Saray Kontribusyon a Makapaliket ed Dios

SAY onggendan a salaysay et aliwan marakep. Sinamsam nen Reyna Atalia so trono ed Juda diad panamegley na panamalikdo tan panagpatey. Lapud abaloan ton apatey la so amin a mananawir, introno toy inkasikato bilang reyna. Sakey nin bii, si prinsesa Josaba, a mamapablin tuloy ed si Jehova tan ed Ganggan to, so makpel ya angiyamot ed sakey ya anak na ari, say ugaw nin Joas. Si Josaba tan say masiken to, say Atagey a Saserdoten si Joiada, so angiyamot ed sayan mananawir diad loob na anem taon ed silir da diad templo.​—2 Arari 11:1-3.

Sanen si Joas so mantaon lay pitora, ginapoan na Atagey a Saserdoten si Joiada so plano ton ekalen so reyna manlapud sinamsam ton trono. Impaway to so ugaw ya inyamot to tan kinoronaan to bilang say makanepegan a mananawir na panarian. Insan say marelmeng a Reyna Atalia so inggayugoy na saray guardia na ari diad paway na templo tan pinatey da, ya akainawaan tan nanliketan na totoo. Lapud ontan ya inkiwas nen Joiada tan Josaba, akatulong ira na baleg ed inkipawil na tuan panagdayew diad dalin na Juda. Balet sankaimportantian ni, akatulong ira ed impantultuloy na maarin linya nen David, a panlapuan na Mesias.​—2 Arari 11:4-21.

Wala met so baleg ya agawaan na sayan nitronon ari a makapaliket ed Dios. Say abung nen Jehova so kakkaukolan ya apigeren. Say agnapugeran ya ambisyon nen Atalia a magmaliw ya alenleneg a manuley na Juda so aglambengat nanresulta ed impamaulyan ed templo noagta ontan met ed inkalimas na saray kagawaan na satan. Kanian determinado si Joas a mangipaalagey tan mangipawil lamet ed templo. Tampol a sikatoy angipaakseb na ganggan a mantipon na nakaukolan iran pundo a pangapiger ed abung nen Jehova. Oniay inkuan to: “Amin a kuarta na impabtang a bengabengatla a niyakar ed abung nen Jehova, dia ed manaakar a kuarta, say kuarta na saray too a balang laki sikato so nipetekan to, tan amin a kuarta a manlapu ed anggan siopa a pusoy too pian yakar to ed abung nen Jehova. Sikato so alaen na saray saserdote ed sikara, balang laki a manlapu ed kaaro to; et apigden da so saray butaw na abung, anggan iner a butaw a naromog.”​—2 Arari 12:4, 5.

Mabulos ya anginagnag so totoo. Balet, saray saserdote so aliwan interon-puso ed impanumpal da ed obligasyon dan mangapiger ed templo. Kanian, denesidi na ari a sikato lan mismo so mangasikaso tan ingganggan ton ikarga so amin a kontribusyon diad sakey ya espisyal a kahon. Tinuro to si Joiada bilang manangasikaso, tan oniay inkuan na salaysay: “Si Joiada a saserdote angala na kaban, tan angibutaw na abot ed sakob to, tan sikato so impasen to ed abay na altar, ed kawanan a gilig so singa say sakey onloob ed abung nen Jehova; et saray saserdote a manbabantay ed sasabien yan da’d man so amin a kuarta a niyakar ed loob na abung nen Jehova. Et onman nensaman sanen anengneng da a wala so dakel a kuarta dia ed kaban, a say eskriba na ari tan say atagey a saserdote tinmatdang, tan sikato so inyan da ed saray supot tan binilang da so kuarta ya aromog ed abung nen Jehova. Et initer da so kuarta ya asimbang da ed saray lima  na saray nanggawa ed kimey, tan ed manag-imaton ed abung nen Jehova: et sikato so imbayar da ed saray aluage tan saray managpaalagey, a nankimey ed abung nen Jehova. Tan ed saray bumabakor tan saray panday-bato, tan nipaakar ed panagsaliw na kiew tan pinanday a bato pian pangapiger ed saray butaw na abung nen Jehova, tan nipaakar ed amin ya agastos nipaakar ed abung pian naapiger.”​—2 Arari 12:9-12.

Interon-puso so inkiwas na saray totoo. Naapiger so abung a pandadayewan ed si Jehova kanian nantultuloy la so panagdayew ed sikato diad mapagalang a paraan. Diad ontan, amin ya indonasyon a pundo so nausar ed matukoy a paraan. Satan so sineguro nen Arin Joas!

Natan, say nanengneng ya organisasyon nen Jehova so maalwar a mangaasikaso ed suston pakausaran na saray pundo pian niyabanti so panagdayew ed si Jehova, tan interon-puso ya onkikiwas iray tuan Kristiano a singa met ed saramay Israelita nensaman. Nayarin sakey kayo ed saramay anginagnag parad kiyabanti na intereses na Panarian nen imbeneg a serbisyon taon. Imanoen tayo so pigara ed saray paraan ya inkausaran na saray kontribusyon yo.

PANANGIPALAPAG

Diad sankamundoan, saray onggendan a publikasyon so niyimprinta pian usaren ed panagaral tan panangibunog:

• Libro: 47,490,247

• Bokleta: 6,834,740

• Brosyur: 167,854,462

• Kalendaryo: 5,405,955

• Magasin: 1,179,266,348

• Tract: 440,995,740

• Video: 3,168,611

Say panag-imprinta so gagawaen ed Aprika, Amianen, Sentral, tan Abalaten ya Amerika, Asia, Europa, tan saray islan nasyon ed Pasipiko​—ami-amin et 19 a bansa.

“Say ngaran ko et Katelyn May. Waloy taon ko ni labat. Walay $28 [U.S.] ko, tan labay kon iter iya ed sikayo pian makatulong ed pambayar parad saray makinan panag-imprinta. Say ugaw nin agi yo, Katelyn.”

“Nantongtongan mi a sankapamilyaan so nipaakar ed saray balon makinan panag-imprinta. Denesidi na ananak mi, a mantaon na 11 tan 9, so mangalay kuarta ya atipon da pian idonasyon da itan. Maliket min ipawit so kontribusyon da pati say kontribusyon mi.”

 PANAGPAALAGEY

Saray onggendan et pigara ed saray proyekton impaalagey pian nasuportaan iray kimey na saray Tasi nen Jehova:

• Saray Kingdom Hall diad saray bansa a walaan na limitadon pundo: 2,180

• Assembly Hall: 15

• Sanga: 10

• Saray internasyonal a boluntaryo a walad sigpot-panaon a serbisyo: 2,342

“Diad sayan sampot-simba so primeron panaral mi diad balon Kingdom Hall mi. Malikeliket kami ta walay marakep lan pasen a pangidayewan ed Ama tayo, si Jehova a Dios. Misalamat kami ed si Jehova tan ed sikayo lapud impangasikaso yo ed saray pankaukolan mi diad panagpaalagey ni na dakel a Kingdom Hall. On, say Kingdom Hall so mausa-usar diad komunidad.”​—Chile.

“Apresyaen a maong na dakel ya agagi so itutulong na organisasyon nen Jehova. Anggad sayan panaon et siansian piistorya mi so alay abig a panaon ya inusar mi a kaiba so grupon managpaalagey.”​—Moldova.

“Sikamin sanasawa so agano nin nanselebra ed koma-35 ya anibersaryo na kasal mi. Mandedesidi kami ed saman no anto so iregalo mi ed balang sakey parad saman ya okasyon, tan say desisyon mi et mangiter ed si Jehova tan ed organisasyon to, lapud no anggapo so tulong da et nayarin agtinmalona so panamaley mi. Labay min say kuartan impawit mi et usaren diad pampaalagey ed Kingdom Hall diad sakey ed saray mairap a bansa.”

“Agano ak nin akaawat na tawir ko, tan lapud daiset met iray ‘labay’ ko tan mas daiset iray ‘nakaukolan’ ko, labay kon awaten yo so impawit kon kuarta pian makatulong ed pampaalagey ed saray Kingdom Hall, a nakaukolan a tuloy ed dakel iran bansa.”

 TULONG ED NAAPEKTOAN NA KALAMIDAD

Diad sarayan kaunoran ya agew, mabetbet ya ag-iilaloan so isasabi na saray kalamidad. Dakel ed saray Tasi nen Jehova so mangiiter na malaem iran kontribusyon parad sankamundoan a kimey ta pian natulongan iray agagi a walad lugar ya apektado na kalamidad. Bilang panonot, saray kontribusyon parad tulong ed saray naapektoan na kalamidad so papawalaen bilang kabiangan ed sankamundoan a kimey. Say onggendan so arum ed saray pasen ya atulongan na saray Tasi nen Jehova iray abiktima na kalamidad:

• Aprika

• Asia

• Rehyon ed Carribean

• Saray Isla ed Pasipiko

“Sikamin sanasawa so malabay a misalamat a maong ed sikayo lapud impangipawit yo na saray suplay pian natulongan kami ed saray dineral na bagyo. Wala lay balon atep na abung mi. Papablien min maong so intulong yon tampol.”

“Say ngaran ko et Connor, tan 11 años ak. Sanen anengneng ko so agawan tsunami, labay ko so ontulong. Ilaloan ko a makatulong iya ed saray agagik.”

 SARAY ESPISYAL A SIGPOT-PANAON A LINGKOR

Dakel a Kristiano so sigpot-panaon a man-eebanghelyo odino walad saray ayaman a Bethel. Arum a sigpot-panaon a boluntaryo so suportado na boluntaryon kontribusyon yo. Kabiangan ed saratan so onggendan:

• Misionaryo: 2,635

• Ombiabiahen manangasikaso: 5,325

• Bethelite: 20, 092

“Lapud agak ni makapanlingkor ditan ed Bethel natan [limay taon ya ugaw a laki], labay kon ipawit iyan kontribusyon tekep na pirmin aro. Sano ombaleg ak, onla ak ed Bethel pian mankimey.”

Panangiyalibansa ed Edukasyon na Biblia

Ingganggan nen Jesu-Kristo iray patumbok a ‘manggawa ira na babangatan ed amin a nasyones.’ (Mateo 28:19) Bilang katutulok ed saratan a salita to, saray Tasi nen Jehova so okupadon mangipupulong tan mangibabangat ed mensahe na Biblia diad 235 a daldalin. Ipapalapag tan ibubunog da so literatura na Biblia diad 413 a lenguahe.

On, say sankamablian a kontribusyon na sakey a Kristiano et say panaon ya uusaren to pian natulongan so dakel nin totoo a makaaral nipaakar ed Dios tan ed saray gagala To. Saray Tasi nen Jehova so mabunlok a manguusar na dakel a panaon tan biskeg da pian natulongan iray kapara ran totoo. Mabunlok met ira a tinmulong ed pinansyal a paraan tan akatulong so amin a kontribusyon da, ed nanduruman paraan, diad kiyaabawag na ngaran tan saray gagala nen Jehova diad sankadalinan. Itultuloy komon a bendisyonan nen Jehova irayan sagpot pian natulongan so arum a makaaral nin nagkalalo nipaakar ed sikato. (Uliran 19:17) Say ontan ya inkamabunlok so mamapaliket ed si Jehova!​—Hebreos 13:15, 16.

[Kahon ed pahina 28-30]

Saray Paraan a Pinili na Arum Pian Mangiter na

SARAY KONTRIBUSYON PARAD SANKAMUNDOAN A KIMEY

Dakel so mangigagana, odino mangigegetar, na kantidad ya ipelag da ed saray kahon na kontribusyon ya atatakan na “Contributions for the Worldwide Work​—Matthew 24:14.”

Kada bulan et ipapawit na saray kongregasyon irayan kantidad diad sangan opisina na saray Tasi nen Jehova a manlilingkor ed mismon bansa ra. Saray boluntaryon donasyon a kuarta so nayari met a direktan ipawit ed Watch Tower Bible and Tract Society of the Philippines, Inc., Attention Treasurer’s Office, P.O. Box 2044, 1060 Manila, odino diad sangan opisina na saray Tasi nen Jehova a manlilingkor ed bansa yo. Saray tseke ya impawit ed address ed tagey so kaukolan ya ingaran ed “Watch Tower.” Saray alahas odino arum niran ankablin bengatla so nayari met ya idonasyon. Nepeg ya itekep ed sarayan donasyon so sakey ya antikey a sulat a mangibabagan satan so sakey a direktan langkap.

UKSOYAN NA KONDISYONAL A DONASYON

Nayari met ya imatalek ed Watch Tower so kuarta pian nausar ed sankamundoan a kimey. Bangbalet, satan so ipawil sano kerewen la na angimatalek. Parad kaaruman ya impormasyon, ipangasin mitalosan ed Treasurer’s Office diad address a nipaimano ed tagey.

NIPLANON PANANULONG

Kaaruman ni ed saray direktan langkap a kuarta, walaray arum a paraan na panangiter parad sankamundoan a serbisyo ed Panarian. Kabiangan ed saratan so:

Insurance: Say Watch Tower so nayarin ingaran bilang benepisyaryo ed life insurance policy odino retirement/pension plan.

Saray Deposito ed Bangko: Saray deposito ed bangko, saray kaletan nipaakar ed deposito, odino indibidual a deposito ed panretiro so nayarin imatalek odino ingaran ed Watch Tower diad ipatey, unong ed saray kakaukolanen na lokal a bangko.

Saray Stock tan Bond: Saray stock tan bond so nayarin idonasyon ed Watch Tower Society bilang direktan langkap.

Lote tan Abung: Say lote tan abung a nilako so nayarin iter balanglan direktan langkap odino, no abung et ireserba itan a panayaman na angidonar, a makapantultuloy a manayam ditan legan a mabilay. Mitalosan ed sangan opisina diad bansam sakbay ya iyalis so titulo na antokaman a lote tan abung.

Gift Annuity: Say gift annuity et sakey a reglamento a niyalis na sakey so kuarta odino saray seguridad diad aturon korporasyon ya uusaren na saray Tasi nen Jehova. Bilang kasalat, say angidonar, odino siopaman a pangipiyaan to, so makaawat na pihon bayar ya annuity a tinaon legay bilay. Say angidonar so makaawat na income-tax deduction parad taon a niyareglo so gift annuity.

Testamento tan Inmatalek: Saray kayamanan odino kuarta so nayarin ipatawir ed Watch Tower Society diad panamegley na sakey a legal a testamento, odino nayarin ingaran so Watch Tower Society bilang benepisyaryo ed paknaan a pangimatalek. Say inmatalek a parad sakey a relihyoson organisasyon so nayarin mamawala na pigaran bentaha ed panag-buis.

Unong ya ipapatnag na terminon “niplanon pananulong,” sarayan nengneng na donasyon so kaslakan a mankakaukolan na panagplano ed biang na mangidonar. Pian natulongan iray indibidual a malabay ya ontulong ed sankamundoan a kimey na saray Tasi nen Jehova panamegley na pigaran nengneng na niplanon pananulong, niparaan so sakey a brosyur diad Ingles tan Español ya atituloan na Charitable Planning to Benefit Kingdom Service Worldwide. Sayan brosyur so inimprinta pian mangitarya na impormasyon diad nanduruman paraan a saray langkap so niiter la natan odino ipatawir diad ipatey. Kayari ran abasa so brosyur tan tinmupleg ed saray legal a managkonseho ra ed panag-buis, dakel la so makakatulong pian nasuportaan so relihyoson kimey tan saray itutulong na saray Tasi nen Jehova ed kaparan totoo diad sankamundoan tan nagagamoran da met so dakel a benepisyo ed buis legan a gagawaen da itan. Makala ka na sayan brosyur panamegley na ikerew na kopya manlapud mismon Charitable Planning Office.

Parad kaaruman ya impormasyon, nayarian moy mitalosan diad Charitable Planning Office, balanglan diad pansulat odino itawag ed telepono, diad address a nilista ed leksab odino nayarin tawagan yo so sangan opisina na Saray Tasi nen Jehova a manlilingkor ed bansa yo.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue, San Francisco del Monte

1105 Quezon City

Telephone: (02) 411-6090

[Picture Credit Line ed pahina 27]

Video a Faithful: Stalin: U.S. Army photo