Isaías 31:1-9
31 ¡Ngíníi lá bi̱ naguájthan Egipto mu mbuyáʼ rí mixtambáñún,bi̱ naku̱mu̱ún kuñúún wáyú,bi̱ naku̱mu̱ún kuñúún carro dí nuxmijná ga̱jma̱a̱, numuu dí ra̱ʼkhá tháán mbaʼa,ga̱jma̱a̱ wáyú* bi̱ nuxmijná numuu dí guáʼdáá tsiaki̱i̱,mú na̱nguá eyáá bi̱ Kaʼwii náa Israelga̱jma̱a̱ tséyáaʼ Jeobá!
2 Mú ikhaa ma̱ngaa najmañuu ga̱jma̱a̱ makuʼma mbá gamiéjunʼ,maʼnimbánuu tsiaki̱i̱ ajngóo.
Maʼni ngíníi bi̱ ra̱míjíinʼga̱jma̱a̱ maʼni ngíníi bi̱ numbañún bi̱ nuni̱ dí ra̱májánʼ.
3 Egipcios nindxu̱ún xa̱bu̱ numbaaʼ, raʼkháa Dios,wáyú nindxu̱ún xuwiʼ, raʼkháa xóo Dios.
Índo̱ Jeobá gákrui̱ya̱ʼ ñawúunʼ,bi̱ nañambáá majngrádaaʼga̱jma̱a̱ bi̱ naxtambáyíí maxpátri̱ga̱a̱,mbá míʼtsúú gákháñún xúgíinʼ.
4 Numuu dí rígi̱ rí niʼthúnʼ Jeobá:
“Xóo mbáa león, mbáa león gújkuiiʼ,* najmangu̱u̱ʼ índo̱ ndaʼñún bi̱ nandoo mikhu̱u̱n,xóo índo̱ mbá xúgíinʼ baxtúu nagimbíi̱n mu muxkáá,ga̱jma̱a̱ na̱nguá eʼnimíñúu aʼwún,ni má tséʼnimíñúu dí nundxa̱ʼwa̱jmaa,xúʼko̱ kaʼnii gáʼni Jeobá bi̱ naʼtáñajúúnʼ ángeles magajtaa mu maxmína̱ʼnáa kúbá Sion ga̱jma̱a̱ náa bíjní dí rígá ikhí.
5 Xóo ñu̱ʼu̱ bi̱ najngutaʼmíinʼ, Jeobá bi̱ naʼtáñajúúnʼ ángeles ma̱ʼkha̱ gámbáyúu Jerusalén.
Mambáyúu ga̱jma̱a̱ maʼni kríya̱a̱ʼ.
Maʼni mba̱a̱ a̱jkiu̱u̱n kaʼyoo ga̱jma̱a̱ maʼni kríya̱a̱ʼ”.
6 “Gatangáanʼla náa bi̱ túnimbala ku̱ya̱a̱, xa̱bu̱ xuajin Israel.
7 Numuu dí mbiʼi rúʼko̱, mámbáa ni xándoo gáʼñúún dioses ndrígóo bi̱ nda̱a̱ rí ejmiin bi̱ nigumiin ga̱jma̱a̱ plata, ga̱jma̱a̱ dioses bi̱ nda̱a̱ rí ejmiin bi̱ nigumiin ga̱jma̱a̱ oro, bi̱ ikháanʼ ni̱ni̱i̱la ga̱jma̱a̱ ñawánla, índo̱ nixuʼdámijnala aʼkhá.
8 Ga̱jma̱a̱ asirio makhañúu ga̱jma̱a̱ espada, mú raʼkháa espádóo mbáa xa̱biya̱,mikhu̱u̱ mbá espada, mú raʼkháa espádóo mbáa xa̱bu̱ numba̱áʼ.
Ikhaa magayúu gáʼni espadaga̱jma̱a̱ jiámíi muxtumiin muñajunʼ gakhi̱i̱.
9 Tsíñu ndrígóo mandáti̱ga̱a̱ gáʼni gamíi.
Ga̱jma̱a̱ príncipes ndrígóo mamiñún gáʼni poste rí nasngájmúún mbuyáá”, eʼthí Jeobá,agiuuʼ rígá náa Sion ga̱jma̱a̱ horno ndrígóo rígá náa Jerusalén.
