Isaías 19:1-25
19 Rígi̱ dí nijuiʼthá magíʼnuu Egipto:
¡Gu̱ya̱a̱la! Jeobá grígu ra̱jkha̱ náa du̱u̱n dí na̱jkha̱ nacha̱, ga̱jma̱a̱ nato̱ʼo̱o̱ náa Egipto.
Dioses bi̱ nda̱a̱ rí ejmiin bi̱ kúwá náa Egipto maguíʼiin náa inuu ikhaa,ga̱jma̱a̱ a̱jkiu̱u̱n Egipto makáguabaaʼ.
2 “Ma̱ni̱ rí egipcios matangi̱ín kudamijná,ga̱jma̱a̱ muxmijná kaníkiin,mámbáa maxmína̱ʼ ga̱jma̱a̱ ndxájuu, ma̱ngaa xa̱bu̱ bi̱ xtáa mijngii ga̱jma̱a̱,xa̱bu̱ xuajin magi̱ʼdu̱u̱n kaníkiin, ga̱jma̱a̱ xa̱bu̱ ñajunʼ magi̱ʼdu̱u̱n kaníkiin.
3 Ma̱ni̱ rí Egipto maguanúu tsiánguá a̱jkiu̱u̱n,ga̱jma̱a̱ ma̱ni̱ rí awan rí naríyaʼ maʼni majnga̱wa̱a̱n.
Ikhiin magún náa dioses ndrígu̱ún bi̱ nda̱a̱ rí ejmiin,náa bi̱ nuni̱ brujo, bi̱ nurajxu̱u̱n wajinʼ ga̱jma̱a̱ náa bi̱ nuni̱ xawan.
4 Maxnajxíi Egipto náa ñawúunʼ mbáa bi̱ ra̱májáanʼ mu maʼtáñajunʼ,ga̱jma̱a̱ mbáa rey bi̱ xkawiʼ a̱jkiu̱u̱n mu maʼtáñajunʼ”, eʼthí Tátá bi̱ gajkhun, Jeobá bi̱ naʼtáñajúúnʼ ángeles.
5 Iyaʼ lamáa* mujndo̱o̱ʼ,ga̱jma̱a̱ iyaʼ mañu mujndo̱o̱ʼ, mijxooʼ kua̱ʼa̱n gáʼni.
6 Mañu maʼni ndaska,náa na̱jkha̱ kúʼúun iyaʼ Nilo maʼga raguámbá ga̱jma̱a̱ mujndo̱o̱ʼ.
E̱ʼi̱n* ga̱jma̱a̱ ra̱jxa̱* miga.
7 Mujndooʼ iná maxaʼ dí rígá náa rawuunʼ mañu Nilo, náa nawiʼtáa iyaʼ,ga̱jma̱a̱ náa mbá xúgíʼ ku̱ba̱ʼ rí najuiʼdu náa mbá kua̱ʼa̱n mañu Nilo.
Mbá xúgíʼ maʼga kagu̱u̱ giñánʼ ga̱jma̱a̱ ni xárígá.
8 Bi̱ nurawíin e̱gi̱ʼ makuwá ngíná,bi̱ nudama̱ʼa̱n xkramáʼ* náa mañu Nilo makuwá ngíná,ga̱jma̱a̱ bi̱ nudama̱ʼa̱n amaʼ náa iyaʼ maʼni káaʼ nguéjmi̱i̱n.
9 Bi̱ nuni̱ xtíin ga̱jma̱a̱ linoga̱jma̱a̱ bi̱ nuni̱ xtíin miʼxá dí paska,* mati̱ñu̱u̱nʼ.
10 Bi̱ nuxmí makuwá ngíná,mbá xúgíinʼ bi̱ nuñajunʼ mu mudaʼ makuwá ngíná.
11 Príncipes bi̱ kúwá náa Zoan nindxu̱ún xóo mbáa skágunʼ.
Bi̱ nuxnáá consejo faraón bi̱ najmañún májánʼ nindxu̱ún skágunʼ ga̱jma̱a̱ consejo rí nuxna tséyambáá.
Xú káʼnii gándoo ikháanʼla mutha̱a̱n faraón“Ikhúún nindxu̱ʼ mbáa bi̱ na̱ʼkha̱ náa bi̱ najmañún,mbáa bi̱ na̱ʼkha̱ náa reyes bi̱ nikúwá wájyúuʼ” rá.
12 Á mu dí xúʼko̱, náá kúwá xa̱bia̱a̱ʼ bi̱ najmañún rá.
Á mu dí gajkhun nduyáá, guthaanʼ ndiéjunʼ dí Jeobá bi̱ naʼtáñajúúnʼ ángeles niraʼwíí maʼniuu Egipto.
13 Príncipes bi̱ kúwíin náa Zoan nini̱ xóo eni̱ skágunʼ,príncipes bi̱ kúwíin náa Nof* niguma nduwiinʼ,Egipto niguma nduwaaʼ eni̱ bi̱ kuya̱ edxu̱u̱ náa xuajin majkhaʼ.*
14 Jeobá nixídíí náa ikhaa mbá dí niʼni majngawi̱i̱n,ga̱jma̱a̱ ikhiin nini̱ dí Egipto majnga̱wa̱a̱n náa xúgíʼ dí naʼni,xóo eʼni mbáa bi̱ najnga̱a̱, bi̱ narmbíjxi̱minaʼ náa ni̱jxi̱ʼ.
15 Egipto nándáa rí maʼni,nándáa edxu̱u̱, nándáa tsiliúuʼ, nándáa rudiuuʼ ni má nándáa xúgíʼ ixu̱u̱.*
16 Mbiʼi rúʼko̱, egipcios mani̱ndxu̱ún xóo gu̱ʼu̱, maguíʼiin ga̱jma̱a̱ mamiñún gáʼni ñawúunʼ Jeobá bi̱ naʼtáñajúúnʼ ángeles dí makuxi̱ maxnún ga̱jma̱a̱.
17 Ga̱jma̱a̱ ku̱ba̱ʼ Judá maʼnimíñúu Egipto. Mamiñún ga̱jma̱a̱ dí káaʼ mudxawíín ga̱jma̱a̱ numuu, ga̱jma̱a̱ numuu dí niraʼwíí maʼni Jeobá bi̱ naʼtáñajúúnʼ ángeles ga̱jma̱a̱ numún.
18 Mbiʼi rúʼko̱, marigá mbá witsu xuajin náa ku̱ba̱ʼ ndrígóo Egipto dí muthi ajngún xa̱bu̱ Canaán ga̱jma̱a̱ muxna ajngún náa Jeobá bi̱ naʼtáñajúúnʼ ángeles dí muguajún jmbu. Mbá xuajin magumbiʼyuu Xuajin dí naʼni gámbáa.*
19 Mbiʼi rúʼko̱, marigá mbá náa najuixnájxi̱ tsigijñaʼ náa inuu Jeobá, náa ta̱pha̱ ku̱ba̱ʼ ndrígóo Egipto ma̱ngaa mbá poste náa Jeobá náa ndawaa.
20 Mani̱ndxu̱u̱ mbá tsinaʼ ga̱jma̱a̱ mbá rí mambáñún xa̱bu̱ Egipto mu marmáʼáan a̱jkiu̱ún kuyáá Jeobá bi̱ naʼtáñajúúnʼ ángeles, numuu rí mutakáñíí Jeobá ga̱jma̱a̱ numún bi̱ nuni̱ ngíníi ga̱jma̱a̱ ikhaa makuʼmaa mbáa bi̱ maʼngo̱o̱ maʼni káwíin.
21 Ga̱jma̱a̱ Jeobá majmaʼniiʼ náa xa̱bu̱ egipcios, xa̱bu̱ egipcios muniʼniiʼ Jeobá mbiʼi rúʼko̱, muxnajxi̱ tsigijñaʼ ga̱jma̱a̱ regalo náa ikhaa, ma̱ngaa muxudami̱jna̱ mbá rí muni̱ náa Jeobá ga̱jma̱a̱ munimbaníí.
22 Jeobá maxpájtii Egipto, maxpájtii ga̱jma̱a̱ ikhaa má gáʼni thanuu, ikhiin matangi̱ín náa Jeobá ga̱jma̱a̱ ikhaa mariʼña̱a̱ rí gútakáñíí ma̱ngaa ikhaa maʼni rí maʼni̱i̱ a̱jkiu̱ún.
23 Mbiʼi rúʼko̱, marigá mbá kamba̱a̱ rí magajnúu náa Egipto dí maʼga Asiria. Ikhú Asiria mato̱ʼo̱o̱ náa Egipto, ga̱jma̱a̱ Egipto mato̱ʼo̱o̱ náa Asiria. Mbóó gúyamajkuíí Dios, Egipto ga̱jma̱a̱ Asiria.
24 Mbiʼi rúʼko̱, Israel mani̱ndxu̱u̱ bi̱ maʼni ragajtsíin, náa Egipto ga̱jma̱a̱ Asiria, mani̱ndxu̱u̱ mbá dí maguma tsajkurámiinʼ xa̱bu̱ náa tsu̱du̱u̱ ku̱ba̱ʼ,
25 numuu dí Jeobá bi̱ naʼtáñajúúnʼ ángeles maʼni tsajkurámaaʼ ga̱jma̱a̱ maʼthí: “Gaguma tsajkurámaaʼ xuajñunʼ Egipto, ma̱ngaa dí ni̱ni̱ ga̱jma̱a̱ ñawúnʼ, Asiria, ga̱jma̱a̱ xuajñunʼ dí kiejunʼ Israel”.
