Isaías 13:1-22
13 Rígi̱ dí nijuiʼtá magíʼnuu Babilonia+ dí Isaías+ a̱ʼdióo Amoz ndiʼyoo náa rí niwasngájmáá:*
2 “Guxujxí mbá tsinaʼ*+ náa kúbá tsaʼsaʼ náa i̱ndó itsí rígá.
Guthu̱u̱nla, gu̱ba̱a̱n ñawánla,mu ikhiin matu̱ʼu̱u̱n náa riejúún bi̱ guáʼdáá numún.
3 Nitañájúúnʼ dí muni̱ bi̱ ni̱gruígi̱i̱n.*+
Mu masngajmá dí nakásngañu̱ʼ, nigímbíin soldado ndrígóʼ,bi̱ asndu nadxún dí nuni̱ mbaʼumíjna̱.
4 ¡Gudxawíínla! ¡Mbaʼin xa̱bu̱ kúwá náa kúbá!¡Nawáán xóo mbá xuajin dí mba̱a̱!
¡Gudxawíín!¡Nawáán gakhi̱i̱ eni̱ xa̱bu̱ ñajunʼ mbaʼin bi̱ nigimbíin!+
Jeobá bi̱ naʼtáñajúúnʼ ángeles nagímbíin soldado mu muxmijná.+
5 Asndu náa ku̱ba̱ʼ mitsínguánʼ,+asndu náa nartumuu mekhu,na̱ʼkha̱ Jeobá gajmíi̱n soldado bi̱ nindxu̱ún xóo ajua̱nʼ dí najmuu,mu muni̱ gámbáa xúgíʼ tsu̱du̱u̱ ku̱ba̱ʼ.+
6 ¡Gagáwíinʼ a̱jkia̱la, numuu dí mbiʼi ndrígóo Jeobá na̱ʼkha̱ mijngii!
Ma̱ʼkha̱ xóo mbá dí naguma gámbáa, dí na̱ʼkha̱ náa bi̱ gíʼdoo xúgíʼ Tsiaki̱i̱.+
7 Ikha jngóo ñawúúnʼ xa̱bu̱ ni xágiʼdoo tsiaki̱i̱,ga̱jma̱a̱ a̱jkiu̱ún mbá xúgíinʼ xa̱bekha makáguabaaʼ ga̱jma̱a̱ mamiñún.+
8 Xa̱bu̱ ra̱ʼkhá tháán gámíñún.+
Ma̱ʼkha̱ náa ikhiin dí maguíʼiin ga̱jma̱a̱ mi̱kui̱i̱n,xóo mbáa a̱ʼgu̱ bi̱ nagiʼdaa ada̱.
Asndu maxuʼwúúnʼ índo̱ gúyamijná,ngíná inún gáʼni.
9 ¡Gu̱ya̱a̱la! Na̱ʼkha̱ má mbiʼi ndrígóo Jeobá,najmangu̱u̱ʼ e̱ʼkha̱, nakiʼnáa wéñuuʼ, asndu nakásngañu̱u̱ʼ,mu maʼni rí ku̱ba̱ʼ rúʼko̱ mani̱ndxu̱u̱ mbá dí maʼnimíñún,+ga̱jma̱a̱ mu maʼni gámbíin xa̱bu̱ bi̱ nuni̱ aʼkhá bi̱ kúwá ikhí.
10 Numuu dí a̱ʼgua̱a̱n bi̱ tri̱gi̱i̱n* mekhuíí,ga̱jma̱a̱ mámbá grupo xóo tri̱gi̱i̱n+ ni xámbiʼiin,ni xámbiʼii a̱jkha̱ʼ índo̱ gágajnúuga̱jma̱a̱ gu̱nʼ ni xáda̱ʼ agiuuʼ.
11 Manda̱ʼa̱a̱ cuenta ku̱ba̱ʼ náa kúwá xa̱bu̱ ga̱jma̱a̱ numuu dí ra̱májánʼ dí narígá,+ga̱jma̱a̱ mandi̱ʼi̱ín cuenta xa̱bu̱ ra̱míjíinʼ ga̱jma̱a̱ numuu rí nakiéʼkúún.
Ma̱ni̱ gámbáa rí nuni̱ mbaʼumíjna̱ xa̱bu̱ga̱jma̱a̱ ma̱ni̱ majti̱i̱nʼ xa̱bu̱ ñajunʼ ra̱míjíinʼ bi̱ nuni̱ mbaʼumíjna̱.+
12 Ma̱ni̱ dí xa̱bu̱ numbaaʼ ni xáʼni mbaʼin, xóo oro dí niguma kaʼwii,+ma̱ni̱ dí xa̱bu̱ numbaaʼ maʼni itháan rambáʼin, ki xóo oro dí na̱ʼkha̱ náa Ofir.+
13 Ikha jngóo ma̱ni̱ rí mekhu maʼba̱a̱n,ku̱ba̱ʼ maʼbajngaa ga̱jma̱a̱ magajnúu náa gíʼ,+ga̱jma̱a̱ numuu dí nakásngañu̱u̱ʼ Jeobá bi̱ naʼtáñajúúnʼ ángeles, náa mbiʼi rí gákásngáñu̱u̱ʼ.
14 Xóo mbáa aña̱ʼ* bi̱ nagún ruxkáá, ga̱jma̱a̱ xóo mugu̱ bi̱ ndawa̱a̱ tsáa magímbi̱ín,mámbáa maʼga̱a̱ náa xuajñuu,mámbáa magayúu maʼga̱a̱ náa ku̱bo̱o̱ʼ.+
15 Bi̱ gúxkamaa muxkruaʼa jngayii kudú,*ga̱jma̱a̱ bi̱ gúrugua̱a̱ muxnáá ga̱jma̱a̱ espada.+
16 Muxpiguiin ga̱jma̱a̱ murujkuiin e̱jñu̱ún náa inún,+murawíi xúgíʼ dí guáʼdáá náa guʼwúnga̱jma̱a̱ mutsijmiin guʼñu̱ún.
17 Makuʼmíin náa ikhiin xa̱bu̱ medos,+bi̱ nduyáá dí ragíʼdoo numuu plataga̱jma̱a̱ bi̱ tséʼni maʼdxúún oro.
18 Muni̱ gawúúnʼ ga̱jma̱a̱ xkamídún jiámiu̱ún ga̱jma̱a̱ wa̱ʼxiúúnʼ.+Xágáwíinʼ a̱jkiu̱ún kuñúún e̱jín dxáñáʼ,ni má xágáwíinʼ a̱jkiu̱ún kuñúún e̱ji̱n.
19 Ga̱jma̱a̱ Babilonia, xuajin dí itháan mba̱a̱ náa mbá xúgíinʼ xa̱bu̱ ñajunʼ,+dí mitsiʼyá ga̱jma̱a̱ rí naʼni muni̱ mbaʼumíjna̱ caldeos,+maʼga̱nú mani̱ndxu̱u̱ xóo Sodoma ga̱jma̱a̱ Gomorra índo̱ Dios niʼni gámbáa.+
20 Nditháan ni xákúwá xa̱bu̱ga̱jma̱a̱ xa̱bu̱ bi̱ gáguwáʼ nda̱wa̱á ni xákúwá ikhí.+
Nimbáa xa̱bu̱ árabe xágíʼ goʼwóo* ikhí,ni má baxtúu xágún kudiin mugiu̱ún mu muda̱a̱ jxu̱únʼ ikhí.
21 Ikhí makuwá xujkhúʼ bi̱ kúwá náa ku̱ba̱ʼ mijxooʼ,*náa guʼwá majtíinʼ xpuʼphúnʼ.
Makuwá avestruz,+ga̱jma̱a̱ ikhí majngruigu̱u̱n rakijxi̱i̱n tsu̱jtu xáná.*
22 Xujkhú xáná mundxa̱ʼwa̱ gínún náa torre dí rígá ikhí,ga̱jma̱a̱ chacal* makuwá náa guʼwá mitsaanʼ* náa nutañajunʼ.
Mbiʼñún nartumuu ga̱jma̱a̱ ni xájyúuʼ mba̱yu̱u̱ʼ”.+
Mbaʼa nota
^ O “visión”.
^ O “poste rí masngájmún mbuyáá”.
^ Náa ajngáa hebreo naʼthí, “bi̱ ni̱ni̱ kaʼwi̱ín”.
^ Náa ajngáa hebreo naʼthí, “ga̱jma̱a̱ Kesiles”. Mbáa nandoo gáʼthúu̱n grupo a̱ʼgua̱a̱n bi̱ mbiʼyuu Orión ga̱jma̱a̱ eʼwíinʼ bi̱ tri̱gi̱i̱n mijngii.
^ O “gacela”. Nindxu̱u̱ mbáa aña̱ʼ bi̱ nagáyúu itháan nacha̱.
^ O “lanza”.
^ O “guʼwá xtíin”.
^ O “desierto”.
^ O mbáa “xa̱bu̱ wéñiiʼ bi̱ xóo tsu̱jtuunʼ kaʼniún”.
^ Xujkhúʼ bi̱ xóo xu̱wánʼ kaʼniún bi̱ najmangu̱u̱nʼ.
^ O “nagui̱i̱”.
