Isaías 47:1-15
47 Arajtaa ga̱jma̱a̱ araʼwún náa yujndaʼ,ikháán wáxióo* Babilonia bi̱ xóó tsébóoʼ ga̱jma̱a̱ xa̱bu̱.
Araʼwun mbayííʼ náa nda̱a̱ xílí* rí nutañajunʼ,ikháán wáxiu̱ún xa̱bu̱ caldeos, numuu dí xa̱bu̱ ni xátangi̱ín muthaanʼdí nindxa̱a̱ʼ mitsáʼkhán ga̱jma̱a̱ xángaju̱ún kuyaaʼ.
2 Ayuʼ gíya mbá tsi̱nu̱* ga̱jma̱a̱ atanu̱ harina.
Atrígú xtíin dí grígu náa edxa̱a̱ʼ.
Atríya̱ʼ fáldaaʼ, atasngájma xtiyaaʼ.
Gakidáán náa mañu.
3 Tsaʼtsáánʼ gáwanáa ga̱jma̱a̱ matiya̱a̱ʼ.
Mania̱a̱ʼ xó má ikháán nitaniuʼ, nimbáa xárikoʼ dí ma̱ni̱ rígi̱.*
4 “Bi̱ naʼtsiríñáanʼlú,nindxu̱u̱ Jeobá bi̱ naʼtáñajúúnʼ ángeles, xúʼko̱ kaʼnii mbiʼyuu.
bi̱ Kaʼwii náa Israel”.
5 Wíí gáraʼwún, ata̱ʼa̱a̱ʼ náa mikína,ikháán wáxiu̱ún xa̱bu̱ caldeos,ni xátangi̱ín mutha̱a̱n Reina ndrígu̱ún xa̱bu̱ ñajunʼ.
6 Nikiʼnún ka̱ñu̱u̱n xa̱bu̱ xuajñunʼ.
Niniʼñúuʼ dí xa̱bu̱ xuajñunʼ maguma tsagiin,nixnajxíin náa ñawáanʼ.
Mú ikháán na̱nguá nigáwíinʼ a̱jkia̱a̱nʼ xtañún.
Asndu xabuanii niraxnún muda̱ yugo ki̱wu̱n.
7 Niratá: “Ikhúún mani̱ndxu̱ʼ má xúʼko̱ Reina”.
Na̱nguá nitayáá dí rígi̱ gíʼdoo numuu,na̱nguá nitatsaʼwáminaʼ ndiéjunʼ gágíʼnaaʼ.
8 Dí xúgi̱ atadxawíín rígi̱, ikháán bi̱ i̱ndó natani̱ rí nanigua̱a̱ʼ,bi̱ naku̱ma̱a̱ʼ xtayaminaʼ, ga̱jma̱a̱ naratá náa awúu̱n a̱jkia̱a̱nʼ:
“Ikhúún nindxu̱ʼ mbáwún, ndawa̱a̱ imba̱a̱ xóo ikhúún.
Nditháan xánindxu̱ʼ a̱ʼgú xuáʼa.
Ni má xáyóo xóo e̱ʼkhu̱ dí nuni̱ mbátígi̱i̱n e̱ji̱n”.
9 Mú nda̱a̱ tsu̱ma̱ gátagíʼníí mbá nájma̱ rígi̱, kááʼ mbóó mbiʼi gágíʼnáa:
Matani̱ mbátígi̱i̱n ejña̱a̱nʼ ga̱jma̱a̱ maguanáa a̱ʼgú xuáʼa.
Magíʼnáa rígi̱ ga̱jma̱a̱ numuu* mbaʼa enii xawan dí natani̱.
10 Nitani̱ dí ra̱májánʼ ga̱jma̱a̱ niku̱ma̱a̱ʼ rí nda̱a̱ dí gágíʼnáa.
Niratá: “Ndawa̱a̱ má tsáa eʼyoʼ”.
Dí najmañaaʼ ga̱jma̱a̱ ku̱ma̱ dí xtaʼdáá niʼni dí magajnuríya̱a̱ʼ,ga̱jma̱a̱ naratá náa awúu̱n a̱jkia̱a̱nʼ:
“Ikhúún nindxu̱ʼ mbáwún, ndawa̱a̱ imba̱a̱ xóo ikhúún”.
11 Mú ma̱ʼkha̱nú gamiéjunʼ náa ikháán,ga̱jma̱a̱ nimbá xawan dí gátani̱ xáʼngo̱o̱ gárikoo.
Ma̱ʼkha̱nú má tsiaki̱i̱ gamiéjunʼ náa ikháán, xáʼnga̱a̱ʼ gátrikáá.
Mbá nacha̱ gáʼkha̱ dí maʼni matamíniiʼ, mbá dí nimbá miʼtsú xóó tségíʼnaaʼ.
12 Ikha jngóo ikháán atani̱ má mbaʼa enii xawandí na̱dxa̱ʼ ratani̱ asndu nákha dxáʼgú nindxa̱a̱ʼ,mbuʼyáá á mu gajkhun mambáyáaʼ,mbáa manigu̱u̱nʼ xa̱bu̱ índo̱ gúyáá.
13 Niʼni néʼnga̱a̱ʼ dí natrajxu̱u̱n má xúʼko̱ bi̱ nuxnaaʼ consejo.
Dí xúgi̱ gaguwáʼ ga̱jma̱a̱ guni̱ kríña̱a̱nʼ,xa̱bu̱ buʼko̱ bi̱ nduyamajkuíí dí rígá mekhuíí,* bi̱ nduyáá xóo tri̱gi̱i̱n a̱ʼgua̱a̱n,bi̱ nduyáá xóo gíʼ gu̱nʼ rudiiʼmu mutariya̱ʼ mbá xúgíʼ dí na̱ʼkha̱ magíʼnaa.
14 ¡Atayáá! Ikhiin nindxu̱ún xóo rajxa̱ nijndooʼ.
Mbá aguʼ matsikíin.
Xáʼngu̱u̱n gúni̱ kawúmíjná náa riʼyu̱u̱ aguʼ.
Chámbuʼ rígi̱ xámbáñún mu magigi̱ínga̱jma̱a̱ xándoo matri̱gi̱i̱n náa inuu aguʼ rígi̱.
15 Xúʼko̱ kaʼnii gáguánú mani̱ndxu̱ún bi̱ nuni̱ xawan náa ikháán,bi̱ ra̱ʼkhá tháán nitiejunʼ gajmiáanʼ nákha dxáʼgú nindxa̱a̱ʼ.
Magúun, mámbáa gágájnuu maʼga̱a̱* rí asndu tséʼyoo náa ejkha̱.
Ni xáxtáa nimbáa bi̱ maʼni kríña̱a̱nʼ.
