Isaías 26:1-21
-
Ajmúú rí nasngájma dí nakumu̱ún kuyáá Dios ga̱jma̱a̱ rí naguma káwíin (1-21)
26 Mbiʼi rúʼko̱ muni̱ ajmúú rígi̱ náa ku̱ba̱ʼ Judá:
“Kuáʼdááxu̱ mbá xuajin dí wíji̱ gújkhúʼ.
Ikhaa maʼni dí náa maguma káwíin mani̱ndxu̱u̱ xóo xtájtsí o mbá dí nañewu̱u̱n xuajin.*
2 Gurmbáʼtáá xkrugua mu mato̱ʼo̱o̱ xuajin dí naʼni rí májánʼ,mbá xuajin dí naʼni má xúʼko̱ dí nindxu̱u̱ jmbu.
3 Matie̱wu̱u̱n bi̱ naku̱mu̱ún kuyaaʼ* ga̱jma̱a̱ xúgíʼ a̱jkiu̱ún,matani̱ dí marigá má xúʼko̱ tsímáá náa ikhiin,numuu dí nakumu̱ún kuyaaʼ.
4 Gakumala kuya̱a̱ Jeobá asndu kámuu,numuu dí Jeobá,* Jeobá nindxu̱u̱ xóo Itsí mba̱a̱ dí rígá asndu kámuu.
5 Ikhaa nagruiguíin bi̱ kúwá náa mitsídánʼ,na̱da̱ʼ mbayííʼ, xuajin dí grígu náa mitsídánʼ,na̱da̱ʼ náa tsu̱du̱u̱ ku̱ba̱ʼ,ga̱jma̱a̱ náa yujndaʼ.
6 Mujngupriga̱ ga̱jma̱a̱ rajkhúún bi̱ naguma ngíníi,ga̱jma̱a̱ mujngupriga̱ bi̱ ndawa̱a̱ tsáa mambáñún”.
7 Kambu̱ún bi̱ míjíinʼ nindxu̱u̱ jmbu.*
Ikháán nindxa̱a̱ʼ jmbii,ikha jngóo matanimbáníi kambu̱ún bi̱ jmbiin.
8 Jeobá, índo̱ na̱jkuáxu̱ náa kamba̱a̱ʼ,nuguáʼti̱i̱nxu náa ikháán.
Ndu̱ya̱a̱xu dí gíʼdoo numuu mbiʼyaaʼ, nanduxuʼ dí marmáʼáan a̱jkiu̱ún kuyáá.
9 Dí mbruʼun nandoʼ mba̱ya̱a̱ʼ ga̱jma̱a̱ xúgíʼ a̱jkiu̱nʼ,*xúʼko̱, asndu nadxu̱ʼ eʼñáánʼ,numuu dí índo̱ ikháán gátanda̱ʼa̱a̱ cuenta náa tsu̱du̱u̱ ku̱ba̱ʼ,xa̱bu̱ bi̱ kúwá ikhí mbuyáá dí ikháán natani̱ rí májánʼ.
10 Maski ajndu bi̱ ra̱májáanʼ nagumaa dí májánʼ,mú ikhaa xájmañuu maʼni dí májánʼ.
Asndu náa ku̱ba̱ʼ dí naguma rí jmbu maʼni dí ra̱májánʼ,ikhaa xáʼyoo rí naʼtáñajunʼ Jeobá.
11 Jeobá, nataxruíya̱ʼ ñawáanʼ, mú ikhiin tséyáá.
Mati̱ñu̱u̱nʼ índo̱ gúyáá dí ikháán ra̱ʼkhá tháán eyaaʼ xtayáá xuajñanʼ.
Xúʼko̱, aguʼ dí maguma gámbíin ga̱jma̱a̱ xa̱bu̱ sia̱nʼ ndrígáaʼ matsikíin.
12 Jeobá, ikháán matani̱ dí makuwáanʼxu tsímáá,numuu rí xúgíʼ dí ni̱ni̱xuikháán nitani̱ náa ikháanʼxu̱.
13 Jeobá, Dios ndrígúxu̱, nitañajunxu eʼwíinʼ xa̱bu̱,mú ikháanʼ ni̱ni̱xu mba̱a̱ mbiʼyaaʼ i̱ndó ikháán.
14 Ikhiin nikháñún, ni xákúwá.
Bi̱ nikháñún bi̱ nánguá guáʼdáá tsiaki̱i̱, ni xátujxi̱ín.
Numuu dí nitangaánʼ xtiin mu matani̱ gámbíinmu xa̱bu̱ ni xármáʼáan a̱jkiu̱ún kuñún.
15 Nitani̱ dí maʼni mba̱a̱ xuajin, Jeobá,nitani̱ dí maʼni mba̱a̱ xuajin,nitani̱ dí maguma mba̱a̱n.
Nitani̱ dí maʼni ma̱ja̱nʼ ndawaa náa ku̱ba̱ʼ rígi̱.
16 Jeobá, índo̱ nikúwá ngíná nixuʼmamijná náa inaaʼ,wáwáa nitakáñaaʼ índo̱ nitani̱ dí mumíniiʼ.
17 Xóo mbáa a̱ʼgu̱ bi̱ kaguewáan ada̱,* bi̱ inu magiʼdaa a̱ʼdióo,naxnúu ga̱ʼkhu̱ ga̱jma̱a̱ nandxaʼwá dí na̱ʼkhui̱i̱,xúʼko̱ kaʼnii nikúwáanʼxu ga̱jma̱a̱ numaaʼ, Jeobá.
18 Nidaéwíinʼxu e̱ji̱n, nixnúxu̱ ga̱ʼkhu̱ dí muguáʼdíinʼxu e̱ji̱n,mú dí muguáʼdáaxu ada̱ nindxu̱u̱ xóo giñánʼ.
Táʼnguxu gágúwáʼ ku̱yuxu̱ dí maʼni káwíin xa̱bu̱ bi̱ kúwá náa ku̱ba̱ʼ rígi̱,ga̱jma̱a̱ tségumaa nimbáa mu maxtáa ikhí.
19 “Xa̱bia̱a̱ʼ bi̱ nikháñún, makuwá.
Xa̱bi̱ʼ bi̱ nikháñún,* matujxi̱ín.
¡Guguajxu̱u̱nʼ, asndu nadxa̱la gúndxa̱ʼwa̱,ikháanʼ bi̱ kuwáanʼla náa yujndaʼ!
Numuu dí xuájyaaʼ nindxu̱u̱ xóo xuájyaʼ dí nagajtaa miʼcha̱,*ku̱ba̱ʼ maniñuuʼ rí bi̱ nikháñún bi̱ nánguá guáʼdáá tsiaki̱i̱ matangi̱ín makuwá.*
20 Xuajñunʼ, ata̱ʼa̱a̱ʼ náa guʼwáaʼ náa cuarto dí rígá itháan awúúnga̱jma̱a̱ atrugua̱a̱ xkruguaaʼ índo̱ gáta̱ʼa̱a̱ʼ awúún.
Atarkaʼwuminaʼ mbá xngaaasndu índo̱ gánújngoo rí nakásngañu̱ʼ.
21 ¡Atayáá!, Jeobá na̱ʼkha̱ asndu náa xtáamu mandi̱ʼi̱ín cuenta xa̱bu̱ bi̱ kúwá náa ku̱ba̱ʼ rígi̱ ga̱jma̱a̱ numuu dí nikiéʼkún,ku̱ba̱ʼ rígi̱ maʼni rí makujmaa náa nigadíí eʼdini xárkaʼwiin bi̱ nikháñún náa ikhaa”.
Mbaʼa nota
^ Nandoo gáʼthúu̱n ku̱ba̱ʼ itsí dí rígá náa agoo xtájtsí.
^ O mbáa “bi̱ nuguájun jmbu”.
^ Náa ajngáa hebreo naʼthí, “Ja”. Ja ni̱ndxu̱u̱ xóo nagumaráʼmáʼ ga̱jma̱a̱ nguáthá ajngáa mbiʼyuu Jeobá.
^ O “mbáníi”.
^ O “niʼni endi̱i̱”.
^ Náa ajngáa hebreo naʼthí, “wajñunʼ”.
^ O mbáa “xuájyooʼ iná”.
^ O “magiʼdiin bi̱ nikháñún bi̱ nánguá guáʼdáá tsiaki̱i̱”.
