Isaías 48:1-22
48 Gudxawíín rígi̱, bi̱ kuwáanʼ náa goʼwóo Jacob,ikháanʼla bi̱ nu̱ta̱ rí nindxa̱la xa̱bu̱ xuajin Israel,+ga̱jma̱a̱ ikháanʼla bi̱ naguwa̱ʼ náa Judá,ikháanʼla bi̱ nu̱xna̱ ajngála ga̱jma̱a̱ numuu mbiʼyuu Jeobá,+ga̱jma̱a̱ bi̱ nugri̱ga̱a̱ Dios ndrígóo Israel,maski ajndu tséni̱ ga̱jma̱a̱ xúgíʼ a̱jkia̱la, ma̱ngaa tséni̱ xó má kaʼyoo.+
2 Numuu rí ikhiin nuthi rí kúwíin náa xuajin rí kaʼwu+ga̱jma̱a̱ nduyáʼ rí mambáñún Dios ndrígóo Israel,+bi̱ mbiʼyuu Jeobá bi̱ naʼtáñajúúnʼ ángeles.
3 “Asndu nákha niʼníí má ni̱tha̱ dí nirígá nákha ginii.
Ikhúún má ni̱tha̱ga̱jma̱a̱ ni̱ni̱ rí muniʼnuuʼ.+
Mbá nacha̱ ni̱ni̱ ga̱jma̱a̱ ni̱jkha̱nú nirígá.+
4 Numuu rí nda̱yo̱o̱ dí gújkhúʼ a̱jkia̱a̱nʼga̱jma̱a̱ dí níjthúu rexa̱a̱ʼ nindxu̱u̱ xóo hierro ga̱jma̱a̱ xkídaaʼ nindxu̱u̱ xóo cobre,+
5 ni̱tha̱a̱nʼ asndu nákha wajyúuʼ.
Nákha xóó tsérígá ni̱tha̱a̱nʼ, mu xárata: ‹Rígi̱ niʼni xándiúʼ,niʼtáñajunʼ dí maguma rígi̱ xándiúʼ bi̱ nigumariya̱a̱ bi̱ gúʼdáa,ma̱ngaa xtiʼkhuu dí niguma ga̱jma̱a̱ ajua̱nʼ›.*
6 Nitadxawíín ga̱jma̱a̱ nitayáá xúgíʼ rígi̱.
Lá xárata ráʼ.+
Asndu nákha xúgi̱ natha̱a̱nʼ rí nuxi̱ʼ,+dí niyejxí ngo̱ʼo̱o̱ dí ikháán tsétatsinuuʼ.
7 Xúgi̱ dí xtáa ragumawíi, raʼkháa nákha wajyúuʼ,nindxu̱u̱ rí nditháan tátadxawíínga̱jma̱a̱ rí xúgi̱ xtaa ratadxawíín, mu xárata: ‹Nda̱yo̱o̱ má›.
8 Na̱nguá, na̱nguá nitadxawíín+ ga̱jma̱a̱ na̱nguá nitayáá,numuu rí nákha wajyúuʼ na̱nguá nitagíʼ cháʼwáanʼ matadxawíín.
Numuu rí ikhúún nda̱yo̱o̱ dí ikháán natatsíñúʼ má xúʼko̱,+ga̱jma̱a̱ nigumbiʼyaaʼ bi̱ naʼni aʼkhá asndu nákha nigumáán.+
9 Mú, ga̱jma̱a̱ numuu mbiʼyuʼ, maniʼñúuʼ rakásngañuʼ,+mu xúʼko̱ maguma mbu̱u̱n,marikhoo dí nakásngañu̱ʼ ga̱jma̱a̱ xáxíña̱a̱n.+
10 ¡Atayáá! Ni̱ni̱ rí ma̱nindxa̱a̱ʼ itháan májáanʼ xa̱bu̱, mú raʼkháa xóo mbá plata.+
Ga̱jma̱a̱ niniʼñúuʼ rí matamíniiʼ* mu xúʼko̱ ma̱nindxa̱a̱ʼ májáanʼ xa̱bu̱, xóo mbá ajua̱nʼ rí nuxuda̱ʼ náa horno.+
11 Ma̱ni̱ ga̱jma̱a̱ numuu mbiʼyuʼ ikhúún,+numuu rí xániʼñúuʼ rí muni̱ tsagáá mbiʼyuʼ+
ga̱jma̱a̱ xániʼñúuʼ rí gamajkhu dí nagruígú magruigú i̱mba̱a̱.
12 Atadxawunʼ Jacob, ikháán Israel bi̱ ikhúún nindxa̱ʼo̱o̱.
Ikhúún tsériʼkuminaʼ.+ Ikhúún nindxu̱ʼ bi̱ ginii ga̱jma̱a̱ bi̱ iwáá kayuuʼ.+
13 Niʼgíʼ ku̱ba̱ʼ ga̱jma̱a̱ ñawúnʼ,+ga̱jma̱a̱ ñawún mújúnʼ ni̱ni̱ mekhu.+
Índo̱ nandxa̱ʼwu̱u̱n, xúgíinʼ ikhiin naguwáʼ.
14 Gugimbumíjná xúgiáanʼ ikháanʼ ga̱jma̱a̱ gudxawíín.
Tsáá mbáa dí ikhiin niʼthí rígi̱ rá.
Ikhaa bi̱ Jeobá nindoo kaʼyoo,+
mu xúʼko̱ maʼnimbánuu rí nandoo náa Babilonia,+ma̱ngaa maxnún ga̱jma̱a̱ ñawúunʼ xa̱bu̱ caldeos.+
15 Ikhúún mínuuʼ má ni̱tha̱ ga̱jma̱a̱ nindxa̱ʼo̱o̱.+
Ni̱ʼkhá ka̱ya̱a̱ ga̱jma̱a̱ magajnúu májánʼ rí maʼni.+
16 Guxuʼmamijná náa ikhúún ga̱jma̱a̱ gudxawíín rígi̱.
Asndu nákha nigi̱ʼdu̱u̱, ikhúún na̱nguá ni̱tha̱ ngu̱ʼwa̱á.+
Ga̱jma̱a̱ índo̱ nirígá, ikhúún xtáá ikhí”.
Rí xúgi̱ Tátá Jeobá bi̱ itháán Mba̱a̱, nikuʼmún ikhúún ga̱jma̱a̱ nixnúʼ* tsiaki̱i̱ ndrígóo.
17 Rígi̱ dí naʼthí Jeobá, bi̱ Niʼtsiríña̱a̱nʼ, bi̱ Kaʼwii náa Israel:+
“Ikhúún nindxu̱ʼ Jeobá Dios ndrígáaʼ,bi̱ naʼsngáa mu maraxtaa májánʼ,*+bi̱ naʼtháanʼ náa kamba̱a̱ gíʼmaa mi̱dxu̱ʼ.+
18 ¡Mbá péñu, atagíʼ edxa̱a̱ʼ matadxawíín kiʼtáñajunʼ ndrígóʼ!+
Ikhú maraxtaa tsímáá xóo mbá mañu,+ ga̱jma̱a̱ rí májánʼ dí natani̱mani̱ndxu̱u̱ xóo iyaʼ rí nambujxu̱u̱ má xúʼko̱ náa lamáa.*+
19 Bi̱ gáguwáʼ náa ikháán mani̱ndxu̱ún xóo jui̱ʼi̱,ga̱jma̱a̱ e̱jña̱a̱ʼ maʼni mbaʼin xóo jui̱ʼi̱ dí rígá náa rawuunʼ lamáa.+
Mbiʼñún ikhiin nditháan xáguma jngudi̱i̱”.
20 ¡Gagajnáaʼ náa Babilonia!+
¡Guga̱yála náa xa̱bu̱ caldeos!
¡Gu̱tha̱ ga̱jma̱a̱ gagi! ¡Gu̱tha̱la!+
Gu̱ni̱ dí mawárígo̱o̱ asndu náa naguámbári̱go̱o̱ ku̱ba̱ʼ.+
Gu̱tha̱: “Jeobá ni̱ʼtsi̱ríya̱a̱ʼ Jacob bi̱ nindxu̱u̱ xa̱bi̱i̱.+
21 Ikhiin na̱nguá nikándawúúnʼ índo̱ ni̱jkha̱ kagui̱i̱n náa ku̱ba̱ʼ mijxooʼ.+
Ga̱jma̱a̱ niʼni rí náa tsíñu magajnúu iyaʼ mu muwa̱a̱n,nikuíʼthá tsíñu ga̱jma̱a̱ nigájnuu mba̱ji̱nʼ iyaʼ”.+
22 “Na̱nguá kúwá tsímáá xa̱bu̱ ra̱míjíinʼ”, eʼthí Jeobá.+
