Be somo Muma en gima moriga koso ooyo? Mano luwore gi yo mitiyogo e somo Muma. We wanon ane gik ma nyalo konyi mondo somo Muma omori.

Som Muma ma wechene yot winjo. Ka isomo buk moro ma nigi weche ma nyachon kendo ma winjo tiendgi tek, some nyalo jogi. Omiyo, many Muma ma tiyo gi weche mayot winjo kendo ma nyalo chopo e chunyi. Kata kamano, onego obed Muma ma olok e yo maber kendo makare. *

Ti gi teknoloji ma nyasani. E kindegi, Muma yudore nyaka e intanet. Inyalo somo Muma e intanet kata inyalo kete e kompyuta, simu kata e tablet mondo isome bang’e. Nitie Muma moko ma nigi weche momedore ma nyalo konyi nono ndiko mamoko ma wuoyo e wi wach moro, kata ginyalo konyi neno kaka Muma mamoko otiyo gi ndikono. Ka iheroga winjo weche momaki moloyo somo, Muma bende yudore e dwol momaki. Nitie joma ohero winjo Muma ka gin e mtoka, kata ka gin e dijegi mamoko. Donge inyalo temo tiyo gi yo mineno ni yotni?

Ti gi gik malero Muma. Nitie gik mamoko malero Muma manyalo konyi ahinya mondo ipuonjri weche mang’eny sama isomo Muma. Nitiere map ma nyiso nyinge mag kuonde ma Muma wuoye. Ginyalo konyi mondo ing’e kama kuondego ne nitie kendo keto weche ma notimorego e pachi.  Sula kaka ma yudore e gasedni kata ma yudore e websait mar jw.org/luo e kare mar “Puonj mag Muma” nyalo konyi ahinya ng’eyo tiend weche manie Muma.

Som Muma kitiyo gi yore mopogore opogore. Kapo ni somo Muma kichako gi Chakruok nyaka Fweny nyalo bedoni matek, donge inyalo chako some gi kuonde mamori ahinya e Muma? Kidwaro ng’eyo weche mang’eny e wi joma iwuoyo kuomgi ahinya e Muma, inyalo somo Muma ka inono moro ka moro kuomgi. Weche ma yudore e sanduku ma wiye wacho ni, “ Ng’e Muma e Yo Matut Kuom Ng’eyo Joma Muma Wuoyo Kuomgi” nyalo konyi. Samoro inyalo somo Muma kaluwore gi wach ma diher ng’eyo ahinya kae to idhi e machielo kata inyalo yiero some kaluwore gi kaka ochan gik ma notimore miwuoyoe e Muma. Donge inyalo temo achiel kuom yoregi?