1-3. (a) Gin lokruoge mage ma nyalo bedo matek timo kata mana bang’ batiso? (b) Kapo ni timo lokruok tek moloyo kaka ne waparo, gin penjo mage monego wapenjre? (Ne piche man malo.)

BANG’ puonjruok adiera, Kevin ^[1] ne gombo ahinya mondo obed gi winjruok maber gi Jehova. Kata kamano, kuom higni mang’eny, kane pok opuonjore, notugo tuke mag loyo pesa, nomadho ndawa, nomerga ahinya, kendo notiyoga gi yedhe mamero. Mondo Nyasaye oyie kode, Kevin ne nyaka we timbe ma Muma kwedogo. Noketo geno mare chuth kuom Jehova kendo kuom teko ma Muma nigo mar loko ngima ji.—Hib. 4:12.

² Bang’ batiso, be Kevin koro noweyo timo lokruok e ngimane? Ooyo, nimar pod ne en gi tich matek mar dhi nyime nyago kido mag Jakristo kendo bero kidogo. (Efe. 4:31, 32) Kuom ranyisi, nowuoroga ahinya kaka iye ne jawang’ piyo kendo kaka geng’o ich-wang’ ne tekne. Kevin wacho niya: “Ng’eyo kaka nanyalo geng’o mondo kik iya wang’ mapiyo ne tekna moloyo weyo timbe maricho ma ne atimo chon!” Lamo kod puonjruok  Muma adimba nokonyo Kevin ma otimo lokruoge ma ne dwarore.

³ Mana kaka Kevin, thothwa bende notimo lokruoge madongo kapok obatiswa mondo omi wadag kaluwore gi puonj mag Muma. Bang’ batiso, ne wafwenyo ni pod dwarore ni wadhi nyime timo lokruoge moko kata ma ok nenre ayanga ne ji mondo wamed luwo tim Nyasaye kod Kristo e yo maberie moloyo. (Efe. 5:1, 2; 1 Pet. 2:21) Kuom ranyisi, nyalo bedo ni wasefwenyo ni wan gi kido moko ma ok beyo kaka ng’ur seche duto, luoro wang’ dhano, hero kuoth, kata nyawo mamoko. Be dibed ni timo lokruok mondo wawe timbe ma kamago tek moloyo kaka ne waparo? Ka en kamano, inyalo penjori niya: ‘Bedo ni asetimo lokruoge madongo e ngimana nyaka chop sani, ang’o momiyo medo timo lokruoge mamoko matindo tekna? Ere kaka anyalo medo timo dongruok ka aweyo mondo Muma e ma olok ngimana?’

4. Ang’o momiyo seche moko ok yot timo gik ma moro Jehova?

⁴ Nikech wasepuonjore mwang’eyo Jehova kendo wahere, donge wagombo ahinya timo gik mamore? Kata kamano, bedo ni chunywa gombo timo gik mabeyo mamoro Jehova, pod warem omiyo tek ahinya timo gik mamore kinde duto. Nyalo bedo ni wan bende wawinjo mana kaka jaote Paulo nowinjo ka nondiko niya: “An gi gombo mar timo gima long’o, to nyalo mar time e ma aongego.”—Rumi 7:18; Jak. 3:2.

5. Gin lokruoge mage ma ne watimo kapok obatiswa, to gin nyawo mage ma seche moko nyaloga dhi nyime chandowa?

⁵ Waseweyo timbe maricho duto ma nyalo miyo ogolwa e kanyakla mar Jokristo. (1 Kor. 6:9, 10) Kata kamano, pod wan dhano morem. (Kol. 3:9, 10) Omiyo, ok owinjore wapar ni koro ok wabiga both bang’ batiso kata bang’ bedo e adiera kuom higni mogwaro. Pod wanyalo bedo gi nyawo moko kaka bedo gi gombo kata paro maricho, kata wanyalo yudo ka teknwa golo kido moko maricho. Wanyalo nyagore gi nyawogo kuom higni mang’eny.

6, 7. (a) En ang’o ma konyowa bedo osiepe Jehova, kata obedo ni warem? (b) Ang’o momiyo ok onego waluor kwayo Jehova ng’wono?

⁶ Bedo ni warem ok onego omonwa bedo gi winjruok maber gi Jehova kendo dhi nyime tiyone. Par ane wachni: Kane Jehova oywayowa mondo wabed gi winjruok maber kode, nong’eyo ni wanyalo both kinde ka kinde. (Joh. 6:44) To nikech Nyasaye ong’eyo kitwa kod kaka chunywa chalo, nong’eyo malong’o ni wan gi nyawo ma ne dhi chandowa. Kendo nong’eyo ni kinde ka kinde wabiroga timo gik ma ok kare. To mano ok nomono Jehova miyowa thuolo mar bedo osiepene.

⁷ Hera e ma nomiyo Nyasaye ochiwonwa mich makende ma en misango mar rawar mar Wuode mohero. (Joh. 3:16) Ka waloko chunywa ma wakwayo Jehova ng’wono kokalo kuom misango mar Wuode ma nochiwo, wanyalo bedo gadier chuth ni osiep ma wan-go kode pod biro dhi nyime. (Rumi 7:24, 25; 1 Joh. 2:1, 2) Be onego wawe tiyo gi chenro ma Jehova oketo mar rawar mana nikech waparo ni wan joketho ahinya? Ooyo! Mano nyalo chalo ka gima watamore logo sama lwetwa ochido to pi maler nitie. Donge rawar en chenro mochiw ne joricho ma oyie loko chunygi? Nikech rawar, koro wanyalo bedo gi winjruok maber gi Jehova kata obedo ni wan joma orem.—Som 1 Timotheo 1:15.

8. Ang’o momiyo ok onego warendre gi nyawo magwa?

⁸ En adier ni ok onego warendre gi nyawo magwa. Loso osiep motegno gi Jehova  oriwo timo kinda mondo wabed joma luwo machiegni ahinya ranyisi mare gi mar Kristo, kendo bedo gi kido ma gidwaro ni wabedgo. (Zab. 15:1-5) Mano bende oriwo temo matek mondo wageng’ nyawo magwa, kata weyogi chuth ka mano nyalore. Kata bed ni eka nyocha obatiswa, kata wasebedo e adiera kuom higni mang’eny, pod nyaka ‘wadhi nyime yie mondo oriewa.’—2 Kor. 13:11.

9. Wang’eyo nade ni wanyalo dhi nyime rwako dhano manyien?

⁹ Kinda dwarore pile ka pile mondo ‘wadhi nyime yie mondo oriewa’ kendo mondo warwak “kit dhano manyien.” Paulo noparo ne Jokristo wetene niya: “Ne opuonju ni ugol kit dhano machon oa kuomu, ma en kido ma luwore gi timbe ma nuluwo chon, nimar kidono kethore kuom gombone ma wuonde. To onego udhi nyime ka udoko manyien e paro ma chikou, kendo onego urwak kit dhano manyien ma ne ochue kuom dwaro mar Nyasaye ka luwore gi tim makare madier kod makruok motegno.” (Efe. 4:22-24) Wach motigo ni “udhi nyime ka udoko manyien” nyiso ni rwako dhano manyien en gima dhi nyime kuom ndalo mogwaro. Mano en gima jiwowa nikech kata bed ni wasebedo ka watiyo ne Jehova kuom higni maromo nade, pod wanyalo dhi nyime nyago kendo bero kido magwa kaka Jokristo ma miyo warwako kido manyien. Kuom adier, Muma nyalo konyi dhi nyime loko ngimani.

10. En ang’o ma dwarore ni watim mondo Muma okonywa dhi nyime timo dongruok, to gin penjo mage ma wanyalo penjore?

¹⁰ Dwarore ni watim kinda ka po ni wadwaro ni Wach Nyasaye odhi nyime loko kitwa. To ang’o momiyo dwarore ni watim kinda ahinya e wi wachni? Nikech Jehova guedhoga gik ma watimo, donge bedo gi kido mabeyo ok onego bed gima tek? Donge Jehova nyalo golo kido maricho ma wan-go ma wabed gi kido mabeyo ma ok ochuno ni watim kinda ahinya wan wawegi?

11-13. Ang’o momiyo Jehova oweyo mondo wan e ma watim kinda e loyo nyawo ma wan-go?

¹¹ Sama waparo matut kuom gik moko duto ma Jehova nochueyo, wanyalo fwenyo teko mang’eny ma Jehova nigo. Kuom ranyisi nochueyo chieng’ gi teko mang’eny miwuoro. Kuom sekond achiel, chieng’ nyalo golo liet kod ler mang’eny matamre ginono. Kata kamano, mana liet gi ler matin ahinya e ma choponwaga e piny, to mano oromo siro ngima gimoro amora e piny. (Zab. 74:16; Isa. 40:26) Jehova miyoga jotichne teko mowinjore kodgi sama mano dwarore. (Isa. 40:29) En adier ni Nyasaye nyalo miyowa teko mar loyo nyawo moro amora ma wan-go ma ok watimo kinda kata rito mondo wahinyre mondi ni eka walokre. Ang’o momiyo ok otimga kamano?

¹² Jehova osemiyowa mich maber mar timo yiero wan wawegi. Ka wayiero mar timo dwach Nyasaye kendo time gi kinda, wanyiso okang’ ma waherego kod gombo ma wan-go mar more. Bende, wanyiso ni wariwo lwedo ratiro ma en-go mar locho. Satan osebedo ka kwedo ratiro ma Jehova nigo mar locho, omiyo chiwruok marwa ma ok ochunwa kendo kinda ma wa timo mondo wariw lojno lwedo, en gima kende ahinya ne Wuonwa me polo ma jachiwo kendo ma morga gi gik mabeyo mwatimo. (Ayub 2:3-5; Nge. 27:11) Kata kamano, kapo ni Jehova ogolonwa ting’ mar timo kinda mondo walo nyawowa, ma koro ok ochuno ni waked gi nyawowago mondo wamore, ok wanyal wacho ni wamakore kode kendo ni wariwo lochne lwedo.

 ¹³ Omiyo, Jehova nyisowa ni ‘watim kinda duto’ e nyago kido ma more. (Som 2 Petro 1:5-7; Kol. 3:12) Odwaro ni watim kinda mondo wachik chunywa kod pachwa. (Rumi 8:5; 12:9) Ka watimo kinda e wi wachni, wabiro winjo maber kuom ng’eyo ni Muma pod dhi nyime loko ngimawa.

14, 15. Ang’o monego watim mondo wanyag kido ma Jehova dwaro? (Ne sanduku ma wiye wacho ni “ Muma kod Lamo Nokonyogi Loko Ngimagi.”)

¹⁴ Ang’o ma wanyalo timo mondo wanyag kido ma Jehova oyiego kendo wamore? Kar yiero wawegi gima onego watimie dongruok, dwarore ni wawe mondo Nyasaye e ma otawa kaka iwachonwa e Jo-Rumi 12:2. Ndikono wacho kama: “Weuru luwo kit ngima mar joma odak e ndaloni, to lokreuru kuom miyo pachu obed manyien, mondo ung’e gadier dwaro maber mar Nyasaye, dwaro mowinjore, kendo malong’o chuth e wang’e.” Kokalo kuom Wachne kod rohone maler, Jehova konyowa ng’eyo dwache, okonyowa timo dwacheno mondo walok ngimawa kendo watim gik modwaro e okang’ mowinjore. Wanyalo nyiso ni watimo kinda kuom somo Muma pile ka pile, paro Ndiko matut, kendo kwayo mondo Nyasaye omiwa rohone maler. (Luka 11:13; Gal. 5:22, 23) Ka wadhi nyime timo kaka roho mar Jehova tayowa kendo bedo gi paro machal gi mar Jehova kaka ondik e Muma, wechewa, timbewa, kod gik ma waparo biro more. Mano biro miyo wasik ka watang’ mondo walo nyawo moro amora ma wanyalo bedogo.—Nge. 4:23.

¹⁵ Mopogore gi somo Muma pile, dwarore ni wasom buge malero Muma ka wan gi paro mar luwo kido mabeyo mag Jehova. Jomoko osefwenyo ni bedo gi sula moko mag Ohinga mar Jarito kata Amkeni! gi ndiko moko mag Muma e paro nyalo konyogi nyago kido mabeyo mag Jokristo kata konyogi loyo nyawo moko ma gin-go.

16. Ang’o momiyo chunywa ok onego onyosre kapo ni dongruok ma watimo dhi mos?

¹⁶ Kapo ni nenore ni ok watim dongruok piyo piyo, ber ng’eyo ni timo dongruok en gima kawoga kinde. Nyago kido ma Jakristo onego obedgo en gima dhiga nyime. Nyaka wabed joma hore sama watimo matek mondo Muma odhi nyime konyowa timo lokruoge mabeyo e ngimawa. Sama wachako timo dongruok, nyalo bedo matek timo gima Ndiko wacho. Kata kamano, kaka kinde medo kadho, e kaka timo gik moko e yo ma Jehova Nyasaye dwaro biro bedonwa mayot.—Zab. 37:31; Nge. 23:12; Gal. 5:16, 17.

17. Ka wamakore gi Jehova, wanyalo bedo gi geno mane kuom kinde mabiro?

¹⁷ Jotich Jehova momakore kode motegno gikone biro bedo gi thuolo mar lame kendo tiyone ka koro gin joma kare chuth. E kindego, nyiso kido mabeyo mamoro Nyasaye biro bedonwa mayot kendo wabiro bedo mamor nyiso kidogo. Kapok kindeno ochopo, wamor ahinya ni mich mar rawar osemiyowa thuolo mar tiyo ne Nyasachwa ma jahera. Kata gie kinde ma pod waremiegi, wanyalo dhi nyime tiyone ka wayie mondo teko mar Wach Nyasaye odhi nyime loko ngimawa.

18, 19. Ere kaka wanyalo bedo gadier ni Muma nigi teko mar dhi nyime loko ngimawa?

¹⁸ Owadwa miluongo ni Kevin, ma ne wawuoyo kuome e chak sulani, notemo matek mondo ong’e kaka dogeng’ ich wang’. Noparo matut kendo tiyo gi puonj mag Muma, kendo ne orwako puonj kod kony ma Jokristo wetene ne omiye. Bang’ higni moko manok, Kevin nogoyo okang’ maduong’ e timo dongruok. Gikone, ne okete kaka jakony tich e kanyakla, to kuom higni 20 mosekalo, osebedo ka en jaduong’-kanyakla. Kata kamano, pod ong’eyo ni dwarore ni osik kotang’ mondo kik odog e nyawo ma ne en-go chon.

¹⁹ Gik ma ne otimore e ngima Kevin nyiso ni Muma konyoga jotich Nyasaye odhi nyime timo lokruoge mabeyo e ngimagi. Omiyo, wadhiuru nyime tiyo gi Wach Nyasaye ma ok waol, mondo okonywa timo lokruok kendo miyo wamed bedo gi winjruok maber gi Jehova. (Zab. 25:14) Wabiro neno ayanga ni Muma nyalo dhi nyime loko ngimawa ka waneno kaka Jehova guedho kindawa.—Zab. 34:8.