Kubi yini ukubheja?

OKUTSHIWO NGABANYE

Abanye abantu bathi ukubheja yikuzilibazisa okungelangozi ikakhulu nxa kusemthethweni. Phela enye imali etholakala kwezinye indlela zokubheja ezinjengokudlala i-lotto iyasetshenziswa ukunceda abantu.

OKUTSHIWO LIBHAYIBHILI

Akulandawo eBhayibhilini lapho esithola khona ibala elithi ukubheja. Kodwa kulamavesi asinceda sibone ukuthi uNkulunkulu uthini ngokubheja.

Nxa umuntu ebheja uyabe efuna ukuwina athathe imali ezifakwe ngabanye. Indlela le yokuthola imali ayivumelani lalokho okutshiwo liBhayibhili, elisixwayisa ngokuthi ‘siqaphele yonke imihlobo yobuhwaba.’ (ULukha 12:15) Ukubheja kwenza umuntu abe yisihwaba. Ezindaweni lapho okubhejwa khona kuyabe kuthwe ozawina uzathola inkalakatha yemali kodwa abatsho ukuthi ayabe emancane kangakanani amathuba okuthola leyo mali ngoba bayakwazi ukuthi abantu abafuna ukunotha basebenzisa imali enengi bebheja. Ukubheja kwenza umuntu abe lesifiso sokuthola imali ngendlela elula futhi akumenzi abalekele ubuhwaba.

Ukubheja kwenza umuntu aqakathekise kakhulu okufunwa nguye, angabi lendaba labanye. Kodwa iBhayibhili lisikhuthaza ukuthi ‘singazifuneli okunceda thina kodwa siqhubeke sisenza okunceda abanye.’ (1 KwabaseKhorinte 10:24) Omunye umthetho kwelitshumi uthi: ‘Ungahawukeli loba yini engekamakhelwane wakho.’ (U-Eksodusi 20:17) Umuntu obhejayo uyabe efuna ukunqoba ngenhliziyo yonke futhi efisa lokuthi abanye badliwe ukuze yena athole.

IBhayibhili liphinda lisixwayise ukuthi singakholwa izinto zesidimoni lezenhlanhla. Kudala ko-Israyeli kulabanye ababengasakholwa kuNkulunkulu sebeqalisa ‘ukulungisela unkulunkulu wenhlanhla itafula yokudla.’ UNkulunkulu wakwamukela yini lokho ababekwenza? Hatshi, wathi kubo: “Laqhubeka lisenza okubi phambi kwami, lakhetha ukwenza izinto engingazithandiyo.”—U-Isaya 65:11, 12.

Kuliqiniso sibili ukuthi kwamanye amazwe, ezinye imali zokubheja okusemthethweni uhulumende uyazisebenzisa ukubhadalela abanye izikolo, ukuthuthukisa ezomnotho lezinye inhlelo zomphakathi. Kodwa indlela imali leyo esetshenziswa ngayo akutshintshi ukuthi itholakala ngokukhuthaza abantu ubuhwaba, ukuziqakathekisa kanye lokuthola imali abangayisebenzelanga.

‘Ungahawukeli loba yini engekamakhelwane wakho.’—U-Eksodusi 20:17.

Ingaphi Ingozi Yokubheja?

OKUTSHIWO LIBHAYIBHILI

IBhayibhili lithi “labo abazimisele ukunotha bawela esilingweni lasemjibileni kanye lasezifisweni ezinengi ezingelangqondo leziyingozi ezithela abantu emanyaleni lasekubhujisweni.” (1 KuThimothi 6:9) Izikhathi ezinengi abantu ababhejayo bayizihwaba. Kodwa iBhayibhili lisixwayisa ukuthi sikubalekele ubuhwaba.—Kwabase-Efesu 5:3.

Ukubheja kwenza umuntu afune ukuthola imali lula nje futhi lokhu kubangela lokuthi acine ethanda imali. Ukuthanda imali khona “kuyimpande yazo zonke izinto ezilimazayo.” Isifiso sokufuna imali singabangela ukukhathazeka kakhulu futhi singaxegisa lokholo. Yikho iBhayibhili lifanisa umuntu othanda imali ‘lozigwaza yonke indawo ngezinhlungu ezinengi.’—1 KuThimothi 6:10.

Ubuhwaba benza umuntu angasuthiseki ngalokho alakho njalo angathokozi. IBhayibhili lithi: “Umuntu othanda isiliva ngeke asuthiseke ngesiliva, lomuntu othanda inotho kasuthiseki ngalokho akutholayo.”—UmTshumayeli 5:10.

Abantu abanengi ababhejayo kunzima ukuthi bawutshiye umkhuba lo. Omunye umbiko uthi e-United States kulamamiliyoni abantu abalomkhuba wokubheja.

IZaga zithi: “Ilifa elitholwe ngobuhwaba ekuqaliseni, alisoze libe yisibusiso ekucineni.” (IZaga 20:21) Kwabanengi ukubheja kubabangele izikwelede, ukuphelelwa yimisebenzi, imitshado labangane. Ukulandela lokho okutshiwo liBhayibhili kungenza umuntu abalekele imiphumela yonke le emibi.

“Labo abazimisele ukunotha bawela esilingweni lasemjibileni kanye lasezifisweni ezinengi ezingelangqondo leziyingozi ezithela abantu emanyaleni lasekubhujisweni.”—1 KuThimothi 6:9.