යුද්ධ සහ අවිආයුධ අරන් කරන සටන් ලෝකේ එන්න එන්නම වැඩි වෙනවා. ඒ නිසා එක්සත් ජාතීන්ගේ සංවිධානය සහ අනිත් සංවිධාන සාමය ඇති කරන්න විවිධ දේවල් කරනවා. එයාලා කරන එක දෙයක් තමයි ගැටුම් ඇති වෙන පැතිවල සාම සාධක හමුදාවේ නියෝජිතයන්ව තියන එක. එයාලාගේ එකම අරමුණ ඒ පැතිවලට සාමය උදා කරන එක. ඒ ගැන එක්සත් ජාතීන්ගේ සංවිධානයේ මහ ලේකම් වන ඇන්ටෝනියෝ ගුටරෙස් මෙහෙම කියනවා. “මේ ලෝකෙට සාමය උදා කරන්න අපිට තියෙන වගකීමේ ප්‍රධාන කාර්යය ඉටු කරන්නේ එක්සත් ජාතීන්ගේ සංවිධානයේ සාම සාධක භටයන්.”

 පහුගිය අවුරුදු ගාණ පුරාවටම සාම සාධක කාර්යයන් යම් තාක් දුරට සාර්ථක වෙලා තියෙනවා කියලා කියන්න පුළුවන්. උදාහරණෙකට සිවිල් වැසියන්ව ආරක්ෂා කරන්න, සරණාගතයන්ව ආයෙත් එයාලාගේ රටවල්වලට යවන්න, මිනිස්සුන්ට අවශ්‍ය දේවල් දෙන්න, අත්‍යවශ්‍ය සේවාවන් ආයෙත් ගොඩනඟන්න එයාලට පුළුවන් වෙලා තියෙනවා. හැබැයි එයාලා ඉදිරියේ තියෙන සමහර බරපතළ අභියෝග නිසා එයාලා බලාපොරොත්තු වෙන තරමටම සාර්ථක වෙන්න බැරි වෙලා තියෙනවා. ලෝකෙට සැබෑ සාමය උදා කරන්න පුළුවන් ස්ථිර විසඳුම් හොයාගන්න පුළුවන් වෙයිද? ඒ ගැන බයිබලේ කියන්නේ මොකක්ද?

සාමය උදා කරන්න තියෙන අභියෝග සහ බයිබලේ විසඳුම්

 අභියෝගය: සහයෝගය අඩුකම. සාමය රැකගන්න කරන කාර්යයට විවිධ රටවල්වල හමුදා, සංවිධාන සම්බන්ධ වෙනවා. සමහර වෙලාවට එයාලට එක්සත්ව වැඩ කරන්න අමාරුයි. මොකද එයාලා අතර වරදවා වටහාගැනීම් ඇති වෙනවා, එයාලාගේ අරමුණු වෙනස්.

 බයිබලේ දෙන විසඳුම: ‘ස්වර්ගයේ දෙවියන් රාජ්‍යයක් පිහිටුවනවා. ඒ රාජ්‍යය මේ හැම රාජ්‍යයක්ම [මිනිස් ආණ්ඩු] නැති කරලා දානවා. සදහටම තියෙන්නේ ඒ රාජ්‍යය විතරයි.’—දානියෙල් 2:44.

 අභියෝගය: සීමිත සම්පත් සහ හැකියාවන්. සාම සාධක කාර්යයන් කරන්න ඇති තරම් මිනිස්සු, මුදල් සහ වෙනත් සම්පත් හැම තිස්සේම නැහැ. ඒ නිසා එයාලා බලාපොරොත්තු වෙන වැඩ කොටස කරගන්න අමාරුයි. ඒ වගේම ඒ වැඩවලට හවුල් වෙන අයට ඒවා කරන්න වෙලා තියෙන්නේ ගැටුම් තියෙන, ගොඩක් භයානක පැතිවල.

 බයිබලේ දෙන විසඳුම: ‘අපේ ස්වාමීන් වන යේසුස් ක්‍රිස්තුස්ගේ දෙවියන් ස්වර්ගයේ තියෙන තැන්වල තමන්ගේ දකුණු පැත්තේ ඉඳගන්න යේසුස්ට අවස්ථාව ලබා දුන්නා. අනිත් ආණ්ඩුවලටත් අධිකාරීන්ටත් බලධාරීන්ටත් වඩා උසස් ස්ථානයක් ඔහුට දුන්නා. ඔහුට තියෙන තරම් අධිකාරියක් වෙන කාටවත් ලැබෙන්නේ නැහැ.’—එෆීස 1:17, 20, 21.

 සියලු බලැති දෙවි යෙහෝවා a දේවරාජ්‍යයේ රජ විදිහට යේසුස්ව පත් කරලා තියෙනවා. සාර්ථකව පාලනය කරන්න ඕන කරන හැම දෙයක්ම ඔහු යේසුස්ට දීලා තියෙනවා. (දානියෙල් 7:13, 14 b) වෙන කිසිම ආණ්ඩුවකට, ආයතනයකට නැති බලයක්, දැනුමක්, ප්‍රඥාවක්, තේරුම්ගැනීමේ හැකියාවක් දෙවියන් යේසුස්ට දීලා තියෙනවා. (යෙසායා 11:2) ඒ වගේම යේසුස්ට බලවත් දේවදූතයන්ගෙන් හැදුණ හමුදාවක් ඉන්නවා. (එළිදරව් 19:14) ඒ නිසා යේසුස්ට විසඳන්න අමාරු ප්‍රශ්නයක් නැහැ.

 අභියෝගය: නීතිමය තහංචි. සමහර වෙලාවට සාම සාධක සංවිධානවල වැඩ කරන අයට එයාලා කරන්න ඕන දේවල්වත් කරගන්න බැහැ. මොකද එයාලා කරන්න ඕනෙ මොනවාද කියන එක ගැන එයාලට පැහැදිලි මඟ පෙන්වීම් නැහැ. එහෙම නැත්නම් එයාලට නීතිමය තහංචි තියෙනවා. ඒ නිසා එයාලට මිනිස්සුන්ව ආරක්ෂා කරන්නවත් එයාලාගේ අරමුණට සම්පූර්ණයෙන්ම ළඟා වෙන්නවත් බැහැ.

 බයිබලේ දෙන විසඳුම: ‘ස්වර්ගයෙත් පොළොවෙත් සියලුම බලය යේසුස්ට දීලා තියෙනවා.’—මතෙව් 28:18.

 මේ ලෝකෙට සාමය ගේන්න ඕන කරන පැහැදිලි මඟ පෙන්වීම් දෙවියන් යේසුස්ට දීලා තියෙනවා. ඒක කරන්න හැම අධිකාරියක්මත් ඔහු යේසුස්ට දීලා තියෙනවා. (යොහන් 5:22) යේසුස් කවදාවත් අසාධාරණ විදිහට, දූෂිත විදිහට වැඩ කරන්නේ නැහැ. (යෙසායා 11:3-5) ඒ නිසයි බයිබලේ යේසුස්ව “සමාදානයේ කුමාරයා” විදිහට හඳුන්වන්නේ. ඔහුගේ රාජ්‍යය “ධර්මිෂ්ඨකම සහ යුක්තිය” මත පිහිටුවලා තියෙනවා කියලා කියන්නේ.—යෙසායා 9:6, 7.

දේවරාජ්‍යයෙන් සැබෑ සාමය ලැබෙනවා

 සාම සාධක සංවිධානවලට සමහර තත්වයන් මර්දනය කරන්න, සමහර පැතිවල ගැටුම් නවත්තන්න පුළුවන් වෙලා තියෙනවා. හැබැයි ප්‍රචණ්ඩකාරී දේවලට හේතු වෙන මිනිස්සුන්ගේ හිත්වල මුල් බැහැලා තියෙන වෛරය මුලිනුපුටලා දාන්න එයාලට බැහැ.

 “සාමය රැකගන්න කියලා කිව්වාට රැකගන්න සාමයක් මේ ලෝකේ නැහැ.”—ඩෙනිස් ජෙට්, එක්සත් ජනපදයේ හිටපු තානාපති.

 අනිත් අතට දේවරාජ්‍යය කියන්නේ සැබෑ සාමය ඇති කරන්න පුළුවන් ආණ්ඩුවක්. මොකද ඒකෙන් හැම කෙනෙක්ටම උගන්නනවා හිතේ වෛරය නැති කරගන්නේ කොහොමද කියලා. උදාහරණෙකට යේසුස් මේ පොළොවේ ඉද්දී උගන්නපු දේවල්වලින්, ආදර්ශයෙන් පෙන්නුවා සාමය ඇති කරගන්නත් අනිත් අයට ආදරේ කරන්නත් පුළුවන් කොහොමද කියලා.

 යේසුස් කිව්වා දේවරාජ්‍යයේ යටත්වැසියන්ව අඳුරගන්න තියෙන ලකුණ එයාලා අතරේ තියෙන ආදරය කියලා. ඒ වගේම බයිබලේ කියනවා අනිත් අයට වෛර කරන අයට දේවරාජ්‍යයේ කිසිම ඉඩක් නැහැ කියලා.

 මිනිස්සුන්ව නිර්මාණය කරපු යෙහෝවා දෙවියන් තමයි දන්නේ මේ ලෝකෙට සැබෑ සාමය උදා කරන්න පුළුවන් හොඳම සහ එකම විදිහ. මිනිස්සුන්ට ඒ කියන්නේ සාම සාධක සංවිධානවලට කරන්න බැරි වුණ දේ දේවරාජ්‍යයෙන් කරනවා.