Isaías 20:1-6
-
Tsinaʼ rí nasngájma rí magíʼnuu Egipto ga̱jma̱a̱ Etiopía (1-6)
20 Nákha tsiguʼ dí Sargón rey ndrígóo Asiria nikuʼmaa bi̱ naʼtáñajúúnʼ soldado* náa Asdod,+ ikhaa nixmínaʼ ga̱jma̱a̱ Asdod ma̱ngaa niʼngo̱o̱ nito̱ʼo̱o̱.+
2 Nákha ikhú, Jeobá niʼthúu̱n Isaías+ a̱ʼdióo Amoz, niʼthúu̱n: “Ayuʼ, atríya̱a̱ʼ xtíin mi̱du̱* dí kua̱ʼa̱n náa smídaaʼ, ga̱jma̱a̱ atrawíi raxtáaʼ”.* Ikhaa niʼni xó má niʼthúu̱n, nijngruigo̱o̱ tsaʼtsaaʼ* ga̱jma̱a̱ i̱ndó rajkhúu.
3 Ikhú Jeobá niʼthí: “Dí xóo xa̱bi̱ʼ Isaías nijngruigo̱o̱ tsaʼtsaaʼ ga̱jma̱a̱ i̱ndó rajkhúu mbá ajtsú tsiguʼ, nindxu̱u̱ mbá tsinaʼ+ dí magíʼnuu Egipto+ ga̱jma̱a̱ Etiopía,+
4 xúʼko̱ kaʼnii gáʼni índo̱ rey ndrígóo Asiria gáʼga kagui̱i̱n xa̱bu̱ Egipto+ ga̱jma̱a̱ xa̱bu̱ Etiopía bi̱ ni̱jkha̱ kiʼdiin, xó má jiámá, wa̱ʼxa̱ʼ* ga̱jma̱a̱ xabuanii, tsaʼtsiinʼ, i̱ndó rajkhúún ga̱jma̱a̱ i̱ndó íxtúún gágún, mu xúʼko̱ magajnúu ma̱jtiu̱u̱ʼ Egipto.
5 Mamiñún ga̱jma̱a̱ mati̱ñu̱u̱nʼ gáʼni Etiopía, dí naguáʼthi̱i̱n, ga̱jma̱a̱ Egipto, rí naʼni muguaʼdáá numún.*
6 Mbiʼi rúʼko̱ xa̱bu̱ bi̱ kúwá náa ku̱ba̱ʼ dí rígá náa rawuunʼ lamáa,* muthi: ‹¡Gu̱ya̱a̱ dí nigíʼnuu náa dí muguáʼthi̱i̱n, náa dí nigayúlú mixtambáyúlú mu maguma káwáánʼlú náa rey ndrígóo Asiria! Xú káʼnii gándoo gúʼni̱ kawúmíjná xúgi̱ rá.›”
