Isaías 38:1-22
38 Nákha mbiʼi rúʼko̱, Ezequías niʼniuu nandii ga̱jma̱a̱ inu makhañúu. Ikhú profeta* Isaías a̱ʼdióo Amoz ni̱ʼkha̱ gáʼyoo, niʼthúu̱n: “Rígi̱ dí naʼthí Jeobá: ‹Araxnún ikha bi̱ kúwá náa guʼwáaʼ, numuu rí makhañáaʼ, xáʼni̱i̱ a̱jkia̱a̱nʼ›”.
2 Índo̱ niʼdxawuun rígi̱, Ezequías nitangayii náa pared ga̱jma̱a̱ nigíʼdu̱u̱ niʼtákáñuu Jeobá:
3 “Jeobá, mbá péñu,* natakáñaaʼ dí marmáʼáan a̱jkia̱a̱nʼ dí nijngruigo̱ʼ jmbu náa kamba̱a̱ʼ ga̱jma̱a̱ xúgíʼ a̱jkiu̱nʼ, ma̱ngaa dí ni̱ni̱ rí májánʼ náa idaaʼ”. Ikhú Ezequías nigíʼdu̱u̱ nimbiya gínúu.
4 Ikhú Isaías nigruigú ajngóo Jeobá rígi̱:
5 “Ayu̱u̱ʼ gáratha̱a̱n Ezequías: ‹Rígi̱ dí naʼthí Jeobá Dios ndrígóo wajin xiʼñáaʼ David: “Nidxawuun dí niratájkáan, ndi̱yo̱o̱ xóo nitambi̱ya̱ʼ ga̱jma̱a̱ ma̱ni̱ dí maraxtaa i̱mbá 15 tsiguʼ,*
6 ma̱ni̱ kríña̱a̱nʼ ikháán ga̱jma̱a̱ ma̱ni̱ kríya̱a̱ʼ xuajin rígi̱ náa ñawúunʼ rey ndrígóo Asiria, ga̱jma̱a̱ mambáyúu xuajin rígi̱.
7 Xígi̱ kaʼnii Jeobá masngájmaaʼ dí Jeobá maʼnimbánuu ajngóo:
8 Ma̱ni̱ rí ndájkhoo a̱jkha̱ʼ rí nagajtaa náa escalera* rí mbiʼyuu Acaz matanga̱a̱ mbá gu̱wa̱ʼ escalón”›”. Ga̱jma̱a̱ ndájkhoo a̱jkha̱ʼ matsima̱a̱ mbá gu̱wa̱ʼ escalón náa escalera dí nigajtaa má.
9 Rí niʼnirámáʼ Ezequías rey ndrígóo Judá índo̱ niʼniuu nandii ga̱jma̱a̱ índo̱ niʼni̱i̱ a̱jkiu̱u̱n.
10 Ni̱tha̱: “Asndu xóó tséʼkiu̱u̱ngáʼgáaʼ náa Iñá wajinʼ.*
Ni xáxtáá mba̱yu̱u̱ʼ tsiguʼ”.
11 Ni̱tha̱: “Nánguá mba̱yo̱o̱ Jeobá, Jeobá náa ku̱bu̱únʼ bi̱ nduya.
Nánguá mba̱ñu̱u̱n itháán xa̱bu̱ numbaaʼ
índo̱ gáxtáá gajmíʼ xa̱bu̱ náa dí xúgíʼ naguámbáa.
12 Goʼwóʼ nixkui̱jxi̱i̱ ga̱jma̱a̱ ni̱ri̱gú káʼyúʼ, xóo guʼwá xtíin ndrígóo mbáa baxtúu.
Nimbu̱jxi̱ vida ndrígóʼ xóo embujxi̱ gúmá dí nujña ga̱jma̱a̱.
Ikhaa narujtu jngañún xóo eʼni ga̱jma̱a̱ gúmá rí nuxmí.
Natagíʼdi̱i̱ asndu miʼcha̱ ga̱jma̱a̱ naguámbáa asndu wakhííʼ,nadxuʼ ratani̱ gámbu̱u̱n má xúʼko̱.
13 Naniminaʼ rí maʼngo̱o̱ a̱jkiu̱nʼ asndu rí miʼcha̱.
Xóo mbáa león, ikhaa najkúmigaʼ xúgíʼ itsuʼ,natagíʼdi̱i̱ asndu miʼcha̱ ga̱jma̱a̱ naguámbáaʼ asndu wakhííʼ,nadxuʼ ratani̱ gámbu̱u̱n má xúʼko̱.
14 Nandxa̱ʼwa̱ xóo endxa̱ʼwá mbáa ñu̱ʼu̱ vencejo o tordo,*xóo eguwa̱nʼ mbáa paloma,iduʼ nagaaʼ dí nayejxi̱ wéñuuʼ náa rí itháán mitsídánʼ:
‹Jeobá, ra̱ʼkhá tháán xtáá ramínúuʼ.
¡Atambáyúʼ!›.
15 Ndiéjunʼ gándoo ma̱ta̱ rá.
Ikhaa niʼthúnʼ ga̱jma̱a̱ niʼnimbánuu rí nikudaminaʼ.
Ma̱ni̱ guabaminaʼ náa xúgíʼ mbiʼi rí gáxtáága̱jma̱a̱ numuu dí ra̱ʼkhá tháán nimínuuʼ.
16 ‹Jeobá, núma̱aʼ má ga̱jma̱a̱ numuu rígi̱,*xa̱bu̱ nandoo naxtáa, ga̱jma̱a̱ numuu rúʼko̱ xtáá ndaya.
Ikháán matani̱ rí maʼni̱i̱ a̱jkiu̱nʼ ga̱jma̱a̱ matani̱ dí maxtáá.
17 Ikhaa rí maxtáá tsímáá nimínuuʼ wéñuuʼ,mú ga̱jma̱a̱ numuu rí nandaaʼ xtayoʼ,nitani̱ kríñu̱u̱nʼ náa iñáʼ rí mambúun,nitadaʼ tsu̱díí* xúgíʼ aʼkhá rí ni̱ni̱.
18 Numuu rí Iñá wajinʼ* xándoo maxnáaʼ gamajkhu,rí nakháñún xa̱bu̱ xándoo maʼni mba̱a̱n.
Bi̱ naguájta̱án náa iñáʼ xándoo munimbu̱u̱n náa rí gajkhun dí natani̱.
19 I̱ndó bi̱ nduya ma̱ndoo muni̱ mba̱a̱n, xó má ikhúún ma̱ndoo ma̱ni̱ xúgi̱.
Mbáa xa̱bu̱ nikhi̱i̱ ma̱ndoo maʼthúún e̱ji̱i̱n dí gajkhun dí natani̱.
20 Jeobá, atani̱ kríñu̱u̱nʼ, mu̱ni̱xu ajmúú ga̱jma̱a̱ ajua̱nʼ dí gíʼdoo cuérdóo,náa goʼwóo Jeobá náa xúgíʼ mbiʼi rí gákuwáanʼxu›”.
21 Ikhú Isaías niʼthí: “Aguwaʼ kuyala xówóoʼ higo nijndooʼ”,* ga̱jma̱a̱ gugíʼmáá náa ska mu maʼni̱i̱ a̱jkiu̱u̱n.
22 Ezequías nirajxu̱u̱ Isaías: “Xú káʼnii gáyóo dí matsimuʼ mbu̱júu̱ náa goʼwóo Jeobá rá.”
Mbaʼa nota
^ O “gaʼyee, bi̱ naʼthí dí marigá”.
^ O “ataniu̱ʼ mbá rí májánʼ”.
^ Náa ajngáa hebreo naʼthí, “mbiʼi ndrígáaʼ”.
^ Mbáa escalera rígi̱ najmún mu mbuyáá xóo enújngoo hora, xóo reloj dí nañajunʼ ga̱jma̱a̱ ajkha̱ʼ.
^ O mbáa “grulla”.
^ Xóo muʼthá, ajngóo Dios ga̱jma̱a̱ rí naʼni.
^ O “nitiexinga̱a̱ náa idaaʼ”.
^ Náa ajngáa hebreo naʼthí, “Seol”.
^ O “pan dí niguma ga̱jma̱a̱ higo nijndooʼ dí nigixmbi̱i̱”.
