Bibliapi parlaj milagrospi creenapaj yanapas

UNAY watasmanta amigoyki, imallatapis willarisojtin, ¿imataj creenaykipaj yanapasunkiman? ¿Imaynatachus willasusqanchu, chayri imaynachus kasqanchu? Chay amigoyki rejsisqaykimantapacha cheqallatapuni nisunki, ni jaykʼajtaj imatapis llullakuspa nisunkichu chayqa, imatachus nisusqanta creeyta atillawaj, ¿icharí?

Biblia nisqanman jina milagroswanpis kikillantaj. Cheqamanta nisunman ni mayqenninchej chay milagrosta rikorqanchejchu, chaywanpis creenapaj jinachus manachus kasqanta reparayta atisunman. ¿Imaynamantá? Biblia nisqanman jina milagrospi creenapaj imaschus rikuchisqanta qhawarinachej.

Ashkha milagros runaspa rikunankuta ruwakorqa. Wakin kuteqa, may chhika runas milagros ruwakusqanta rikorqanku (Éxodo 14:21-31; 19:16-19). Milagrosqa, mana pakaypichu ruwakoj, manaqa tukuy runa rikunankuta.

Milagrosqa mana tʼukuna imasta rikuchinapajchu ruwakorqa. Milagrosqa, mana runasman tʼukuna imasta rikuchiyta munaspachu, nitaj mancharinapaj imasta qhawachinapajchu ruwakorqa. Astawanpis chay milagrosqa, runata yanapayta munasqanrayku chayri runa mañakusqanrayku ruwakorqa (Marcos 5:25-29; Lucas 7:11-16). Chay milagrosqa, mana ñaupajmanta wakichisqaschu karqanku.

Milagrosqa, mana qhapaj kanapajchu nitaj may rejsisqa kanapajchu ruwakorqa. Astawanpis milagrosta ruwajkunaqa, Diosta jatunchayta munarqanku (Juan 11:1-4, 15, 40). Pillapis milagronejta qolqeta japʼiyta munajtaqa juchachaj kanku (2 Reyes 5:15, 16, 19, 20, 25-27; Hechos 8:18-23).

Bibliapi parlaj milagrosqa, mana uj layallachu karqa, chayraykutaj ruwakunanpaj mana runachu yanaparqa. Sutʼincharinapaj, mama qocha, wayra ima thañerqa, yaku vinoman tukorqa, paramorqa, manchayta paramojtinpis thañirparqa, onqosqas sanoyarqanku, ciegospis qhawatatarqanku. Kay milagrosqa, mana runaj atiyninwanchu ruwakusqanta rikuchin (1 Reyes 17:1-7; 18:41-45; Mateo 8:24-27; Lucas 17:11-19; Juan 2:1-11; 9:1-7).

Churanakojkuna, rikojkuna ima, milagros kasqanta nerqanku. Lázaro wañuymanta  kausarichisqa kashajtin, Jesuswan churanakoj kuraj sacerdotes, fariseos ima, mana iskayrayacherqankuchu Lázaro wañusqanta. Imaraykuchus Lazaroqa, tawa pʼunchayña wañusqa kasharqa (Juan 11:45-48; 12:9-11). Ashkha watas qhepaman Talmud nisqa librota qhelqajkunaqa, Jesús milagrosta ruwasqanta mana iskayrayacherqankuchu. Manaqa, ima atiywanchus Jesús ruwasqanta iskayrayacherqanku. Kikillantataj Jesuspa discipulosninta tapojkunapis ruwarqanku. Mana uj milagrota ruwasqankutachu taporqanku manaqa jinata nerqanku: “¿Ima atiywantaj, chayrí pejpa sutimpitaj chay tukuy imasta ruwankichejri?”, nispa (Hechos 4:1-13).

Bibliapi parlaj milagrospi, ¿creesunmanchu? Kaykunata qhawarispa, milagrospi creenanchej kasqanta reparanchej. Chaywanpis waj imas astawan creenapaj yanapallawanchejtaj. Bibliaqa, maykʼajchus, maypichus chay milagros ruwakusqanta pikunachus rikusqankutapis sutʼita willan. Ajina kasqanmanta, Bibliaj nisqanwan churanakojkunapis mayta tʼukunku. Cheqamanta nisunman Bibliaj ashkha profeciasnin maychus kajta juntʼakusqanta. Chantapis Bibliaj yuyaychaynin tukuy edadniyoj runasta, runa masinkuwan allinta kausakunankupaj mayta yanapan. Chay yuyaychaykunaqa, mana ni imawan kikinchakunkuchu.

Manarajpuni Bibliapi atienekunkichu chayqa, Bibliata astawan ukhunchay. Bibliata astawan rejsinki chayqa, astawan atienekunki (Juan 17:17). Unay tiempomanta milagrospi creenki chayqa, imatachus Biblia aswan qhepapaj nisqan juntʼakunanpi astawan atienekunki.

[7 paginapi dibujo/foto]

Jesuswan churanakoj kuraj sacerdotes, fariseos ima, mana iskayrayacherqankuchu Lázaro wañusqanta