Isaías 45:1-25
45 Rígi̱ dí ikhúún, bi̱ nindxu̱ʼ Jeobá na̱thu̱u̱n Ciro bi̱ niraʼwi̱i̱,ikhúún kuajtúun ñawúunʼmu xúʼko̱ maʼngo̱o̱ maʼni gajmíi̱n xa̱bu̱ xuajin,ga̱jma̱a̱ magruigúu tsiaki̱i̱* ndrígu̱ún reyes,mambáʼtoo xkrugua dí karngujxi̱ mu manújngoo,ga̱jma̱a̱ xkrugua maguanúu paʼta:
2 “Ikhúún maʼgá ginún náa inaaʼga̱jma̱a̱ manimbáníi bíjní.
Majkumígu xkrugua dí niguma ga̱jma̱a̱ cobrema̱ngaa ixu̱u̱ dí niguma ga̱jma̱a̱ hierro.
3 Maxna̱a̱ʼ rí gíʼdoo numuu dí rígá náa mikínaga̱jma̱a̱ rí gíʼdoo numuu dí karkaʼwu náa ngu̱ʼwa̱,mu xúʼko̱ ma̱ta̱ya̱a̱ dí ikhúún nindxu̱ʼ Jeobá,Dios ndrígóo Israel, bi̱ naʼtháanʼ ga̱jma̱a̱ mbiʼyaaʼ.
4 Ga̱jma̱a̱ numuu xa̱bi̱ʼ Jacob ma̱ngaa Israel, bi̱ niraʼwi̱i̱,natha̱a̱nʼ ga̱jma̱a̱ mbiʼyaaʼ.
Ma̱ni̱ dí mbiʼyaaʼ magruigú gamajkhu maski ajndu na̱nguá nitatsiniún.
5 Ikhúún nindxu̱ʼ Jeobá, ndawa̱a̱ imba̱a̱.
Mbáwún ikhúún nindxu̱ʼ Dios, ndawa̱a̱ imba̱a̱.
Ikhúún maxna̱a̱ʼ tsiaki̱i̱* maski ajndu na̱nguá nitatsiniún,
6 mu xúʼko̱ xa̱bu̱ mbuyáádí asndu náa nagájnuu a̱jkha̱ʼ* ga̱jma̱a̱ náa narámaaʼ a̱jkha̱ʼ*ndawa̱a̱ imba̱a̱ xóo ikhúún.
Ikhúún nindxu̱ʼ Jeobá, ndawa̱a̱ imba̱a̱.
7 Ikhúún na̱ni̱ marigá aguʼ ga̱jma̱a̱ mikína,na̱ni̱ marigá dí tsímáá ga̱jma̱a̱ gamiéjunʼ,ikhúún nindxu̱ʼ Jeobá, bi̱ naʼni marigá xúgíʼ rígi̱.
8 Xó má ruʼwa narmajan ku̱ba̱ʼ ga̱jma̱a̱ najma̱a̱.
Xúʼko̱ kaʼnii gáguma kríya̱a̱ʼ xuajñunʼ ga̱jma̱a̱ maxtáa májánʼ.
Ikhúún nindxu̱ʼ Jeobá, bi̱ niʼni xúgíʼ rígi̱”.
9 ¡Ngínáa lá bi̱ nagi̱ʼdu̱u̱ ga̱jma̱a̱ bi̱ niʼnii,numuu dí ikhaa nindxu̱u̱ mbá chíʼgíiʼ* ku̱ba̱ʼmbá chíʼgíiʼ ku̱ba̱ʼ dí rígá náa majñuuʼ ku̱ba̱ʼ dí rígá mbayííʼ!
Lá ma̱ndoo ku̱ba̱ʼ maʼthúu̱n mbáa bi̱ Naʼni daan* “Ndiéjunʼ etani̱ rá.”
Lá ma̱ndoo mbáa bi̱ nitani̱i̱ maʼthí “Ikhaa ragíʼdoo ñawúunʼ* ráʼ.”
10 ¡Ngínáa lá bi̱ naʼthúu̱n mbáa xa̱bu̱ nikhi̱i̱ “Tsáá ñajuunʼ adáa bi̱ nitani̱i̱ rá.”
ga̱jma̱a̱ naʼthúu̱n mbáa a̱ʼgu̱ “Tsáá adáa xtaa ratani̱i̱ rá.”!*
11 Rígi̱ dí naʼthí Jeobá, bi̱ Kaʼwii náa Israel, bi̱ niʼnii:
“Lá nu̱ni̱ a̱jma̱ a̱jkia̱la náa dí wíji̱ marigá ráʼ.
Lá ikháanʼ gútañájunʼ ndiéjunʼ gáni̱ gajmíʼ e̱ji̱nʼ ma̱ngaa dí ni̱ni̱ ga̱jma̱a̱ ñawúnʼ ráʼ.
12 Ikhúún ni̱ni̱ ku̱ba̱ʼ ma̱ngaa nini̱i̱ xa̱bu̱ ikhí.
Ni̱ni̱ mekhu ga̱jma̱a̱ ñawúnʼ,ma̱ngaa natañájuunʼ xúgíʼ dí rígá ikhí”.
13 “Náa na̱ni̱ dí májánʼ, ni̱ni̱ dí makujmaa mbáa xa̱bu̱, ma̱ni̱ jmbi̱i̱ mbá xúgíʼ kambo̱o̱.
Ikhaa maʼni mbá xuajñunʼ,ga̱jma̱a̱ maʼni káwíin bi̱ ni̱jkha̱ kiʼdiin rí asndu xáʼyóoʼ maʼni numani má xáʼyóoʼ maxná regalo”, eʼthí Jeobá bi̱ naʼtáñajúúnʼ ángeles.
14 Rígi̱ dí naʼthí Jeobá:
“Rí nada̱a̱ʼ* Egipto ga̱jma̱a̱ dí nagujua̱* Etiopía mani̱ndxu̱u̱ ndrígáaʼ ikháán, ga̱jma̱a̱ sabeos bi̱ nindxu̱ún xa̱bu̱ mbijui̱i̱n mani̱ndxu̱ún xa̱bia̱a̱ʼ.
Xúgíʼ xuajin rígi̱ maguwáʼ náa ikháán ga̱jma̱a̱ mani̱ndxu̱ún xa̱bia̱a̱ʼ.
Kaxtuʼwún ga̱jma̱a̱ cadena gájngruigu̱u̱n náa kidxaaʼ.
Maguwáʼ ga̱jma̱a̱ musmbati̱gu̱u̱n náa inaaʼ.
Muthaanʼ ga̱jma̱a̱ gamajkhu: ‹Nakujmaa kaʼwu rí Dios xtáa ga̱jma̱á nindxa̱a̱ʼ,ndawa̱a̱ imba̱a̱, ndawa̱a̱ imba̱a̱ Dios›”.
15 Nakujmaa kaʼwu dí ikháán nindxa̱a̱ʼ mbáa Dios bi̱ narkaʼwuminaʼ,Dios ndrígóo Israel, bi̱ naʼni káwíin xa̱bu̱.
16 Xúgíinʼ ikhiin mati̱ñu̱u̱nʼ ga̱jma̱a̱ maguma majti̱i̱nʼ,mbá xúgíinʼ bi̱ nuni̱i̱ xándú magajnúu majkhún.
17 Mú Jeobá maʼni kríya̱a̱ʼ Israel asndu kámuu.
Ikháanʼla nditháan xátiyala ni má xágájnuu majkuala.
18 Numuu dí rígi̱ nindxu̱u̱ dí naʼthí Jeobá,bi̱ Niʼni mekhu, Dios bi̱ gajkhun,bi̱ niʼni mújúunʼ ku̱ba̱ʼ ga̱jma̱a̱ nigíʼ jxa̱ʼ,na̱nguá niʼni mbaʼ ma̱ʼni̱í,* niʼni mu makuwá xa̱bu̱:
“Ikhúún nindxu̱ʼ Jeobá, ndawa̱a̱ imba̱a̱.
19 Na̱nguá ni̱tha̱ náa minguʼwa, ni má náa mbá ku̱ba̱ʼ mikína,na̱nguá ni̱thu̱u̱n bi̱ naguwáʼ náa Jacob:
‹Guʼñúunʼ, mú tsiaki̱i̱ ndrígala mani̱ndxu̱u̱ ndíí›.
Ikhúún nindxu̱ʼ Jeobá, bi̱ naʼthí rí nindxu̱u̱ májánʼ ga̱jma̱a̱ rí nindxu̱u̱ jmbu.
20 Gugimbújmínala ga̱jma̱a̱ aguwaʼ.
Ikháanʼla bi̱ nu̱ni̱ káwúmíjnála náa xa̱bu̱ xuajin, guxuʼmámíjnála mbá jnduʼ.
Xa̱bu̱ bi̱ jngruigu̱u̱n kudiin xándú bi̱ nigumawíin nda̱a̱ dí eyáá,ga̱jma̱a̱ bi̱ nutakáñíí mbáa dios bi̱ xáʼngo̱o̱ gáʼni káwíin.
21 Gu̱tha̱ ga̱jma̱a̱ gusngajmá dí gajkhun nindxu̱u̱.
Gurajximíjna̱ kaníkiin.
Tsáá niʼtáriyaʼ rígi̱ asndu nákha ginii,ga̱jma̱a̱ tsáá niʼthí rígi̱ asndu nákha wajyúuʼ rá.
Lá raʼkháa ikhúún bi̱ nindxu̱ʼ Jeobá ráʼ.
Mbáwún ikhúún nindxu̱ʼ Dios, ndawa̱a̱ imba̱a̱,mbáa Dios bi̱ naʼni dí májánʼ ga̱jma̱a̱ bi̱ naʼni káwíin xa̱bu̱, ndawa̱a̱ imba̱a̱ xóo ikhúún.
22 Guxu̱ʼmámíjná náa ikhúún ga̱jma̱a̱ maguma káwáanʼ,xúgiáanʼ ikháanʼla bi̱ kuwáanʼ náa naguámbári̱go̱o̱ ku̱ba̱ʼ,numuu rí ikhúún nindxu̱ʼ Dios, ndawa̱a̱ imba̱a̱.
23 Mínu̱u̱ʼ má ni̱xna̱ ajngóʼ,dí ikhúún ni̱tha̱ nindxu̱u̱ gajkhun, mambanúu tsiaki̱i̱:
Xúgíinʼ musmbati̱gu̱u̱n náa inuʼ,ga̱jma̱a̱ xúgíinʼ muxna ajngún dí muguajún jmbu náa ikhúún.
24 Muthi: ‹Gajkhun dí náa Jeobá rígá dí májánʼ ga̱jma̱a̱ tsiaki̱i̱.
Xúgíinʼ bi̱ nakásnga̱ñu̱u̱nʼ kuyáá asndu mati̱ñu̱u̱nʼ gúxnajximi̱jna̱ náa inuu.
25 Ga̱jma̱a̱ numuu Jeobá makujmaa dí mbá xúgíinʼ bi̱ naguwáʼ náa Israel nuthi dí gajkhunga̱jma̱a̱ numuu ikhaa, asndu nadxún gúthi dí niʼni ga̱jma̱a̱ numún›”.
Mbaʼa nota
^ Náa ajngáa hebreo naʼthí, “marajkuíi dí kaxtoʼóo náa smídún”.
^ Náa ajngáa hebreo naʼthí, “maro̱ʼo̱o̱ jxa̱ʼ smídáaʼ”.
^ O “este”.
^ O “oeste”.
^ O “lajuíin”.
^ O “bi̱ niʼnii”.
^ O mbáa “Lá ku̱ba̱ʼ ma̱ndoo maʼthí ‹Dí nitani̱ ragíʼdoo cháʼwuun›” ráʼ.
^ O “Tsáá ada̱ xtaa ratani̱i̱ jngóo dí naxnáa ga̱ʼkhu̱ rá.”
^ O mbáa “Bi̱ nuñejunʼ náa”.
^ O mbáa “bi̱ nugujua̱ náa”.
^ O mbáa “táʼni mu mbaʼ makri̱ga̱á”.
