., “Ang pangalan.”
Lit., “pagsang-ayon.”
Lit., “Nagkita.”
O “parusa.”
O “kabataan.”
O “At ang kalupitan niya ay magwawakas.”
Lit., “Ang may mabuting mata.”
O “demandahan.”
O “plaza.”
Lit., “estrangherong.” Tingnan ang Kaw 2:16.
O “kabataan.”
Lit., “Ikiling mo ang iyong tainga.”
Tanda ng hangganan.

Study Notes

Media